{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_62.htm","path":"neu/ascp/a05_62.htm","source_url":"https://sacred-texts.com/neu/ascp/a05_62.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 62\n Verse Indeterminate Saxon\n \n - \n God min, god min, \u00a0\u00a0\u00a0\u00a0 ic \u00fee gearuwe to \n \u00e6t leohte gehwam \u00a0\u00a0\u00a0\u00a0 lustum wacie.\n Min sawl on \u00f0e \u00a0\u00a0\u00a0\u00a0 swy\u00f0e \u00feyrste\u00f0\n and min fl\u00e6sc on \u00f0e \u00a0\u00a0\u00a0\u00a0 f\u00e6ste getreowe\u00f0.\n- 5\n- \n On westene \u00a0\u00a0\u00a0\u00a0 and on wege swylce \n and on w\u00e6terflodum \u00a0\u00a0\u00a0\u00a0 wene ic swi\u00f0e,\n \u00fe\u00e6t ic \u00f0e on halgum \u00a0\u00a0\u00a0\u00a0 her \u00e6tywe,\n \u00fe\u00e6t ic \u00fein wuldur and m\u00e6gen \u00a0\u00a0\u00a0\u00a0 wis sceawige.\n Ys \u00fein milde mod \u00a0\u00a0\u00a0\u00a0 micele betere\n- 10\n- \n \u00feonne \u00feis l\u00e6ne lif \u00a0\u00a0\u00a0\u00a0 \u00fee we lifia\u00f0 on; \n weleras \u00f0e mine \u00a0\u00a0\u00a0\u00a0 wynnum heria\u00f0.\n Swa ic \u00f0e on minum life \u00a0\u00a0\u00a0\u00a0 lustum bletsige\n and ic on naman \u00feinum \u00a0\u00a0\u00a0\u00a0 neode swylce\n mine handa \u00fewea \u00a0\u00a0\u00a0\u00a0 halgum gelome.\n- 15\n- \n Ys sawl min \u00a0\u00a0\u00a0\u00a0 swetes gefylled, \n swa seo f\u00e6tte gelynd, \u00a0\u00a0\u00a0\u00a0 f\u00e6geres smeoruwes;\n weleras mine \u00a0\u00a0\u00a0\u00a0 wynnum swylce\n \u00feinne naman nu \u00f0a \u00a0\u00a0\u00a0\u00a0 neode heria\u00f0.\n Swa ic \u00fein gemynd \u00a0\u00a0\u00a0\u00a0 on modsefan\n- 20\n- \n on minre reste \u00a0\u00a0\u00a0\u00a0 rihte begange, \n and on \u00e6rmergen on \u00f0e \u00a0\u00a0\u00a0\u00a0 eac gewene,\n for\u00f0on \u00feu me on fultum \u00a0\u00a0\u00a0\u00a0 f\u00e6ste gestode.\n Ic beo f\u00e6gere be\u00feeaht \u00a0\u00a0\u00a0\u00a0 fi\u00f0erum \u00feinum\n and hiht on \u00f0on \u00a0\u00a0\u00a0\u00a0 h\u00e6bbe georne,\n- 25\n- \n for\u00f0on min sawl on \u00f0e \u00a0\u00a0\u00a0\u00a0 so\u00f0e getreowe\u00fe; \n me \u00f0in seo swi\u00f0re onfencg \u00a0\u00a0\u00a0\u00a0 symble \u00e6t \u00f0earfe.\n For\u00f0on hi on idel \u00a0\u00a0\u00a0\u00a0 ealle sy\u00f0\u00f0an\n sohton synlice \u00a0\u00a0\u00a0\u00a0 sawle mine,\n and geond eor\u00f0scr\u00e6fu \u00a0\u00a0\u00a0\u00a0 eodon geneahhe;\n- 30\n- \n nu hi w\u00e6ran geseald \u00a0\u00a0\u00a0\u00a0 under sweordes hand, \n syndon fracu\u00f0e nu \u00a0\u00a0\u00a0\u00a0 foxes d\u00e6las.\n Kynincg sceal on drihtne \u00a0\u00a0\u00a0\u00a0 cl\u00e6ne blisse\n hluttre habban, \u00a0\u00a0\u00a0\u00a0 and hine heria\u00f0 eac\n ealle \u00fea \u00f0e on hine \u00a0\u00a0\u00a0\u00a0 a\u00f0as sweria\u00f0;\n- 35\n- \n for\u00feon synt gemyrde \u00a0\u00a0\u00a0\u00a0 mu\u00f0as ealle \n \u00fea unriht spreca\u00f0 \u00a0\u00a0\u00a0\u00a0 ahw\u00e6r landes.","title":"The Paris Psalter: Psalm 62","type":"page"}