{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_65.htm","path":"neu/ascp/a05_65.htm","source_url":"https://sacred-texts.com/neu/ascp/a05_65.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 65\n Verse Indeterminate Saxon\n \n - \n Ealle eor\u00f0buend \u00a0\u00a0\u00a0\u00a0 ecne drihten \n wordum wislicum \u00a0\u00a0\u00a0\u00a0 wide herian,\n and his naman secgea\u00f0 \u00a0\u00a0\u00a0\u00a0 neode mid sealmum\n and him wuldres lof \u00a0\u00a0\u00a0\u00a0 wide sylla\u00f0.\n- 5\n- \n And gode secgea\u00f0, \u00a0\u00a0\u00a0\u00a0 hu his \u00fea goodan weorc \n syndon wundorlice \u00a0\u00a0\u00a0\u00a0 wide geond eor\u00f0an,\n and eac on menigeo \u00a0\u00a0\u00a0\u00a0 m\u00e6genes \u00feines\n \u00feine feondas \u00fee \u00a0\u00a0\u00a0\u00a0 f\u00e6cne leoga\u00f0.\n Geweor\u00f0ie \u00a0\u00a0\u00a0\u00a0 wuldres ealdor\n- 10\n- \n eall \u00f0eos eor\u00fee, \u00a0\u00a0\u00a0\u00a0 ecne drihten; \n and \u00fee singe eac, \u00a0\u00a0\u00a0\u00a0 secge geneahhie,\n \u00fe\u00e6t \u00fein nama is \u00a0\u00a0\u00a0\u00a0 ofer eall ni\u00f0a bearn\n se hehsta \u00a0\u00a0\u00a0\u00a0 h\u00e6le\u00fea cynnes.\n Cuma\u00f0 nu and geseo\u00f0, \u00a0\u00a0\u00a0\u00a0 hu cyme weorc\n- 15\n- \n drihten worhte; \u00a0\u00a0\u00a0\u00a0 synt his domas eac \n swi\u00fee egeslice \u00a0\u00a0\u00a0\u00a0 ofer eall ylda bearn.\n He m\u00e6g onwendan \u00a0\u00a0\u00a0\u00a0 w\u00e6tera \u00f0ry\u00f0e,\n \u00fe\u00e6t \u00feas deopan s\u00e6 \u00a0\u00a0\u00a0\u00a0 drige weor\u00f0a\u00f0,\n and \u00fea strangan m\u00e6g \u00a0\u00a0\u00a0\u00a0 streamas swylce\n- 20\n- \n gefeterian, \u00a0\u00a0\u00a0\u00a0 \u00fe\u00e6t \u00feu mid fote miht \n on treddian \u00a0\u00a0\u00a0\u00a0 eor\u00f0an gelice.\n His m\u00e6gen wealde\u00f0 \u00a0\u00a0\u00a0\u00a0 ofer eall manna cyn\n on ecnesse \u00a0\u00a0\u00a0\u00a0 awa to feore,\n and he ofer ealle \u00feeode \u00a0\u00a0\u00a0\u00a0 eagum wlite\u00f0;\n- 25\n- \n \u00fea hine on yrre \u00a0\u00a0\u00a0\u00a0 \u00e6ghw\u00e6r gebringa\u00f0, \n ne beo\u00f0 \u00fea on him sylfum \u00a0\u00a0\u00a0\u00a0 sy\u00f0\u00f0an ahafene.\n Bletsigen \u00feeoda \u00a0\u00a0\u00a0\u00a0 bli\u00f0e mode\n ealle eor\u00f0buend \u00a0\u00a0\u00a0\u00a0 ecne drihten\n and mid stefne lof \u00a0\u00a0\u00a0\u00a0 strang asecgean.\n- 30\n- \n He mine sawle \u00a0\u00a0\u00a0\u00a0 sette to life, \n ne l\u00e6te\u00f0 mine fet \u00a0\u00a0\u00a0\u00a0 la\u00f0e hreran.\n Ure costade god \u00a0\u00a0\u00a0\u00a0 cl\u00e6ne fyre\n so\u00f0e dome, \u00a0\u00a0\u00a0\u00a0 swa man seolfor de\u00f0,\n \u00feonne man hit aseo\u00f0e\u00f0 \u00a0\u00a0\u00a0\u00a0 swy\u00f0e mid fyre.\n- 35\n- \n \u00feu us on grame swylce \u00a0\u00a0\u00a0\u00a0 gryne gel\u00e6ddest, \n and us bealuwa fela \u00a0\u00a0\u00a0\u00a0 on b\u00e6ce stande\u00f0;\n settest us m\u00e6nige eac \u00a0\u00a0\u00a0\u00a0 men ofer heafod.\n We \u00feuruh fyr fara\u00f0 \u00a0\u00a0\u00a0\u00a0 and \u00feuruh floda \u00ferym,\n and \u00f0u us on colnesse \u00a0\u00a0\u00a0\u00a0 cl\u00e6ne gel\u00e6ddest.\n- 40\n- \n Ic on \u00fein hus \u00a0\u00a0\u00a0\u00a0 halig gange \n and \u00fe\u00e6r tidum \u00fee \u00a0\u00a0\u00a0\u00a0 tifer onsecge;\n \u00fe\u00e6r ic min gehat \u00a0\u00a0\u00a0\u00a0 mid hyge gylde,\n \u00fe\u00e6t mine weleras \u00e6r \u00a0\u00a0\u00a0\u00a0 wise ged\u00e6ldan.\n \u00feas ic mid mu\u00f0e aspr\u00e6c \u00a0\u00a0\u00a0\u00a0 mine \u00e6t \u00feearfe,\n- 45\n- \n \u00fe\u00e6r me costunge \u00a0\u00a0\u00a0\u00a0 cnyssedan geneahhe, \n \u00fe\u00e6t ic \u00f0e on tifrum \u00a0\u00a0\u00a0\u00a0 teala forgulde\n ealle \u00fea gehat, \u00a0\u00a0\u00a0\u00a0 \u00fee ic \u00e6fre her\n mid minum welerum \u00a0\u00a0\u00a0\u00a0 wis tod\u00e6lde.\n Gehyra\u00f0 me \u00a0\u00a0\u00a0\u00a0 and her cuma\u00f0;\n- 50\n- \n ic eow mid so\u00fee \u00a0\u00a0\u00a0\u00a0 secgean wylle, \n gif ge godes egesan \u00a0\u00a0\u00a0\u00a0 georne habba\u00f0,\n hu mycel he dyde \u00a0\u00a0\u00a0\u00a0 minre sawle.\n \u00feuruh his mihte ic \u00a0\u00a0\u00a0\u00a0 mu\u00f0e cleopige\n o\u00fe\u00fee mine tungan \u00a0\u00a0\u00a0\u00a0 tidum blissade.\n- 55\n- \n Gif ic me unrihtes oncneow \u00a0\u00a0\u00a0\u00a0 awiht on heortan, \n ne wite me \u00fe\u00e6t, \u00a0\u00a0\u00a0\u00a0 wealdend drihten.\n For\u00f0on me gehyrde \u00a0\u00a0\u00a0\u00a0 h\u00e6lend drihten,\n and minre stefne beheold \u00a0\u00a0\u00a0\u00a0 strange bene.\n Drihten si gebletsad, \u00a0\u00a0\u00a0\u00a0 \u00fee he ne dyde \u00e6fre\n- 60\n- \n nym\u00f0e he mine bene \u00a0\u00a0\u00a0\u00a0 bealde gehyrde, \n ne his milde mod \u00a0\u00a0\u00a0\u00a0 me dyde fremde.","title":"The Paris Psalter: Psalm 65","type":"page"}