{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a05_98.htm","path":"neu/ascp/a05_98.htm","source_url":"https://sacred-texts.com/neu/ascp/a05_98.htm","text":"Rixa\u00f0 drihten, and he re\u00f0e folc\nhealde\u00f0 on yrre ungemete swi\u00f0e;\nsitte\u00f0 ofer cherubin, se \u00fee sona m\u00e6g\nana eor\u00f0ware ealle onstyrian.\n5\nDrihten is on Sion, dema se m\u00e6sta,\nheah and m\u00e6re ofer eall h\u00e6le\u00f0a folc.\nWe andeta\u00f0 \u00feinum \u00feam ecean naman,\n\u00fe\u00e6t he mid mannum is mycel and egeslic,\nhalig on helpe h\u00e6le\u00fea bearnum,\n10\naare cyninges dom \u00e6ghw\u00e6r lufade.\n\u00feu gegearwadest geara \u00e6rest,\n\u00fe\u00e6t \u00feu recene, god, rihte beeodest;\n\u00feu on Iacobe gode domas\n\u00e6t fruman worlde f\u00e6gere settest.\n15\nAhebba\u00f0 haligne heofena drihten,\nusserne god ellencr\u00e6fte,\nand his fota sceamul for\u00f0 weor\u00feia\u00f0;\nfor\u00feon he halig is h\u00e6le\u00f0a bearnum.\nMoyses et Aaron m\u00e6re gebro\u00f0or,\n20\nso\u00f0e sacerdas, Samuhel \u00f0ridda,\n\u00fea gode his naman neode cigdan.\nHi cymlice cigdon drihten,\nand he hi gehyrde holde mode,\nspr\u00e6c him wordum to \u00feurh wolcnes swyr.\n25\nHi \u00fea gewitnesse wel geheoldon\nand his bebodu beorhte efnedan,\n\u00fea he him sealde and sylfa bebead.\n\u00feu gehyrdest hig, halig drihten,\nand him, meahtig god, milde wurde,\n30\nand heora \u00e6f\u00feancan ealle gewr\u00e6ce.\nHebba\u00f0 urne god, h\u00e6lend drihten,\nand hine on halgum her weor\u00f0ia\u00f0\nm\u00e6rum beorge; for\u00f0on his meahte synt\nand halig is heofonrices weard.","title":"The Paris Psalter: Psalm 98","type":"page"}