{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_85.htm","path":"neu/ascp/a05_85.htm","source_url":"https://sacred-texts.com/neu/ascp/a05_85.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 85\n Verse Indeterminate Saxon\n \n - \n Ahyld me \u00fein eare, \u00a0\u00a0\u00a0\u00a0 halig drihten; \n for\u00f0on ic eom w\u00e6dla, \u00a0\u00a0\u00a0\u00a0 \u00feu me wel gehyr,\n and ic sylfa eom \u00a0\u00a0\u00a0\u00a0 sorhfull \u00feearfa.\n Geheald mine sawle, \u00a0\u00a0\u00a0\u00a0 for\u00f0on ic halig eom;\n- 5\n- \n h\u00e6l \u00feinne scealc, \u00a0\u00a0\u00a0\u00a0 for\u00feon ic \u00f0e hihte to. \n Miltsa me drihten, \u00a0\u00a0\u00a0\u00a0 \u00feonne ic m\u00e6gene to \u00f0e\n \u00feurh ealne d\u00e6g \u00a0\u00a0\u00a0\u00a0 elne cleopade;\n do \u00feines scealces \u00a0\u00a0\u00a0\u00a0 sawle bli\u00f0e,\n for\u00f0on ic hi to \u00f0e \u00a0\u00a0\u00a0\u00a0 hebbe genehhige.\n- 10\n- \n For\u00f0on \u00feu eart wynsum, \u00a0\u00a0\u00a0\u00a0 wealdend drihten; \n is \u00fein milde mod \u00a0\u00a0\u00a0\u00a0 mycel and genihtsum\n eallum \u00feam \u00fee \u00fee \u00a0\u00a0\u00a0\u00a0 elne cigea\u00f0.\n \u00feu mid earum onfoh, \u00a0\u00a0\u00a0\u00a0 ece drihten,\n min agen gebed, \u00a0\u00a0\u00a0\u00a0 and eac beheald,\n- 15\n- \n hu ic stefne to \u00f0e \u00a0\u00a0\u00a0\u00a0 stundum cleopige. \n \u00feonne me on d\u00e6ge \u00a0\u00a0\u00a0\u00a0 deorc earfo\u00f0e\n carelice cnyssedan, \u00a0\u00a0\u00a0\u00a0 \u00feonne ic cleopode to \u00f0e;\n for\u00feon \u00feu me gehyrdest \u00a0\u00a0\u00a0\u00a0 holde mode.\n Nis \u00fee goda \u00e6nig \u00a0\u00a0\u00a0\u00a0 on gumrice\n- 20\n- \n ahw\u00e6r efne gelic, \u00a0\u00a0\u00a0\u00a0 ece drihten, \n ne \u00f0e weorc magon \u00a0\u00a0\u00a0\u00a0 wyrcean anlic.\n Ealle \u00feu geworhtest \u00a0\u00a0\u00a0\u00a0 wera cneorissa,\n \u00fea \u00fee weor\u00f0ia\u00f0, \u00a0\u00a0\u00a0\u00a0 wuldres aldor,\n and naman drihtnes \u00a0\u00a0\u00a0\u00a0 neode cigea\u00f0.\n- 25\n- \n For\u00f0an \u00f0u eart se mycla \u00a0\u00a0\u00a0\u00a0 mihtiga drihten, \n \u00fee wundor miht \u00a0\u00a0\u00a0\u00a0 wyrcean ana.\n Gel\u00e6d, drihten, me \u00a0\u00a0\u00a0\u00a0 on \u00feinne leofne weg,\n and ic on \u00feinum so\u00f0e \u00a0\u00a0\u00a0\u00a0 sy\u00fe\u00fean gancge.\n Heorte min ahlyhhe\u00f0, \u00a0\u00a0\u00a0\u00a0 \u00feonne ic \u00f0inne halgan naman\n- 30\n- \n forhtige me on ferh\u00f0e, \u00a0\u00a0\u00a0\u00a0 for\u00f0 andette \n mid ealre heortan hyge, \u00a0\u00a0\u00a0\u00a0 \u00fe\u00e6t \u00feu eart, halig god,\n nemned drihten, \u00a0\u00a0\u00a0\u00a0 and we naman \u00feinne\n on ecnesse \u00a0\u00a0\u00a0\u00a0 a weor\u00f0ien.\n Ys \u00fein mildheortnes mycel \u00a0\u00a0\u00a0\u00a0 ofer me, drihten,\n- 35\n- \n and \u00feu mine sawle \u00a0\u00a0\u00a0\u00a0 swylce alysdest \n of helwarena \u00a0\u00a0\u00a0\u00a0 hinder\u00feeostrum.\n God min se leofa, \u00a0\u00a0\u00a0\u00a0 gramhydige me\n mid unrihte \u00a0\u00a0\u00a0\u00a0 oft onginna\u00f0,\n and gesamnincge \u00a0\u00a0\u00a0\u00a0 swi\u00f0mihtigra\n- 40\n- \n sohton mine sawle \u00a0\u00a0\u00a0\u00a0 swy\u00fee geneahhe; \n ne do\u00f0 him for awiht \u00a0\u00a0\u00a0\u00a0 egsan drihtnes.\n Hw\u00e6t, \u00feu eart, min drihten god, \u00a0\u00a0\u00a0\u00a0 d\u00e6dum mildheort,\n \u00feenden ge\u00f0yldig, \u00a0\u00a0\u00a0\u00a0 \u00feearle so\u00f0f\u00e6st.\n Beseoh nu on me, \u00a0\u00a0\u00a0\u00a0 and me sy\u00fe\u00fean weor\u00f0\n- 45\n- \n milde on mode, \u00a0\u00a0\u00a0\u00a0 mihtig drihten; \n geteoh hrore meaht \u00a0\u00a0\u00a0\u00a0 hysse \u00feinum;\n do \u00feinre \u00feeowan sunu, \u00a0\u00a0\u00a0\u00a0 drihten, halne.\n Do gedefe mid me, \u00a0\u00a0\u00a0\u00a0 drihten, tacen,\n and \u00fe\u00e6t god ongitan, \u00a0\u00a0\u00a0\u00a0 \u00fea me georne \u00e6r\n- 50\n- \n f\u00e6ste feodan, \u00a0\u00a0\u00a0\u00a0 habban for\u00f0 sceame. \n For\u00feon \u00feu me w\u00e6re fultum \u00a0\u00a0\u00a0\u00a0 f\u00e6ste, drihten,\n and me frefredest, \u00a0\u00a0\u00a0\u00a0 frea \u00e6lmihtig.","title":"The Paris Psalter: Psalm 85","type":"page"}