{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a06_31.htm","path":"neu/ascp/a06_31.htm","source_url":"https://sacred-texts.com/neu/ascp/a06_31.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n \n \n The Meters of Boethius: Meter 31\n Verse Indeterminate Saxon\n \n - \n Hw\u00e6t, \u00f0u meaht ongitan, \u00a0\u00a0\u00a0\u00a0 gif his \u00f0e geman lyst, \n \u00fe\u00e6tte mislice \u00a0\u00a0\u00a0\u00a0 manega wuhta\n geond eor\u00f0an fara\u00f0 \u00a0\u00a0\u00a0\u00a0 ungelice;\n habba\u00f0 blioh and f\u00e6r, \u00a0\u00a0\u00a0\u00a0 bu ungelice,\n- 5\n- \n and m\u00e6gwlitas \u00a0\u00a0\u00a0\u00a0 manegra cynna \n cu\u00f0 and uncu\u00f0. \u00a0\u00a0\u00a0\u00a0 Creopa\u00f0 and snica\u00f0,\n eall lichoma \u00a0\u00a0\u00a0\u00a0 eor\u00f0an getenge,\n nabba\u00f0 hi \u00e6t fi\u00f0rum fultum, \u00a0\u00a0\u00a0\u00a0 ne magon hi mid fotum gangan,\n eor\u00f0an brucan, \u00a0\u00a0\u00a0\u00a0 swa him eaden w\u00e6s.\n- 10\n- \n Sume fotum twam \u00a0\u00a0\u00a0\u00a0 foldan pe\u00f0\u00f0a\u00f0, \n sume fierfete, \u00a0\u00a0\u00a0\u00a0 sume fleogende\n winda\u00f0 under wolcnum. \u00a0\u00a0\u00a0\u00a0 Bi\u00f0 \u00f0eah wuhta gehwylc\n onhnigen to hrusan, \u00a0\u00a0\u00a0\u00a0 hnipa\u00f0 of dune,\n on weoruld wlite\u00f0, \u00a0\u00a0\u00a0\u00a0 wilna\u00f0 to eor\u00f0an,\n- 15\n- \n sume ned\u00feearfe, \u00a0\u00a0\u00a0\u00a0 sume neodfr\u00e6ce. \n Man ana g\u00e6\u00f0 \u00a0\u00a0\u00a0\u00a0 metodes gesceafta\n mid his andwlitan \u00a0\u00a0\u00a0\u00a0 up on gerihte.\n Mid \u00f0y is getacnod \u00a0\u00a0\u00a0\u00a0 \u00fe\u00e6t his treowa sceal\n and his modge\u00feonc \u00a0\u00a0\u00a0\u00a0 ma up \u00feonne ni\u00f0er\n- 20\n- \n habban to heofonum, \u00a0\u00a0\u00a0\u00a0 \u00fey l\u00e6s he his hige wende \n ni\u00f0er swa \u00f0\u00e6r nyten. \u00a0\u00a0\u00a0\u00a0 Nis \u00fe\u00e6t gedafenlic,\n \u00fe\u00e6t se modsefa \u00a0\u00a0\u00a0\u00a0 monna \u00e6niges\n ni\u00f0erheald wese \u00a0\u00a0\u00a0\u00a0 and \u00fe\u00e6t neb upweard!","title":"The Meters of Boethius: Meter 31","type":"page"}