{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_89.htm","path":"neu/ascp/a05_89.htm","source_url":"https://sacred-texts.com/neu/ascp/a05_89.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 89\n Verse Indeterminate Saxon\n \n - \n \u00feu eart fri\u00f0stol us \u00a0\u00a0\u00a0\u00a0 f\u00e6ste, drihten, \n of cynne on cynne \u00a0\u00a0\u00a0\u00a0 and on cneorisse.\n \u00e6r\u00f0on munta gesceaft \u00a0\u00a0\u00a0\u00a0 ofer middangeard\n o\u00f0\u00f0e ymbhwyrft \u00a0\u00a0\u00a0\u00a0 eor\u00f0an w\u00e6re\n- 5\n- \n o\u00fe\u00fee world w\u00e6re, \u00a0\u00a0\u00a0\u00a0 \u00feu eart, wuldres god. \n Ne ahwyrf \u00feu fram m\u00e6nn \u00a0\u00a0\u00a0\u00a0 heah eadmedu;\n and \u00feu cu\u00f0lice \u00a0\u00a0\u00a0\u00a0 cw\u00e6de sylfa:\n \"Ic manna bearnum \u00a0\u00a0\u00a0\u00a0 mod onwende.\"\n For \u00feinum eagum, \u00a0\u00a0\u00a0\u00a0 ece drihten,\n- 10\n- \n \u00feusend wintra bi\u00f0 \u00a0\u00a0\u00a0\u00a0 \u00feon anlicast, \n swa geostran d\u00e6g \u00a0\u00a0\u00a0\u00a0 gegan w\u00e6re;\n And swa hi on niht hyrdnesse \u00a0\u00a0\u00a0\u00a0 neode beganga\u00f0,\n ne heora winterrim \u00a0\u00a0\u00a0\u00a0 for wiht ne do\u00f0.\n Morgen gewite\u00f0 \u00a0\u00a0\u00a0\u00a0 swa gemolsnad wyrt;\n- 15\n- \n o\u00f0re morgene \u00a0\u00a0\u00a0\u00a0 eft geblowe\u00f0 \n and geefne\u00f0 swa, \u00a0\u00a0\u00a0\u00a0 o\u00fe\u00fe\u00e6t \u00e6fen cyme\u00f0,\n \u00feonne forwisna\u00f0, \u00a0\u00a0\u00a0\u00a0 weor\u00f0e\u00f0 to duste.\n For\u00feon we on \u00feinum yrre \u00a0\u00a0\u00a0\u00a0 ealle forwurdon,\n w\u00e6ron on \u00feinum hathige \u00a0\u00a0\u00a0\u00a0 hearde gedrefde.\n- 20\n- \n \u00feu ure unriht \u00a0\u00a0\u00a0\u00a0 eall asettest, \n \u00fe\u00e6r \u00feu sylfa \u00a0\u00a0\u00a0\u00a0 to eagum locadest,\n and ure worulde \u00feu \u00a0\u00a0\u00a0\u00a0 eac gesta\u00f0elodest\n on alihtincge \u00a0\u00a0\u00a0\u00a0 andwlitan \u00feines.\n For\u00feam \u00f0e ure dagas \u00a0\u00a0\u00a0\u00a0 ealle geteorudun,\n- 25\n- \n and we on \u00feinum yrre synt \u00a0\u00a0\u00a0\u00a0 swi\u00f0e gew\u00e6hte. \n W\u00e6ran anlicast \u00a0\u00a0\u00a0\u00a0 ure winter\n geongewifran, \u00a0\u00a0\u00a0\u00a0 \u00feonne hio geornast bi\u00f0,\n \u00fe\u00e6t heo af\u00e6re \u00a0\u00a0\u00a0\u00a0 fleogan on nette;\n beo\u00f0 ure geardagas \u00a0\u00a0\u00a0\u00a0 gnornscendende,\n- 30\n- \n \u00feeah \u00fee heora hundred seo \u00a0\u00a0\u00a0\u00a0 samod \u00e6tg\u00e6dere. \n Gif on mihtigum \u00a0\u00a0\u00a0\u00a0 mannum geweor\u00f0e\u00f0,\n \u00fe\u00e6t hi hundehtatig \u00a0\u00a0\u00a0\u00a0 ylda gebiden,\n ealle \u00fee \u00fe\u00e6r ofer beo\u00f0 \u00a0\u00a0\u00a0\u00a0 \u00e6fre getealde\n wintra on worulde, \u00a0\u00a0\u00a0\u00a0 \u00fea beo\u00f0 gewinn and sar.\n- 35\n- \n Us man\u00f0w\u00e6rnes becwom \u00a0\u00a0\u00a0\u00a0 micel ofer ealle \n and we on \u00feam gefean \u00a0\u00a0\u00a0\u00a0 forhte gewurdan.\n Hwa \u00f0\u00e6s so\u00f0 me cann \u00a0\u00a0\u00a0\u00a0 s\u00e6cgean \u00e6nig,\n hu \u00feines yrres \u00a0\u00a0\u00a0\u00a0 egsa stande\u00f0\n and seo micle miht? \u00a0\u00a0\u00a0\u00a0 Nis \u00fe\u00e6t mann \u00e6nig\n- 40\n- \n \u00fee \u00fea ariman \u00a0\u00a0\u00a0\u00a0 rihte cunne. \n Do us \u00fea \u00feine swi\u00f0ran hand, \u00a0\u00a0\u00a0\u00a0 drihten, cu\u00f0e,\n \u00feam \u00fee on snytrum syn \u00a0\u00a0\u00a0\u00a0 swy\u00f0e getyde,\n and \u00fea heora heortan \u00a0\u00a0\u00a0\u00a0 healda\u00f0 cl\u00e6ne.\n Gehweorf us hw\u00e6thwiga, \u00a0\u00a0\u00a0\u00a0 halig drihten;\n- 45\n- \n wes \u00feinum scealcum \u00a0\u00a0\u00a0\u00a0 wel ea\u00f0bede. \n We synd gefyllede \u00a0\u00a0\u00a0\u00a0 f\u00e6gere on mergenne\n \u00feinre mildheortnesse; \u00a0\u00a0\u00a0\u00a0 \u00fe\u00e6s we on mode nu\n habba\u00f0 ealle dagas \u00a0\u00a0\u00a0\u00a0 \u00e6\u00feele blisse.\n We gefeo\u00f0 swylce \u00a0\u00a0\u00a0\u00a0 for \u00feon f\u00e6gerum dagum,\n- 50\n- \n on \u00feam \u00feu us to eadmedum \u00a0\u00a0\u00a0\u00a0 ealle gebrohtest, \n and for \u00f0am gearum \u00fee we on gesawon \u00a0\u00a0\u00a0\u00a0 yfela feala.\n Beseoh on \u00feine scealcas \u00a0\u00a0\u00a0\u00a0 sw\u00e6sum eagum\n and on \u00fein agen weorc, \u00a0\u00a0\u00a0\u00a0 ece drihten,\n and heora bearn gerece \u00a0\u00a0\u00a0\u00a0 bli\u00f0e mode.\n- 55\n- \n Wese us beorhtnes ofer \u00a0\u00a0\u00a0\u00a0 bli\u00f0an drihtnes, \n ures \u00fe\u00e6s godan godes \u00a0\u00a0\u00a0\u00a0 georne ofer ealle;\n gerece ure handgeweorc \u00a0\u00a0\u00a0\u00a0 heah ofer usic.","title":"The Paris Psalter: Psalm 89","type":"page"}