{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_94.htm","path":"neu/ascp/a05_94.htm","source_url":"https://sacred-texts.com/neu/ascp/a05_94.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 94\n Verse Indeterminate Saxon\n \n - \n Cuma\u00f0 nu tog\u00e6dere, \u00a0\u00a0\u00a0\u00a0 wutun cweman gode, \n wynnum drihten \u00a0\u00a0\u00a0\u00a0 wealdend herigean,\n urum h\u00e6lende \u00a0\u00a0\u00a0\u00a0 hyldo gebeodan.\n Wutun his ansyne \u00a0\u00a0\u00a0\u00a0 \u00e6rest secean,\n- 5\n- \n \u00fe\u00e6t we andettan \u00a0\u00a0\u00a0\u00a0 ure fyrene \n and we sealmas him \u00a0\u00a0\u00a0\u00a0 singan mid wynne.\n For\u00f0on is se micla god \u00a0\u00a0\u00a0\u00a0 mihtig drihten\n and se micla cynincg \u00a0\u00a0\u00a0\u00a0 ofer eall manna godu.\n For\u00f0on ne wi\u00f0drife\u00f0 \u00a0\u00a0\u00a0\u00a0 drihten usser\n- 10\n- \n his agen folc \u00a0\u00a0\u00a0\u00a0 \u00e6fre \u00e6t \u00feearfe; \n he \u00feas heahbeorgas \u00a0\u00a0\u00a0\u00a0 healde\u00f0 swylce.\n Eac he s\u00e6s wealde\u00f0 \u00a0\u00a0\u00a0\u00a0 and he sette \u00feone;\n worhte his folme eac \u00a0\u00a0\u00a0\u00a0 foldan drige.\n Cuma\u00f0 him fore \u00a0\u00a0\u00a0\u00a0 and cneow bigea\u00f0\n- 15\n- \n on ansyne \u00a0\u00a0\u00a0\u00a0 ures drihtnes, \n and him wepan fore \u00a0\u00a0\u00a0\u00a0 \u00f0e us worhte \u00e6r.\n For\u00f0on he is drihten god, \u00a0\u00a0\u00a0\u00a0 dema usser;\n w\u00e6run we his f\u00e6le folc \u00a0\u00a0\u00a0\u00a0 and his f\u00e6gere sceap,\n \u00fea he on his edisce \u00a0\u00a0\u00a0\u00a0 \u00e6r afedde.\n- 20\n- \n Gif ge to d\u00e6ge \u00a0\u00a0\u00a0\u00a0 drihtnes stefne \n holde gehyran, \u00a0\u00a0\u00a0\u00a0 n\u00e6fre ge heortan ge\u00feanc\n deorce forhyrden \u00a0\u00a0\u00a0\u00a0 drihtnes willan.\n Swa on grimnesse \u00a0\u00a0\u00a0\u00a0 fyrn geara dydan\n on \u00feam wra\u00f0an d\u00e6ge \u00a0\u00a0\u00a0\u00a0 and on westenne,\n- 25\n- \n \u00fe\u00e6r min \u00f0urh facen \u00a0\u00a0\u00a0\u00a0 f\u00e6deras eowre \n \u00feisse cneorisse \u00a0\u00a0\u00a0\u00a0 cunnedan georne,\n \u00fe\u00e6r hi cunnedan, \u00a0\u00a0\u00a0\u00a0 cu\u00f0 ongeaton\n and min sylfes weorc \u00a0\u00a0\u00a0\u00a0 gesawon mid eagum.\n Nu ic feowertig \u00a0\u00a0\u00a0\u00a0 folce \u00feyssum\n- 30\n- \n wintra rimes \u00a0\u00a0\u00a0\u00a0 wunade neah, \n aa and symble cw\u00e6\u00f0 \u00a0\u00a0\u00a0\u00a0 and eac swa oncneow,\n \u00fe\u00e6t hi on heortan \u00a0\u00a0\u00a0\u00a0 hyge dysegedan.\n Hi wegas mine \u00a0\u00a0\u00a0\u00a0 wihte ne oncneowan,\n \u00fe\u00e6t ic \u00e6r on yrre \u00a0\u00a0\u00a0\u00a0 a\u00f0e benemde,\n- 35\n- \n gif hi on mine reste \u00a0\u00a0\u00a0\u00a0 ricene eodon.","title":"The Paris Psalter: Psalm 94","type":"page"}