{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a06_07.htm","path":"neu/ascp/a06_07.htm","source_url":"https://sacred-texts.com/neu/ascp/a06_07.htm","text":"\u00f0a ongon se wisdom his gewunan fylgan,\ngliowordum gol, gyd \u00e6fter spelle,\nsong so\u00f0cwida sumne \u00fea geta,\ncw\u00e6\u00f0 \u00fe\u00e6t he ne herde \u00fe\u00e6t on heane munt\n5\nmonna \u00e6nig meahte asettan\nhealle hroff\u00e6ste. Ne \u00feearf eac h\u00e6le\u00f0a nan\nwenan \u00fe\u00e6s weorces, \u00fe\u00e6t he wisdom m\u00e6ge\nwi\u00f0 ofermetta \u00e6fre gemengan.\nHerdes \u00feu \u00e6fre \u00fe\u00e6tte \u00e6nig mon\n10\non sondbeorgas settan meahte\nf\u00e6ste healle? Ne m\u00e6g eac fira nan\nwisdom timbran \u00fe\u00e6r \u00f0\u00e6r woruldgitsung\nbeorg oferbr\u00e6de\u00f0. Baru sond willa\u00f0\nren forswelgan; swa de\u00f0 ricra nu\n15\ngrundleas gitsung gilpes and \u00e6hta,\ngedrince\u00f0 to dryggum dreosendne welan,\nand \u00feeah \u00fe\u00e6s \u00feearfan ne bi\u00f0 \u00feurst aceled.\nNe m\u00e6g h\u00e6le\u00fea gehw\u00e6m hus on munte\nlange gel\u00e6stan, for\u00f0\u00e6m him lungre on\n20\nswift wind swape\u00f0. Ne bi\u00f0 sond \u00feon ma\nwi\u00f0 micelne ren manna \u00e6ngum\nhuses hirde, ac hit hreosan wile,\nsigan sond \u00e6fter rene. Swa bio\u00f0 anra gehw\u00e6s\nmonna modsefan miclum awegede,\n25\nof hiora stede styrede, \u00feonne hi strong drece\u00f0\nwind under wolcnum woruldearfo\u00f0a,\no\u00fe\u00fee hi eft se re\u00f0a ren onhrere\u00f0\nsumes ymbhogan, ungemet gemen.\nAc se \u00f0e \u00fea ecan agan wille\n30\nso\u00f0an ges\u00e6l\u00f0a, he sceal swi\u00f0e flion\n\u00f0isse worulde wlite, wyrce him si\u00f0\u00f0an\nhis modes hus, \u00fe\u00e6r he m\u00e6ge findan\nea\u00f0metta stan unigmet f\u00e6stne,\ngrundweal gearone; se toglidan ne \u00feearf,\n35\n\u00feeah hit wecge wind woruldearfo\u00f0a\no\u00f0\u00f0e ymbhogena ormete ren,\nfor\u00fe\u00e6m on \u00fe\u00e6re dene drihten selfa\n\u00feara eadmetta eardf\u00e6st wuniga\u00f0,\n\u00fe\u00e6r se wisdom a wuna\u00f0 on gemyndum.\n40\nFor\u00f0on orsorg lif ealnig l\u00e6da\u00f0\nworuldmen wise buton wendinge.\n\u00feonne he eall forsih\u00f0 eor\u00f0licu good,\nand eac \u00feara yfela orsorh wuna\u00f0,\nhopa\u00f0 to \u00fe\u00e6m ecum \u00fee \u00fe\u00e6r \u00e6fter cuma\u00f0,\n45\nhine \u00feonne \u00e6ghwonan \u00e6lmihtig good\nsingallice simle gehealde\u00f0\nanwunigendne his agenum\nmodes ges\u00e6l\u00f0um \u00feurh metodes gife,\n\u00feeah hine se wind woruldearfo\u00f0a\n50\nswi\u00f0e swence, and hine singale\ngemen g\u00e6le, \u00feonne him grimme on\nworulds\u00e6l\u00f0a wind wra\u00f0e blawe\u00f0,\n\u00feeah \u00fee hine ealneg se ymbhoga\n\u00f0yssa worulds\u00e6l\u00f0a wra\u00f0e drecce.","title":"The Meters of Boethius: Meter 7","type":"page"}