{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_82.htm","path":"neu/ascp/a05_82.htm","source_url":"https://sacred-texts.com/neu/ascp/a05_82.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 82\n Verse Indeterminate Saxon\n \n - \n Hwylc is \u00fee gelic, \u00a0\u00a0\u00a0\u00a0 ece drihten? \n Ne swiga \u00f0u, \u00a0\u00a0\u00a0\u00a0 ne \u00fee sylfne bewere.\n For\u00feon \u00feine feond \u00a0\u00a0\u00a0\u00a0 f\u00e6cne forwurdan,\n \u00fea \u00f0e f\u00e6ste \u00e6r \u00a0\u00a0\u00a0\u00a0 feodan, drihten,\n- 5\n- \n and heora heafod wi\u00f0 \u00fee \u00a0\u00a0\u00a0\u00a0 hofan swi\u00f0e. \n Hi on \u00f0inum folce him \u00a0\u00a0\u00a0\u00a0 facengeswipere\n syredan and feredan, \u00a0\u00a0\u00a0\u00a0 and to swice hogedon,\n and ehtunga \u00a0\u00a0\u00a0\u00a0 ealle h\u00e6fdon,\n hu hi \u00feine halgan \u00a0\u00a0\u00a0\u00a0 her yfeladan.\n- 10\n- \n Cw\u00e6dan cu\u00f0lice: \u00a0\u00a0\u00a0\u00a0 \"Wutun cuman ealle \n and hi towyrpan \u00a0\u00a0\u00a0\u00a0 geond wer\u00feeoda,\n \u00fe\u00e6t ne sy gemyndig \u00a0\u00a0\u00a0\u00a0 manna \u00e6nig,\n hu Israhela naman \u00a0\u00a0\u00a0\u00a0 \u00e6nig nemne.\"\n For\u00feon hi an ge\u00feeaht \u00a0\u00a0\u00a0\u00a0 ealle ymbs\u00e6tan,\n- 15\n- \n and gewitnesse wi\u00f0 \u00fee \u00a0\u00a0\u00a0\u00a0 wise gesettan. \n Selegesceotu synd \u00a0\u00a0\u00a0\u00a0 ons\u00e6gd in Idumea\n and Ism\u00e6helita, \u00a0\u00a0\u00a0\u00a0 eac synt Moabes,\n Ammon and Ammalech, \u00a0\u00a0\u00a0\u00a0 Agareni,\n swylce Gebal \u00a0\u00a0\u00a0\u00a0 and grame manige\n- 20\n- \n fremde \u00feeoda mid eardiendum \u00a0\u00a0\u00a0\u00a0 folce on Tyrum. \n Cwom samod mid \u00f0am \u00a0\u00a0\u00a0\u00a0 swylce Assur;\n ealle on wegum \u00a0\u00a0\u00a0\u00a0 \u00e6ghw\u00e6r syndon\n on leodstefnum \u00a0\u00a0\u00a0\u00a0 Lo\u00f0es bearnum.\n Do him nu swa \u00f0u dydest \u00a0\u00a0\u00a0\u00a0 dagum Madiane\n- 25\n- \n and Sisare, \u00a0\u00a0\u00a0\u00a0 swylce Iabin; \n ealle \u00fea namon \u00a0\u00a0\u00a0\u00a0 \u00e6ndor wylle\n and Cisone \u00a0\u00a0\u00a0\u00a0 cl\u00e6ne hlimme;\n wurdan \u00fea earme \u00a0\u00a0\u00a0\u00a0 eor\u00fean to meohxe.\n Sete heora ealdormenn \u00a0\u00a0\u00a0\u00a0 swa \u00f0u Oreb dydest,\n- 30\n- \n Zeb and Zebee \u00a0\u00a0\u00a0\u00a0 and Salmanaa, \n and heora ealdrum \u00a0\u00a0\u00a0\u00a0 eallum swylce;\n ealle \u00fea on an \u00a0\u00a0\u00a0\u00a0 \u00e6r gecw\u00e6don,\n \u00fe\u00e6t hi halignesse godes \u00a0\u00a0\u00a0\u00a0 her gesettan.\n Sete hi nu, min god, \u00a0\u00a0\u00a0\u00a0 samod anlice\n- 35\n- \n swa se w\u00e6gnes hweol \u00a0\u00a0\u00a0\u00a0 o\u00fe\u00fee windes healm, \n and swa f\u00e6rincga \u00a0\u00a0\u00a0\u00a0 fyr wudu byrne\u00f0,\n o\u00f0\u00f0e swa lig frete\u00f0 \u00a0\u00a0\u00a0\u00a0 lungre morh\u00e6\u00f0,\n Swa \u00feu hi on yrre \u00a0\u00a0\u00a0\u00a0 ehtest and drefest,\n \u00fe\u00e6t hi on hrernesse \u00a0\u00a0\u00a0\u00a0 hra\u00fee forweor\u00f0a\u00f0.\n- 40\n- \n Gedo \u00fe\u00e6t hiora ansyn \u00a0\u00a0\u00a0\u00a0 awa sceamige, \n \u00feonne hi naman \u00feinne \u00a0\u00a0\u00a0\u00a0 neode secea\u00f0.\n Ealle beo\u00f0 georette, \u00a0\u00a0\u00a0\u00a0 eac gescende,\n and on weoruldlife \u00a0\u00a0\u00a0\u00a0 weor\u00fea\u00f0 gedrefde,\n \u00feonne hi naman \u00feinne \u00a0\u00a0\u00a0\u00a0 neode secea\u00f0.\n- 45\n- \n \u00feu ana eart \u00a0\u00a0\u00a0\u00a0 ofer ealle heah \n eor\u00f0buende, \u00a0\u00a0\u00a0\u00a0 ece drihten.","title":"The Paris Psalter: Psalm 82","type":"page"}