{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_74.htm","path":"neu/ascp/a05_74.htm","source_url":"https://sacred-texts.com/neu/ascp/a05_74.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 74\n Verse Indeterminate Saxon\n \n - \n We \u00fee andetta\u00f0, \u00a0\u00a0\u00a0\u00a0 ecne drihten, \n and \u00fee andetta\u00f0 \u00a0\u00a0\u00a0\u00a0 ealle \u00feeoda\n and naman \u00feinne \u00a0\u00a0\u00a0\u00a0 neode ciegen.\n Ic \u00fein wundur eall \u00a0\u00a0\u00a0\u00a0 wr\u00e6clic s\u00e6cge,\n- 5\n- \n swa ic f\u00e6stlicast m\u00e6g \u00a0\u00a0\u00a0\u00a0 befon wordum, \n and eac so\u00f0 \u00a0\u00a0\u00a0\u00a0 symble deme.\n Eor\u00f0e is gemolten \u00a0\u00a0\u00a0\u00a0 and hire eardend mid;\n ic \u00feonne hire swyre \u00a0\u00a0\u00a0\u00a0 symble getrymme.\n Ic to yflum cw\u00e6\u00f0 \u00a0\u00a0\u00a0\u00a0 oft nal\u00e6s seldan:\n- 10\n- \n \"Nelle ge unriht \u00a0\u00a0\u00a0\u00a0 \u00e6nig fremman \n and agyltan, \u00fe\u00e6t hi \u00a0\u00a0\u00a0\u00a0 ne gulpan \u00fe\u00e6s.\n Ne ahebba\u00f0 ge to hea \u00a0\u00a0\u00a0\u00a0 eowre hyge\u00feancas,\n ne ge wi\u00f0 gode \u00e6fre \u00a0\u00a0\u00a0\u00a0 gramword sprecan.\"\n For\u00feon eastan ne cyme\u00f0 \u00a0\u00a0\u00a0\u00a0 gumena \u00e6nig,\n- 15\n- \n ne of westwegum \u00a0\u00a0\u00a0\u00a0 wera cneorissa, \n ne of \u00feissum westum \u00a0\u00a0\u00a0\u00a0 widum morum;\n for\u00feon him is dema \u00a0\u00a0\u00a0\u00a0 drihten sylfa.\n Sumne he gehyne\u00f0, \u00a0\u00a0\u00a0\u00a0 sumne ahefe\u00f0 sniome;\n for\u00feon se wines steap \u00a0\u00a0\u00a0\u00a0 on waldendes handa\n- 20\n- \n f\u00e6gere gefylled is; \u00a0\u00a0\u00a0\u00a0 \u00fe\u00e6s onfeh\u00f0 \u00fee he ann. \n \u00feonne he of \u00feysum on \u00fe\u00e6t \u00a0\u00a0\u00a0\u00a0 \u00feonne oncerre\u00f0,\n nyle he \u00fea d\u00e6rstan him \u00a0\u00a0\u00a0\u00a0 don unbryce;\n for\u00feam sculon ealle \u00a0\u00a0\u00a0\u00a0 drincan synfulle,\n \u00fea on \u00feysse foldan \u00a0\u00a0\u00a0\u00a0 fyrene wyrcea\u00f0;\n- 25\n- \n ic \u00feonne worulde gefean \u00a0\u00a0\u00a0\u00a0 wynnum healde, \n and Iacobes gode \u00a0\u00a0\u00a0\u00a0 georne singe.\n Ealra fyrenfulra \u00a0\u00a0\u00a0\u00a0 fyhtehornas\n ic bealdlice \u00a0\u00a0\u00a0\u00a0 gebrece sniome;\n swy\u00fee beo\u00f0 ahafene \u00a0\u00a0\u00a0\u00a0 \u00fea so\u00f0f\u00e6stan.","title":"The Paris Psalter: Psalm 74","type":"page"}