{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a06_04.htm","path":"neu/ascp/a06_04.htm","source_url":"https://sacred-texts.com/neu/ascp/a06_04.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Meters of Boethius: Meter 4\n Verse Indeterminate Saxon\n \n - \n \u00e6ala, \u00f0u scippend \u00a0\u00a0\u00a0\u00a0 scirra tungla, \n hefones and eor\u00f0an! \u00a0\u00a0\u00a0\u00a0 \u00f0u on heahsetle\n ecum ricsast, \u00a0\u00a0\u00a0\u00a0 and \u00f0u ealne hr\u00e6\u00f0e\n hefon ymbhwearfest, \u00a0\u00a0\u00a0\u00a0 and \u00f0urh \u00f0ine halige miht\n- 5\n- \n tunglu genedest \u00a0\u00a0\u00a0\u00a0 \u00fe\u00e6t hi \u00f0e to hera\u00f0. \n Swylce seo sunne \u00a0\u00a0\u00a0\u00a0 sweartra nihta\n \u00f0iostro adw\u00e6sce\u00f0 \u00a0\u00a0\u00a0\u00a0 \u00f0urh \u00f0ine meht.\n Blacum leohte \u00a0\u00a0\u00a0\u00a0 beorhte steorran\n mona gemetga\u00f0 \u00a0\u00a0\u00a0\u00a0 \u00f0urh \u00f0inra meahta sped,\n- 10\n- \n hwilum eac \u00fea sunnan \u00a0\u00a0\u00a0\u00a0 sines bereafa\u00f0 \n beorhtan leohtes, \u00a0\u00a0\u00a0\u00a0 \u00feonne hit gebyrigan m\u00e6g\n \u00fe\u00e6t swa geneahsne \u00a0\u00a0\u00a0\u00a0 nede weor\u00f0a\u00f0.\n Swelce \u00feone m\u00e6ran \u00a0\u00a0\u00a0\u00a0 morgensteorran,\n \u00fee we o\u00f0re naman \u00a0\u00a0\u00a0\u00a0 \u00e6fensteorra\n- 15\n- \n nemnan hera\u00f0, \u00a0\u00a0\u00a0\u00a0 \u00f0u genedest \u00feone \n \u00fe\u00e6t he \u00fe\u00e6re sunnan \u00a0\u00a0\u00a0\u00a0 si\u00f0 bewitige;\n geara gehwelce \u00a0\u00a0\u00a0\u00a0 he gongan sceal\n beforan feran. \u00a0\u00a0\u00a0\u00a0 Hw\u00e6t, \u00f0u, f\u00e6der, wercest\n sumurlange dagas \u00a0\u00a0\u00a0\u00a0 swi\u00f0e hate,\n- 20\n- \n \u00fe\u00e6m winterdagum \u00a0\u00a0\u00a0\u00a0 wundrum sceorta \n tida getiohhast. \u00a0\u00a0\u00a0\u00a0 \u00f0u \u00fe\u00e6m treowum selest\n su\u00f0an and westan, \u00a0\u00a0\u00a0\u00a0 \u00fea \u00e6r se swearta storm\n nor\u00f0an and eastan \u00a0\u00a0\u00a0\u00a0 benumen h\u00e6fde\n leafa gehwelces \u00a0\u00a0\u00a0\u00a0 \u00f0urh \u00feone la\u00f0ran wind.\n- 25\n- \n Eala hw\u00e6t, on eor\u00f0an \u00a0\u00a0\u00a0\u00a0 ealla gesceafta \n hyra\u00f0 \u00f0inre h\u00e6se, \u00a0\u00a0\u00a0\u00a0 do\u00f0 on heofonum swa some\n mode and m\u00e6gne, \u00a0\u00a0\u00a0\u00a0 butan men anum,\n se wi\u00f0 \u00f0inum willan \u00a0\u00a0\u00a0\u00a0 wyrce\u00f0 oftost.\n Wel la, \u00f0u eca \u00a0\u00a0\u00a0\u00a0 and \u00f0u \u00e6lmihtiga,\n- 30\n- \n ealra gesceafta \u00a0\u00a0\u00a0\u00a0 sceppend and reccend, \n ara \u00f0inum earmum \u00a0\u00a0\u00a0\u00a0 eor\u00f0an tudre,\n monna cynne, \u00a0\u00a0\u00a0\u00a0 \u00f0urh \u00f0inra mehta sped.\n Hwi \u00f0u, ece god, \u00a0\u00a0\u00a0\u00a0 \u00e6fre wolde\n \u00fe\u00e6t sio wyrd on gewill \u00a0\u00a0\u00a0\u00a0 wendan sceolde\n- 35\n- \n yflum monnum \u00a0\u00a0\u00a0\u00a0 ealles swa swi\u00f0e? \n Hio ful oft dere\u00f0 \u00a0\u00a0\u00a0\u00a0 unscyldegum.\n Sitta\u00f0 yfele men \u00a0\u00a0\u00a0\u00a0 giond eor\u00f0ricu\n on heahsetlum, \u00a0\u00a0\u00a0\u00a0 halige \u00fericca\u00f0\n under heora fotum; \u00a0\u00a0\u00a0\u00a0 firum uncu\u00f0\n- 40\n- \n hwi sio wyrd swa wo \u00a0\u00a0\u00a0\u00a0 wendan sceolde. \n Swa sint gehydde \u00a0\u00a0\u00a0\u00a0 her on worulde\n geond burga fela \u00a0\u00a0\u00a0\u00a0 beorhte cr\u00e6ftas.\n Unrihtwise \u00a0\u00a0\u00a0\u00a0 eallum tidum\n habba\u00f0 on hospe \u00a0\u00a0\u00a0\u00a0 \u00f0a \u00fee him sindon\n- 45\n- \n rihtes wisran, \u00a0\u00a0\u00a0\u00a0 rices wyr\u00f0ran; \n bi\u00f0 \u00fe\u00e6t lease lot \u00a0\u00a0\u00a0\u00a0 lange hwile\n bewrigen mid wrencum. \u00a0\u00a0\u00a0\u00a0 Nu on worulde her\n monnum ne deria\u00f0 \u00a0\u00a0\u00a0\u00a0 mane a\u00f0as.\n Gif \u00f0u nu, waldend, ne wilt \u00a0\u00a0\u00a0\u00a0 wirde steoran,\n- 50\n- \n ac on selfwille \u00a0\u00a0\u00a0\u00a0 sigan l\u00e6test, \n \u00feonne ic wat \u00fe\u00e6tte wile \u00a0\u00a0\u00a0\u00a0 woruldmen tweogan\n geond foldan sceat \u00a0\u00a0\u00a0\u00a0 buton fea ane.\n Eala, min dryhten, \u00a0\u00a0\u00a0\u00a0 \u00f0u \u00fee ealle ofersihst\n worulde gesceafta, \u00a0\u00a0\u00a0\u00a0 wlit nu on moncyn\n- 55\n- \n mildum eagum, \u00a0\u00a0\u00a0\u00a0 nu hi on monegum her \n worulde y\u00f0um \u00a0\u00a0\u00a0\u00a0 wynna\u00f0 and swinca\u00f0,\n earme eor\u00f0waran; \u00a0\u00a0\u00a0\u00a0 ara him nu \u00f0a.","title":"The Meters of Boethius: Meter 4","type":"page"}