{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a06_09.htm","path":"neu/ascp/a06_09.htm","source_url":"https://sacred-texts.com/neu/ascp/a06_09.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Meters of Boethius: Meter 9\n Verse Indeterminate Saxon\n \n - \n Hw\u00e6t, we ealle witon \u00a0\u00a0\u00a0\u00a0 hwelce \u00e6rleste \n ge neah ge feor \u00a0\u00a0\u00a0\u00a0 Neron worhte,\n Romwara cyning, \u00a0\u00a0\u00a0\u00a0 \u00fea his rice w\u00e6s\n hehst under heofonum, \u00a0\u00a0\u00a0\u00a0 to hryre monegum.\n- 5\n- \n W\u00e6lhreowes gewed \u00a0\u00a0\u00a0\u00a0 w\u00e6s ful wide cu\u00f0, \n unrihth\u00e6med, \u00a0\u00a0\u00a0\u00a0 arleasta fela,\n man and mor\u00f0or, \u00a0\u00a0\u00a0\u00a0 misd\u00e6da worn,\n unrihtwises \u00a0\u00a0\u00a0\u00a0 inwid\u00feoncas.\n He het him to gamene \u00a0\u00a0\u00a0\u00a0 geara forb\u00e6rnan\n- 10\n- \n Romana burig, \u00a0\u00a0\u00a0\u00a0 sio his rices w\u00e6s \n ealles e\u00f0elstol. \u00a0\u00a0\u00a0\u00a0 He for unsnyttrum\n wolde fandian \u00a0\u00a0\u00a0\u00a0 gif \u00fe\u00e6t fyr meahte\n lixan swa leohte \u00a0\u00a0\u00a0\u00a0 and swa longe eac,\n read rasettan, \u00a0\u00a0\u00a0\u00a0 swa he Romane\n- 15\n- \n secgan geherde \u00a0\u00a0\u00a0\u00a0 \u00fe\u00e6t on sume tide \n Troia burg \u00a0\u00a0\u00a0\u00a0 ofertogen h\u00e6fde\n lega leohtost, \u00a0\u00a0\u00a0\u00a0 lengest burne\n hama under hefonum. \u00a0\u00a0\u00a0\u00a0 N\u00e6s \u00fe\u00e6t herlic d\u00e6d,\n \u00fe\u00e6t hine swelces gamenes \u00a0\u00a0\u00a0\u00a0 gilpan lyste,\n- 20\n- \n \u00fea he ne earnade \u00a0\u00a0\u00a0\u00a0 elles wuhte, \n buton \u00fe\u00e6t he wolde \u00a0\u00a0\u00a0\u00a0 ofer wer\u00f0iode\n his anes huru \u00a0\u00a0\u00a0\u00a0 anwald cy\u00f0an.\n Eac hit ges\u00e6lde \u00a0\u00a0\u00a0\u00a0 \u00e6t sumum cierre\n \u00f0\u00e6t se ilca het \u00a0\u00a0\u00a0\u00a0 ealle acwellan\n- 25\n- \n \u00fea ricostan \u00a0\u00a0\u00a0\u00a0 Romana witan \n and \u00fea \u00e6\u00feelestan \u00a0\u00a0\u00a0\u00a0 eorlgebyrdum\n \u00fee he on \u00fe\u00e6m folce \u00a0\u00a0\u00a0\u00a0 gefrigen h\u00e6fde,\n and on uppan \u00a0\u00a0\u00a0\u00a0 agene bro\u00f0or\n and his modor mid \u00a0\u00a0\u00a0\u00a0 meca ecgum,\n- 30\n- \n billum ofbeatan. \u00a0\u00a0\u00a0\u00a0 He his bryde ofslog \n self mid sweorde, \u00a0\u00a0\u00a0\u00a0 and he symle w\u00e6s\n micle \u00fee bli\u00f0ra \u00a0\u00a0\u00a0\u00a0 on breostcofan\n \u00feonne he swylces mor\u00f0res \u00a0\u00a0\u00a0\u00a0 m\u00e6st gefremede.\n Nalles sorgode \u00a0\u00a0\u00a0\u00a0 hw\u00e6\u00f0er si\u00f0\u00f0an a\n- 35\n- \n mihtig drihten \u00a0\u00a0\u00a0\u00a0 ametan wolde \n wrece be gewyrhtum \u00a0\u00a0\u00a0\u00a0 wohfremmendum,\n ac he on fer\u00f0e f\u00e6gn \u00a0\u00a0\u00a0\u00a0 facnes and searuwa\n w\u00e6lriow wunode. \u00a0\u00a0\u00a0\u00a0 Wiold emne swa \u00feeah\n ealles \u00feisses m\u00e6ran \u00a0\u00a0\u00a0\u00a0 middangeardes,\n- 40\n- \n swa swa lyft and lagu \u00a0\u00a0\u00a0\u00a0 land ymbclyppa\u00f0, \n garsecg embegyrt \u00a0\u00a0\u00a0\u00a0 gumena rice,\n secgea sitlu, \u00a0\u00a0\u00a0\u00a0 su\u00f0, east and west,\n o\u00f0 \u00f0a nor\u00f0mestan \u00a0\u00a0\u00a0\u00a0 n\u00e6ssan on eor\u00f0an;\n eall \u00fe\u00e6t Nerone \u00a0\u00a0\u00a0\u00a0 nede o\u00f0\u00f0e lustum,\n- 45\n- \n hea\u00f0orinca gehwilc, \u00a0\u00a0\u00a0\u00a0 heran sceolde. \n He h\u00e6fde him to gamene, \u00a0\u00a0\u00a0\u00a0 \u00feonne he on gylp astag,\n hu he eor\u00f0cyningas \u00a0\u00a0\u00a0\u00a0 yrmde and cwelmde.\n Wenst \u00f0u \u00fe\u00e6t se anwald \u00a0\u00a0\u00a0\u00a0 ea\u00f0e ne meahte\n godes \u00e6lmihtiges \u00a0\u00a0\u00a0\u00a0 \u00feone gelpsca\u00f0an\n- 50\n- \n rice ber\u00e6dan \u00a0\u00a0\u00a0\u00a0 and bereafian \n his anwaldes \u00a0\u00a0\u00a0\u00a0 \u00f0urh \u00fea ecan meaht,\n o\u00f0\u00f0e him his yfeles \u00a0\u00a0\u00a0\u00a0 elles gestioran?\n Eala, gif he wolde, \u00a0\u00a0\u00a0\u00a0 \u00f0\u00e6t he wel meahte,\n \u00fe\u00e6t unriht him \u00a0\u00a0\u00a0\u00a0 ea\u00f0e forbiodan!\n- 55\n- \n Eawla, \u00fe\u00e6t se hlaford \u00a0\u00a0\u00a0\u00a0 hefig gioc slepte \n sware on \u00fea swyran \u00a0\u00a0\u00a0\u00a0 sinra \u00f0egena,\n ealra \u00f0ara h\u00e6le\u00f0a \u00a0\u00a0\u00a0\u00a0 \u00fee on his tidum\n geond \u00feas l\u00e6nan worold \u00a0\u00a0\u00a0\u00a0 liban sceoldon.\n He on unscyldgum \u00a0\u00a0\u00a0\u00a0 eorla blode\n- 60\n- \n his sweord selede \u00a0\u00a0\u00a0\u00a0 swi\u00f0e gelome; \n \u00f0\u00e6r w\u00e6s swi\u00f0e sweotol, \u00a0\u00a0\u00a0\u00a0 \u00fe\u00e6t we s\u00e6don oft,\n \u00fe\u00e6t se anwald ne de\u00f0 \u00a0\u00a0\u00a0\u00a0 awiht godes\n gif se wel nele \u00a0\u00a0\u00a0\u00a0 \u00fee his geweald hafa\u00f0.","title":"The Meters of Boethius: Meter 9","type":"page"}