{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_76.htm","path":"neu/ascp/a05_76.htm","source_url":"https://sacred-texts.com/neu/ascp/a05_76.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 76\n Verse Indeterminate Saxon\n \n - \n Ic mid stefne ongann \u00a0\u00a0\u00a0\u00a0 styrman to drihtne, \n and he me gehyrde \u00a0\u00a0\u00a0\u00a0 and beheold sona.\n Ic on earfo\u00f0d\u00e6ge \u00a0\u00a0\u00a0\u00a0 ecne drihten\n sohte mid handum \u00a0\u00a0\u00a0\u00a0 swy\u00fee geneahhe,\n- 5\n- \n and ic on niht for him \u00a0\u00a0\u00a0\u00a0 neode eode; \n n\u00e6s ic on \u00feam si\u00f0e \u00a0\u00a0\u00a0\u00a0 beswicen awiht.\n And ic swi\u00f0e wi\u00f0soc \u00a0\u00a0\u00a0\u00a0 sawle minre\n f\u00e6lre frofre; \u00a0\u00a0\u00a0\u00a0 \u00fea ic f\u00e6ste god\n gemyndgade, \u00a0\u00a0\u00a0\u00a0 \u00fe\u00e6r ic h\u00e6fde m\u00e6stne hiht.\n- 10\n- \n Swy\u00f0e ic begangen w\u00e6s \u00a0\u00a0\u00a0\u00a0 and min sylfes gast \n w\u00e6s hwonlice \u00a0\u00a0\u00a0\u00a0 ormod worden,\n w\u00e6ron eagan mine \u00a0\u00a0\u00a0\u00a0 eac mid w\u00e6cceum\n werded swy\u00fee; \u00a0\u00a0\u00a0\u00a0 ne spr\u00e6c ic worda feala.\n \u00fea ic ealde dagas \u00a0\u00a0\u00a0\u00a0 eft ge\u00feohte,\n- 15\n- \n h\u00e6fde me ece gear \u00a0\u00a0\u00a0\u00a0 ealle on mode. \n Ic \u00fea mid heortan ongann \u00a0\u00a0\u00a0\u00a0 hycggean nihtes;\n w\u00e6s min gast on me \u00a0\u00a0\u00a0\u00a0 georne gebysgad.\n \u00fea ic sylfa cw\u00e6\u00f0: \u00a0\u00a0\u00a0\u00a0 \"Ic to so\u00f0e wat,\n nele \u00feis ece god \u00a0\u00a0\u00a0\u00a0 \u00e6fre toweorpan\n- 20\n- \n ne us witnian \u00a0\u00a0\u00a0\u00a0 for his weld\u00e6dum, \n o\u00f0\u00f0e wi\u00fe ende \u00a0\u00a0\u00a0\u00a0 \u00e6fre to worulde\n his milde mod \u00a0\u00a0\u00a0\u00a0 mannum afyrran\n on woruldlife \u00a0\u00a0\u00a0\u00a0 wera cneorissum.\n Ne by\u00f0 \u00e6fre god \u00a0\u00a0\u00a0\u00a0 ungemyndig,\n- 25\n- \n \u00fe\u00e6t he miltsige \u00a0\u00a0\u00a0\u00a0 manna cynne, \n o\u00fe\u00fee on yrre \u00a0\u00a0\u00a0\u00a0 \u00e6fre wille\n his milde mod \u00a0\u00a0\u00a0\u00a0 mannum dyrnan.\"\n And ic selfa cw\u00e6\u00f0: \u00a0\u00a0\u00a0\u00a0 \"Nu ic sona ongann\n \u00feas geunwendnes \u00a0\u00a0\u00a0\u00a0 wenan \u00e6rest\n- 30\n- \n \u00feara hean handa \u00a0\u00a0\u00a0\u00a0 haligan drihtnes, \n weorca wr\u00e6clicra \u00a0\u00a0\u00a0\u00a0 worda gemyndig,\n \u00fe\u00e6t he \u00e6t fruman wundor \u00a0\u00a0\u00a0\u00a0 f\u00e6ger geworhte.\"\n \u00fea ic metegian ongan \u00a0\u00a0\u00a0\u00a0 m\u00e6nigra weorca,\n hu ic me on eallum \u00feam \u00a0\u00a0\u00a0\u00a0 ea\u00f0ust geheolde;\n- 35\n- \n on eallum \u00feinum weorcum \u00a0\u00a0\u00a0\u00a0 ic w\u00e6s smeagende, \n swylce ic on \u00feinum gehylde \u00a0\u00a0\u00a0\u00a0 sylf begangen.\n Ys weruda god \u00a0\u00a0\u00a0\u00a0 on wege halgum;\n hwylc is mihtig god \u00a0\u00a0\u00a0\u00a0 butan ure se m\u00e6ra god?\n \u00feu eart ana god, \u00a0\u00a0\u00a0\u00a0 \u00fee \u00e6ghwylc miht\n- 40\n- \n wundor gewyrcean \u00a0\u00a0\u00a0\u00a0 on woruldlife. \n Eft \u00feu \u00feine mihte \u00a0\u00a0\u00a0\u00a0 m\u00e6nige cy\u00f0dest\n folcum on foldan; \u00a0\u00a0\u00a0\u00a0 \u00feu wi\u00f0feredes eac\n Israhela bearn \u00a0\u00a0\u00a0\u00a0 of \u00e6gyptum.\n Hw\u00e6t, \u00fee, wuldres god, \u00a0\u00a0\u00a0\u00a0 w\u00e6ter sceawedon\n- 45\n- \n and \u00fee gesawon \u00a0\u00a0\u00a0\u00a0 sealte y\u00fea; \n forhte wurdan \u00a0\u00a0\u00a0\u00a0 flodas gedrefde,\n w\u00e6s sweg micel \u00a0\u00a0\u00a0\u00a0 sealtera w\u00e6tera.\n Sealdon weor\u00f0lice \u00a0\u00a0\u00a0\u00a0 wolcnas stefne\n \u00feurh \u00feine str\u00e6le \u00a0\u00a0\u00a0\u00a0 strange foran;\n- 50\n- \n w\u00e6s \u00feunurradstefn \u00a0\u00a0\u00a0\u00a0 strang on hweole. \n \u00feonne ligette \u00a0\u00a0\u00a0\u00a0 lixan cwoman,\n eall ymbhwyrft \u00a0\u00a0\u00a0\u00a0 eor\u00f0an onhrerdan.\n W\u00e6run wegas \u00feine \u00a0\u00a0\u00a0\u00a0 on widne s\u00e6\n and \u00feine stige \u00a0\u00a0\u00a0\u00a0 ofer strang w\u00e6ter;\n- 55\n- \n ne bi\u00f0 \u00fe\u00e6r e\u00fee \u00fein spor \u00a0\u00a0\u00a0\u00a0 on to findanne. \n Folc \u00fein \u00f0u feredest \u00a0\u00a0\u00a0\u00a0 swa f\u00e6le sceap\n \u00feurh Moyses \u00a0\u00a0\u00a0\u00a0 mihtige handa\n and Aarones \u00a0\u00a0\u00a0\u00a0 ealle gesunde.","title":"The Paris Psalter: Psalm 76","type":"page"}