{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_56.htm","path":"neu/ascp/a05_56.htm","source_url":"https://sacred-texts.com/neu/ascp/a05_56.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 56\n Verse Indeterminate Saxon\n \n - \n Miltsa min, god, \u00a0\u00a0\u00a0\u00a0 and me milde weor\u00f0, \n for\u00feon min sawel on \u00fee \u00a0\u00a0\u00a0\u00a0 swy\u00f0e getrywe\u00f0,\n and ic on f\u00e6gerum scuan \u00a0\u00a0\u00a0\u00a0 fi\u00f0era \u00f0inra\n gewicie, \u00a0\u00a0\u00a0\u00a0 o\u00f0\u00fe\u00e6t gewite for\u00f0\n- 5\n- \n and unriht me \u00a0\u00a0\u00a0\u00a0 eall beglide. \n Heonan ic cleopige \u00a0\u00a0\u00a0\u00a0 to heahgode\n and to wealdendgode, \u00a0\u00a0\u00a0\u00a0 \u00f0e me wel dyde.\n He \u00fea of heofenum \u00a0\u00a0\u00a0\u00a0 hider onsende\n \u00fee me alysde, \u00a0\u00a0\u00a0\u00a0 la\u00feum wi\u00f0ferede,\n- 10\n- \n sealde on edwit \u00a0\u00a0\u00a0\u00a0 \u00fee me \u00e6r tr\u00e6dan. \n Sende mihtig god \u00a0\u00a0\u00a0\u00a0 his milde gehigd\n and his so\u00f0f\u00e6st mod \u00a0\u00a0\u00a0\u00a0 samod \u00e6tg\u00e6dere,\n and mine sawle \u00a0\u00a0\u00a0\u00a0 sona alysde\n of leon hwelpum \u00a0\u00a0\u00a0\u00a0 re\u00f0e gemanan;\n- 15\n- \n w\u00e6s ic sl\u00e6pende \u00a0\u00a0\u00a0\u00a0 sare gedrefed. \n Synd me manna bearn \u00a0\u00a0\u00a0\u00a0 mihtigum to\u00f0um\n w\u00e6penstr\u00e6las, \u00a0\u00a0\u00a0\u00a0 \u00fea me wundedon;\n w\u00e6ron hyra tungan getale \u00a0\u00a0\u00a0\u00a0 teonan gehwylcre\n and to yfele gehwam \u00a0\u00a0\u00a0\u00a0 ungemet scearpe.\n- 20\n- \n Ahefe \u00fee ofer heofenas, \u00a0\u00a0\u00a0\u00a0 halig drihten; \n is wuldur \u00f0in \u00a0\u00a0\u00a0\u00a0 wide and side\n ofer \u00f0as eor\u00fean \u00a0\u00a0\u00a0\u00a0 ealle m\u00e6re.\n Fotum heo minum \u00a0\u00a0\u00a0\u00a0 f\u00e6cne grine\n grame gearwodon, \u00a0\u00a0\u00a0\u00a0 and geornlice\n- 25\n- \n mine sawle \u00a0\u00a0\u00a0\u00a0 swy\u00f0e onbigdon. \n Hi deopne sea\u00f0 \u00a0\u00a0\u00a0\u00a0 dulfon widne,\n \u00fe\u00e6r ic eagum \u00a0\u00a0\u00a0\u00a0 on locade,\n and hi on \u00f0one ylcan \u00a0\u00a0\u00a0\u00a0 eft gefeollan.\n Gearo is min heorte \u00a0\u00a0\u00a0\u00a0 \u00fe\u00e6t ic gode cweme;\n- 30\n- \n gearo is min heorte \u00a0\u00a0\u00a0\u00a0 \u00fe\u00e6t ic gode swylce \n sealmas singe, \u00a0\u00a0\u00a0\u00a0 so\u00f0word sprece.\n Aris, wuldur min, \u00a0\u00a0\u00a0\u00a0 wynpsalterium,\n and ic on \u00e6rmergene \u00a0\u00a0\u00a0\u00a0 eac arise\n and min hearpe \u00a0\u00a0\u00a0\u00a0 herige drihten.\n- 35\n- \n Ic \u00fee on folcum \u00a0\u00a0\u00a0\u00a0 frine drihten \n ecne andete, \u00a0\u00a0\u00a0\u00a0 eac geond \u00feeode\n sealmas singe \u00a0\u00a0\u00a0\u00a0 swi\u00f0e geneahhige.\n For\u00f0on \u00fein mildheortnes \u00a0\u00a0\u00a0\u00a0 is mycel wi\u00f0 heofenas,\n is \u00f0in so\u00f0f\u00e6stnes \u00a0\u00a0\u00a0\u00a0 swylce wi\u00f0 wolcnum.\n- 40\n- \n Ahafen \u00feu eart ofer heofenas, \u00a0\u00a0\u00a0\u00a0 halig drihten; \n is ofer ealle \u00a0\u00a0\u00a0\u00a0 eor\u00f0an swylce\n \u00feines wuldres wlite \u00a0\u00a0\u00a0\u00a0 wide and side.","title":"The Paris Psalter: Psalm 56","type":"page"}