{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_78.htm","path":"neu/ascp/a05_78.htm","source_url":"https://sacred-texts.com/neu/ascp/a05_78.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 78\n Verse Indeterminate Saxon\n \n - \n Comon on \u00f0in yrfe, \u00a0\u00a0\u00a0\u00a0 ece drihten, \n fremde \u00feeode, \u00a0\u00a0\u00a0\u00a0 \u00fea \u00fein f\u00e6le hus,\n ealh haligne \u00a0\u00a0\u00a0\u00a0 yfele gewemdan.\n Settan Hierusalem \u00a0\u00a0\u00a0\u00a0 samod anlicast\n- 5\n- \n swa in \u00e6ppelbearu \u00a0\u00a0\u00a0\u00a0 ane cytan; \n swylce hi setton \u00a0\u00a0\u00a0\u00a0 swylt \u00feinum esnum,\n sealdon fl\u00e6sc heora \u00a0\u00a0\u00a0\u00a0 fuglum to mose,\n haligra lic \u00a0\u00a0\u00a0\u00a0 hundum and deorum.\n Hi \u00feara bearna blod \u00a0\u00a0\u00a0\u00a0 on byrig leton\n- 10\n- \n swa man gute w\u00e6ter \u00a0\u00a0\u00a0\u00a0 ymb Hierusalem; \n blodige lagan, \u00a0\u00a0\u00a0\u00a0 nahtan byrgendas.\n We synd gewordene \u00a0\u00a0\u00a0\u00a0 wera cneorissum\n eallum edwitst\u00e6f \u00a0\u00a0\u00a0\u00a0 ymbsittendum,\n \u00fee us ahw\u00e6r neah \u00a0\u00a0\u00a0\u00a0 nu \u00f0a syndon.\n- 15\n- \n Hu wilt \u00feu, wuldres god, \u00a0\u00a0\u00a0\u00a0 wra\u00f0 yrre \u00fein \n on ende fram us \u00a0\u00a0\u00a0\u00a0 \u00e6fre oncyrran?\n Is nu onb\u00e6rned \u00a0\u00a0\u00a0\u00a0 biter \u00fein yrre\n on \u00f0inum folce \u00a0\u00a0\u00a0\u00a0 fyre hatre.\n Ageot yrre \u00fein \u00a0\u00a0\u00a0\u00a0 on \u00fe\u00e6t rice\n- 20\n- \n and on cneowmagas \u00a0\u00a0\u00a0\u00a0 \u00fee ne cunnan \u00f0e, \n ne naman \u00feinne \u00a0\u00a0\u00a0\u00a0 neode cigea\u00f0.\n For\u00feon hi Iacob \u00a0\u00a0\u00a0\u00a0 geara \u00e6tan,\n and his wicstede \u00a0\u00a0\u00a0\u00a0 westan gelome.\n Ne gemune \u00feu to oft, \u00a0\u00a0\u00a0\u00a0 mihta wealdend,\n- 25\n- \n ealdra unrihta \u00a0\u00a0\u00a0\u00a0 \u00fee we oft fremedon, \n ac we hra\u00f0e begytan \u00a0\u00a0\u00a0\u00a0 hyldo \u00f0ine,\n for\u00feon we \u00f0earfende \u00a0\u00a0\u00a0\u00a0 \u00feearle syndon.\n Gefultuma us, \u00a0\u00a0\u00a0\u00a0 frea \u00e6lmihtig,\n and alys us, \u00a0\u00a0\u00a0\u00a0 lifigende god;\n- 30\n- \n weor\u00f0 urum synnum \u00a0\u00a0\u00a0\u00a0 sefte and milde \n for naman \u00feinum \u00a0\u00a0\u00a0\u00a0 neode and aare.\n \u00fey l\u00e6s \u00e6fre cwe\u00f0an \u00a0\u00a0\u00a0\u00a0 o\u00f0re \u00feeoda,\n h\u00e6\u00f0ene herigeas, \u00a0\u00a0\u00a0\u00a0 \"Hw\u00e6r com eower halig god?\"\n and us \u00fe\u00e6t on eagum \u00a0\u00a0\u00a0\u00a0 oftust worpen,\n- 35\n- \n \u00fe\u00e6r manna wese \u00a0\u00a0\u00a0\u00a0 m\u00e6st \u00e6tg\u00e6dere. \n Wrec agen blod \u00a0\u00a0\u00a0\u00a0 esna \u00feinra,\n \u00fe\u00e6t w\u00e6s sarlice agoten, \u00a0\u00a0\u00a0\u00a0 \u00fe\u00e6r \u00feu gesawe to;\n geonge for \u00f0e \u00a0\u00a0\u00a0\u00a0 gnornendra care\n \u00feara \u00fee on feterum \u00a0\u00a0\u00a0\u00a0 f\u00e6ste w\u00e6ran.\n- 40\n- \n \u00e6fter \u00f0ines earmes \u00a0\u00a0\u00a0\u00a0 \u00e6\u00f0elum m\u00e6gene \n gegang \u00fea dea\u00f0a bearn \u00a0\u00a0\u00a0\u00a0 \u00fee hi dema\u00f0 nu.\n Gyld nu gramhydigum, \u00a0\u00a0\u00a0\u00a0 swa hi geearnedan,\n on sceat hiora \u00a0\u00a0\u00a0\u00a0 seofonfealde wrace,\n for\u00feon hi edwit on \u00fee \u00a0\u00a0\u00a0\u00a0 ealle h\u00e6fdon.\n- 45\n- \n We \u00fein folc w\u00e6run \u00a0\u00a0\u00a0\u00a0 and f\u00e6le sceap \n eowdes \u00feines; \u00a0\u00a0\u00a0\u00a0 we \u00f0e andetta\u00f0,\n and \u00fee to worulde \u00a0\u00a0\u00a0\u00a0 wuldur s\u00e6cgea\u00f0\n and \u00fee on worulda woruld \u00a0\u00a0\u00a0\u00a0 wordum heria\u00f0.","title":"The Paris Psalter: Psalm 78","type":"page"}