{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_95.htm","path":"neu/ascp/a05_95.htm","source_url":"https://sacred-texts.com/neu/ascp/a05_95.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Paris Psalter: Psalm 95\n Verse Indeterminate Saxon\n \n - \n Singa\u00f0 nu drihtne \u00a0\u00a0\u00a0\u00a0 sangas neowe; \n singe \u00feeos eor\u00f0e eall \u00a0\u00a0\u00a0\u00a0 eceum drihtne.\n Singa\u00f0 nu drihtne, \u00a0\u00a0\u00a0\u00a0 and his so\u00f0ne naman\n bealde bletsia\u00f0; \u00a0\u00a0\u00a0\u00a0 beornas s\u00e6cgea\u00f0\n- 5\n- \n fram d\u00e6ge to d\u00e6ge \u00a0\u00a0\u00a0\u00a0 drihtnes h\u00e6lu. \n Secgea\u00f0 his wuldor \u00a0\u00a0\u00a0\u00a0 geond sige\u00feeode,\n and on eallum folcum \u00a0\u00a0\u00a0\u00a0 his f\u00e6gere wundor.\n He is se mycla god; \u00a0\u00a0\u00a0\u00a0 for\u00feon hine m\u00e6n sculon\n elne herian; \u00a0\u00a0\u00a0\u00a0 he is egeslic god\n- 10\n- \n ofer ealle godu \u00a0\u00a0\u00a0\u00a0 eor\u00f0buendra. \n Syndon ealle h\u00e6\u00feenu godu \u00a0\u00a0\u00a0\u00a0 hildedeoful;\n heofonas \u00fe\u00e6nne worhte \u00a0\u00a0\u00a0\u00a0 halig drihten.\n Ys on \u00feinre gesih\u00f0e \u00a0\u00a0\u00a0\u00a0 so\u00f0 andetnes,\n f\u00e6ger halignes \u00a0\u00a0\u00a0\u00a0 f\u00e6ste gebletsad\n- 15\n- \n and weor\u00f0lic wlite \u00a0\u00a0\u00a0\u00a0 wuldres \u00feines. \n Bringa\u00f0 nu drihtne \u00a0\u00a0\u00a0\u00a0 bu \u00e6tsomne\n wlite and are, \u00a0\u00a0\u00a0\u00a0 wuldor \u00f0ridde,\n and \u00fe\u00e6t of hiora e\u00f0ele don \u00a0\u00a0\u00a0\u00a0 ealle \u00feeode,\n \u00fe\u00e6t hi naman drihtenes \u00a0\u00a0\u00a0\u00a0 neode herigean.\n- 20\n- \n Genima\u00f0 eow arlice lac \u00a0\u00a0\u00a0\u00a0 and in ganga\u00f0 \n on his wictunas; \u00a0\u00a0\u00a0\u00a0 weor\u00f0ia\u00f0 drihten\n on his \u00fe\u00e6re halgan \u00a0\u00a0\u00a0\u00a0 healle geneahhige.\n For his ansyne sceal \u00a0\u00a0\u00a0\u00a0 eor\u00f0e beofian;\n secga\u00f0 nu on cynnum \u00a0\u00a0\u00a0\u00a0 and on cneorissum,\n- 25\n- \n \u00fe\u00e6t from treowe becwom \u00a0\u00a0\u00a0\u00a0 tirf\u00e6st rice \n drihten ure; \u00a0\u00a0\u00a0\u00a0 dome he sy\u00fe\u00fean\n eor\u00f0an ymbhwyrft \u00a0\u00a0\u00a0\u00a0 ealle gesette.\n He ferhtlic riht \u00a0\u00a0\u00a0\u00a0 folcum deme\u00f0\n and on his yrre \u00a0\u00a0\u00a0\u00a0 ealle \u00feeode.\n- 30\n- \n Heofenas blissia\u00f0, \u00a0\u00a0\u00a0\u00a0 hrusan swylce \n gefeo\u00f0 f\u00e6stlice, \u00a0\u00a0\u00a0\u00a0 and floda \u00ferym;\n sealte s\u00e6streamas \u00a0\u00a0\u00a0\u00a0 s\u00e6l\u00f0e habba\u00f0.\n Habba\u00f0 feldas eac \u00a0\u00a0\u00a0\u00a0 f\u00e6gere blisse\n and ealle \u00fea \u00fee on him \u00a0\u00a0\u00a0\u00a0 eard weardia\u00f0;\n- 35\n- \n w\u00e6run wudubearuwas \u00a0\u00a0\u00a0\u00a0 on wyndagum \n for andwlitan \u00a0\u00a0\u00a0\u00a0 ecean drihtnes,\n for\u00feon he cwom \u00a0\u00a0\u00a0\u00a0 on cyne\u00f0rymme,\n \u00fe\u00e6t he \u00feas eor\u00f0an \u00a0\u00a0\u00a0\u00a0 ealle demde.\n \u00feonne he ymbhwyrft \u00a0\u00a0\u00a0\u00a0 eor\u00f0an folca\n- 40\n- \n so\u00f0e and rihte \u00a0\u00a0\u00a0\u00a0 sy\u00fe\u00fean deme\u00f0.","title":"The Paris Psalter: Psalm 95","type":"page"}