{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a06_19.htm","path":"neu/ascp/a06_19.htm","source_url":"https://sacred-texts.com/neu/ascp/a06_19.htm","text":"Eala, \u00fe\u00e6t is hefig dysig, hyge\u00f0 ymbe se \u00f0e wile,\nand frecenlic fira gehwilcum\n\u00fe\u00e6t \u00f0a earman men mid ealle gedw\u00e6le\u00f0,\nof \u00f0\u00e6m rihtan wege recene al\u00e6ded.\n5\nHw\u00e6\u00f0er ge willen on wuda secan\ngold \u00f0\u00e6t reade on grenum triowum?\nIc wat swa \u00f0eah \u00fe\u00e6t hit witena nan\n\u00feider ne sece\u00f0, for\u00f0\u00e6m hit \u00fe\u00e6r ne wex\u00f0,\nne on wingeardum wlitige gimmas.\n10\nHwy ge nu ne settan on sume dune\nfiscnet eowru, \u00feonne eow fon lyste\u00f0\nleax o\u00f0\u00f0e cyperan? Me gelicost \u00f0inc\u00f0\n\u00fe\u00e6tte ealle witen eor\u00f0buende\n\u00feoncolmode \u00f0\u00e6t hi \u00fe\u00e6r ne sint.\n15\nHw\u00e6\u00feer ge nu willen w\u00e6\u00fean mid hundum\non sealtne s\u00e6, \u00feonne eow secan lyst\nheorotas and hinda? \u00feu gehicgan meaht\n\u00fe\u00e6t ge willa\u00f0 \u00f0a on wuda secan\noftor micle \u00feonne ut on s\u00e6.\n20\nIs \u00f0\u00e6t wundorlic, \u00fe\u00e6t we witan ealle,\n\u00fe\u00e6t mon secan sceal be s\u00e6waro\u00f0e\nand be eaofrum \u00e6\u00feele gimmas,\nhwite and reade and hiwa gehw\u00e6s.\nHw\u00e6t, hi eac witon hw\u00e6r hi eafiscas\n25\nsecan \u00feurfan, and swylcra fela\nweoruldwelena; hi \u00fe\u00e6t wel do\u00f0,\ngeornfulle men, geara gehwilce.\nAc \u00f0\u00e6t is earmlicost ealra \u00feinga\n\u00fe\u00e6t \u00fea dysegan sint on gedwolan wordene,\n30\nefne swa blinde \u00fe\u00e6t hi on breostum ne magon\nea\u00f0e gecnawan hw\u00e6r \u00fea ecan good,\nso\u00f0a ges\u00e6l\u00f0a, sindon gehydda.\nFor\u00fe\u00e6m hi \u00e6fre ne lyst \u00e6fter spyrian,\nsecan \u00fea ges\u00e6l\u00f0a. Wena\u00f0 samwise\n35\n\u00fe\u00e6t hi on \u00f0is l\u00e6nan m\u00e6gen life findan\nso\u00f0a ges\u00e6l\u00f0a, \u00fe\u00e6t is selfa god.\nIc nat hu ic m\u00e6ge n\u00e6nige \u00f0inga\nealles swa swi\u00f0e on sefan minum\nhiora dysig t\u00e6lan swa hit me don lyste\u00f0,\n40\nne ic \u00fee swa sweotole gesecgan ne m\u00e6g,\nfor\u00f0\u00e6m hi sint earmran and eac dysegran,\nunges\u00e6ligran, \u00feonne ic \u00fee secgan m\u00e6ge.\nHi wilnia\u00f0 welan and \u00e6hta\nand weor\u00f0scipes to gewinnanne;\n45\n\u00feonne hi habba\u00f0 \u00fe\u00e6t hiora hige sece\u00f0,\nwena\u00f0 \u00feonne swa gewitlease\n\u00f0\u00e6t hi \u00fea so\u00f0an ges\u00e6l\u00f0a h\u00e6bben.","title":"The Meters of Boethius: Meter 19","type":"page"}