{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_61.htm","path":"neu/ascp/a05_61.htm","source_url":"https://sacred-texts.com/neu/ascp/a05_61.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 61\n Verse Indeterminate Saxon\n \n - \n Ic mine sawle \u00a0\u00a0\u00a0\u00a0 symble wylle \n full gleawlice \u00a0\u00a0\u00a0\u00a0 gode under\u00feeodan;\n \u00e6t him is h\u00e6lu min \u00a0\u00a0\u00a0\u00a0 her eall gelancg.\n Hw\u00e6t, he is god min \u00a0\u00a0\u00a0\u00a0 and gearu h\u00e6lend;\n- 5\n- \n is he fultum min, \u00a0\u00a0\u00a0\u00a0 ic ne forhtige wiht. \n \u00f0onne ge mid mane \u00a0\u00a0\u00a0\u00a0 men ongunnon,\n ealle ge \u00f0a to deadan \u00a0\u00a0\u00a0\u00a0 d\u00e6dun sona,\n swa ge awurpon \u00a0\u00a0\u00a0\u00a0 wah of stofne.\n Swa ge mine are \u00a0\u00a0\u00a0\u00a0 ealle \u00feohton\n- 10\n- \n wra\u00f0e toweorpan, \u00a0\u00a0\u00a0\u00a0 wide urnon \n \u00feurstige mu\u00f0e; \u00a0\u00a0\u00a0\u00a0 \u00fe\u00e6ne bletsadan\n and \u00f0one wyrgedan \u00a0\u00a0\u00a0\u00a0 wra\u00f0e mid heortan.\n Hw\u00e6\u00f0ere ic me so\u00f0e \u00a0\u00a0\u00a0\u00a0 sawle mine\n to gode h\u00e6fde \u00a0\u00a0\u00a0\u00a0 georne ge\u00f0eoded;\n- 15\n- \n he minre ge\u00f0ylde \u00a0\u00a0\u00a0\u00a0 \u00feingum wealde\u00f0. \n Hw\u00e6t, he is god min \u00a0\u00a0\u00a0\u00a0 and gleaw h\u00e6lend\n and fultum is; \u00a0\u00a0\u00a0\u00a0 ne m\u00e6g ic hine ahw\u00e6r befleon.\n On gode stande\u00f0 \u00a0\u00a0\u00a0\u00a0 min gearu h\u00e6lu\n and wuldor min \u00a0\u00a0\u00a0\u00a0 and wyn mycel;\n- 20\n- \n me is halig hyht \u00a0\u00a0\u00a0\u00a0 on hine swylce. \n Hycge him halig folc \u00a0\u00a0\u00a0\u00a0 h\u00e6lu to drihtne;\n do\u00f0 eowre heortan hige \u00a0\u00a0\u00a0\u00a0 hale and cl\u00e6ne,\n for\u00f0on eow god stande\u00f0 \u00a0\u00a0\u00a0\u00a0 georne on fultum.\n Hw\u00e6\u00f0ere ge, manna bearn, \u00a0\u00a0\u00a0\u00a0 manes unlyt\n- 25\n- \n wyrcea\u00f0 on w\u00e6gum \u00a0\u00a0\u00a0\u00a0 and woh do\u00f0, \n and eow beswica\u00f0 \u00a0\u00a0\u00a0\u00a0 sylfe oftast,\n \u00fe\u00e6r ge idel gylp \u00a0\u00a0\u00a0\u00a0 on \u00feam ilcan fremma\u00f0.\n Nella\u00f0 ge gewenan \u00a0\u00a0\u00a0\u00a0 welan unrihte\n o\u00fe\u00fee to reaflace \u00a0\u00a0\u00a0\u00a0 r\u00e6da \u00feencean.\n- 30\n- \n \u00feeah \u00fee eow wealan to \u00a0\u00a0\u00a0\u00a0 wearnum flowen, \n nyllan ge eow on heortan \u00fea \u00a0\u00a0\u00a0\u00a0 hige sta\u00f0elian;\n \u00e6ne ic god spr\u00e6can \u00a0\u00a0\u00a0\u00a0 gearuwe gehyrde\n and \u00fe\u00e6t treowe ongeat \u00a0\u00a0\u00a0\u00a0 tidum gemeldad.\n Miht is drihtnes \u00a0\u00a0\u00a0\u00a0 ofer middangeard\n- 35\n- \n and him \u00fe\u00e6s to worlde \u00a0\u00a0\u00a0\u00a0 wuldor stande \n and mildheortness, \u00a0\u00a0\u00a0\u00a0 \u00fe\u00e6t he manna gehwam\n \u00e6fter his agenum \u00a0\u00a0\u00a0\u00a0 earnungum deme\u00f0,\n efne swa he wyrce\u00f0 \u00a0\u00a0\u00a0\u00a0 on worldlife.","title":"The Paris Psalter: Psalm 61","type":"page"}