{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_71.htm","path":"neu/ascp/a05_71.htm","source_url":"https://sacred-texts.com/neu/ascp/a05_71.htm","text":"Syle dom \u00feinne, drihten, kyninge;\nsuna cynincges syle, \u00fe\u00e6t he so\u00f0 healde.\nDem \u00feu \u00fein folc deore mid so\u00f0e,\nheald \u00feine \u00feearfan holde mid dome.\n5\nOnfon beorgas eac beorhtre sibbe\non \u00feinum folce f\u00e6gere blisse\nand geswyru eac so\u00feum d\u00e6dum.\nOn his so\u00f0f\u00e6stnesse swylce deme\u00f0\non folce fyrhte \u00feearfan,\n10\nswylce he \u00feearfena bearn \u00feriste h\u00e6le\u00f0.\nHe \u00fea hermcwe\u00f0end hyne\u00f0 and byge\u00f0,\nse mid sunnan wuna\u00f0 swylce mid monan,\n\u00feurh ealra worulda woruld wuna\u00f0 him ece.\nHe \u00feonne astige\u00f0, swa se stranga ren\n15\nfealle\u00f0 on flys her, and swa f\u00e6ger dropa\n\u00fee on \u00feas eor\u00f0an upon dreopa\u00f0.\nOn his agenum dagum ypped weor\u00f0e\u00fe\nsyb so\u00f0f\u00e6stnes swi\u00f0e genihtsum,\no\u00fe\u00fe\u00e6t by\u00f0 ahafen hluttor mona.\n20\nHe \u00feonne wealde\u00f0 wera cneorissum\nbe s\u00e6 tweonum, sidum ricum,\nand fram streamracum styre\u00f0 him eallum\no\u00fe \u00feysse eor\u00f0an utgem\u00e6ru. Hine Sigelwearas secea\u00f0 ealle\n25\nand his feondas foldan liccigea\u00f0.\nCuma\u00f0 of Tharsis tires eadige\nand of ealandum utan kynincgas;\n\u00fea him eardgyfu \u00e6\u00f0ele bringa\u00f0\nof Arabia, eac of Saba;\n30\nealle him leoda lacum cwema\u00f0.\nHine weor\u00f0ia\u00f0 worulde kyningas\n\u00fea on eor\u00f0wege ealle syndan;\nealle \u00feeoda hine weor\u00f0ia\u00f0 georne.\nFor\u00feon he alyse\u00f0 lungre \u00feearfan,\n35\n\u00fe\u00e6t him se welega ne m\u00e6g wiht onsittan,\nand \u00fe\u00e6ne w\u00e6dlan, \u00fee on worulde n\u00e6f\u00f0\nahw\u00e6r elles \u00e6nigne fultum.\nHe helpe\u00f0 \u00feearfan, swylce eac w\u00e6dlan,\nand he \u00feearfigendra sawla geh\u00e6le\u00f0.\n40\nHe of mansceatte and of mane eac\nsniome hiora sawle softe alysde;\nys his nama for him neode gebyrhted.\nHe lyfa\u00f0 leodum, him by\u00f0 lungre seald;\nof Arabia gold eorlas l\u00e6da\u00f0;\n45\nhine weor\u00feia\u00f0 wera cneoressa\nand hine ealne d\u00e6g eac bletsia\u00f0.\n\u00feonne \u00e6\u00f0ele getrym eor\u00f0an wearda\u00f0,\nbi\u00f0 se beorht ahafen ofer beorgas up;\nofer Libanum licgea\u00f0 his y\u00fea,\n50\nand on burgum beo\u00fe blostmum f\u00e6gere\nswa on eor\u00f0an heg ute on lande.\n\u00feonne by\u00f0 his nama ofer eall ni\u00f0a bearn\nand to widan feore weor\u00f0e\u00f0 gebletsod;\n\u00e6r sunnan his nama so\u00f0f\u00e6st stande\u00f0,\n55\nby\u00f0 his setl \u00e6r swylce \u00feonne mona.\nAnd him by\u00f0 eor\u00fean cynn eall gebletsad;\nealle hine \u00feeoda \u00feriste heria\u00f0.\nWese Israhela ece drihten\nand hiora sylfra god symble gebletsad,\n60\nse \u00fee wundor mycel wyrce\u00f0 ana;\nsi his mihta nama mode gebletsad\non ecnesse awa to worlde.\nAnd \u00feeos eor\u00f0e si eall gefylled,\n\u00feurh his wuldres miht. Wese swa, wese swa!","title":"The Paris Psalter: Psalm 71","type":"page"}