{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_90.htm","path":"neu/ascp/a05_90.htm","source_url":"https://sacred-texts.com/neu/ascp/a05_90.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 90\n Verse Indeterminate Saxon\n \n - \n Me earda\u00f0 \u00e6t \u00a0\u00a0\u00a0\u00a0 \u00e6\u00feele fultum \n \u00fe\u00e6s hehstan \u00a0\u00a0\u00a0\u00a0 heofonrices weard,\n \u00fee me \u00e6t wuna\u00f0 \u00a0\u00a0\u00a0\u00a0 awa to feore.\n Ic to drihtne cw\u00e6\u00f0: \u00a0\u00a0\u00a0\u00a0 \"\u00feu me dyre eart\n- 5\n- \n f\u00e6le fultum; \u00a0\u00a0\u00a0\u00a0 h\u00e6bbe ic freond on him, \n min se goda god, \u00a0\u00a0\u00a0\u00a0 and ic on \u00f0e geare hycge.\"\n For\u00f0on he me alysde \u00a0\u00a0\u00a0\u00a0 of la\u00f0um grine,\n huntum unholdum, \u00a0\u00a0\u00a0\u00a0 hearmum worde.\n He me mid his gesculdrum \u00a0\u00a0\u00a0\u00a0 sceade be\u00feeahte;\n- 10\n- \n for\u00feon ic under fi\u00f0rum \u00a0\u00a0\u00a0\u00a0 f\u00e6le hihte. \n Hw\u00e6t, me so\u00f0f\u00e6stnes min \u00a0\u00a0\u00a0\u00a0 scylde wi\u00f0 feondum,\n ne \u00f0u \u00fee nihtegsan \u00a0\u00a0\u00a0\u00a0 nede ondr\u00e6dest.\n Ne forhtast \u00feu \u00f0e on d\u00e6ge \u00a0\u00a0\u00a0\u00a0 flan on lyfte,\n \u00fe\u00e6t \u00fee \u00feurhgangan \u00a0\u00a0\u00a0\u00a0 garas on \u00f0eostrum,\n- 15\n- \n o\u00f0\u00f0e on midne d\u00e6g \u00a0\u00a0\u00a0\u00a0 m\u00e6re deoful. \n Fealle\u00f0 \u00fee on \u00fea wynstran \u00a0\u00a0\u00a0\u00a0 wergra \u00feusend,\n and eac geteledra \u00a0\u00a0\u00a0\u00a0 tyn \u00feusendo\n on \u00feine \u00fea swi\u00f0ran, \u00a0\u00a0\u00a0\u00a0 and \u00fee ne scea\u00f0e\u00f0 \u00e6nig.\n Hw\u00e6\u00f0ere \u00feu \u00f0\u00e6s eagan \u00a0\u00a0\u00a0\u00a0 eall sceawadest,\n- 20\n- \n gesege fyrenfulra \u00a0\u00a0\u00a0\u00a0 frecne wite. \n \u00feu me eart se hehsta hyht, \u00a0\u00a0\u00a0\u00a0 halig drihten;\n \u00feu me fri\u00f0stol on \u00f0e \u00a0\u00a0\u00a0\u00a0 f\u00e6stne settest.\n Ne m\u00e6g \u00fee \u00e6nig yfel \u00a0\u00a0\u00a0\u00a0 egle weor\u00f0an,\n ne heard sweopu \u00a0\u00a0\u00a0\u00a0 huse \u00feinum\n- 25\n- \n on neaweste \u00a0\u00a0\u00a0\u00a0 nahw\u00e6r sce\u00fe\u00fean. \n For\u00feon he his englum bebead, \u00a0\u00a0\u00a0\u00a0 \u00fe\u00e6t hi mid earmum \u00fee\n on heora handum \u00a0\u00a0\u00a0\u00a0 heoldan georne,\n \u00fe\u00e6t \u00feu wilwega \u00a0\u00a0\u00a0\u00a0 wealdan mostest.\n And \u00fee on folmum \u00a0\u00a0\u00a0\u00a0 feredan swylce,\n- 30\n- \n \u00fee l\u00e6s \u00feu fr\u00e6cne on stan \u00a0\u00a0\u00a0\u00a0 fote spurne. \n \u00feu ofer aspide miht \u00a0\u00a0\u00a0\u00a0 ea\u00f0e gangan,\n and bealde nu \u00a0\u00a0\u00a0\u00a0 basiliscan tredan,\n and leon and dracan \u00a0\u00a0\u00a0\u00a0 liste gebygean.\n For\u00f0on he hyhte to me, \u00a0\u00a0\u00a0\u00a0 ic hine hra\u00f0e lyse,\n- 35\n- \n niode hine scylde, \u00a0\u00a0\u00a0\u00a0 nu he cu\u00f0e naman minne. \n He cigde me, \u00a0\u00a0\u00a0\u00a0 and ic hine cu\u00f0lice\n hold gehyrde, \u00a0\u00a0\u00a0\u00a0 and hine hra\u00f0e sy\u00fe\u00fean\n of earfo\u00feum \u00a0\u00a0\u00a0\u00a0 ut alysde.\n Ic hine generige \u00a0\u00a0\u00a0\u00a0 and his naman swylce\n- 40\n- \n gewuldrige \u00a0\u00a0\u00a0\u00a0 geond ealle wer\u00f0eoda, \n and him lifdagas \u00a0\u00a0\u00a0\u00a0 lange sylle,\n swylce him mine h\u00e6lu \u00a0\u00a0\u00a0\u00a0 holde \u00e6tywe.","title":"The Paris Psalter: Psalm 90","type":"page"}