{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a21.htm","path":"neu/ascp/a21.htm","source_url":"https://sacred-texts.com/neu/ascp/a21.htm","text":"Gloria.\nSy \u00fee wuldor and lof wide geopenod\ngeond ealle \u00feeoda, \u00feanc and wylla,\nm\u00e6gen and mildse and ealles modes lufu,\n5\nso\u00f0f\u00e6stra sib, and \u00f0ines sylfes dom\nworulde gewlitegod, swa \u00f0u wealdan miht\neall eor\u00f0an m\u00e6gen and uplyfte,\nwind and wolcna. Wealdest eall on riht. Patri et filio et spiritui sancto.\n10\n\u00feu eart frofra f\u00e6der and feorhhyrde,\nlifes latteow, leohtes wealdend,\nasyndrod fram synnum, swa \u00f0in sunu m\u00e6re\n\u00feurh cl\u00e6ne gecynd, cyning ofer ealle,\nbeald gebletsod, boca lareow,\n15\nheah higefrofer and halig gast. Sicut erat in principio.\nSwa w\u00e6s on fruman frea mancynnes\nealre worulde wlite and frofer,\ncl\u00e6ne and cr\u00e6ftig. \u00feu gecyddest \u00fe\u00e6t\n20\n\u00fea \u00f0u, ece god, ana gewrohtest\n\u00feurh halige miht heofonas and eor\u00f0an,\neardas and uplyft and ealle \u00feing.\n\u00feu settest on foldan swy\u00f0e feala cynna\nand tosyndrodost hig sy\u00f0\u00f0on on m\u00e6nego;\n25\n\u00feu gewrohtest, ece god, ealle gesceafta\non syx dagum, and on \u00feone seofo\u00f0an \u00feu gerestest.\n\u00fea w\u00e6s gefor\u00f0ad \u00fein f\u00e6gere weorc,\nand \u00f0u sunnand\u00e6g sylf halgodest\nand gem\u00e6rsodest hine manegum to helpe.\n30\n\u00feone heahan d\u00e6g healda\u00f0 and freo\u00f0ia\u00fe\nealle \u00fea \u00f0e cunnon cristene \u00feeawas, halige heortlufan and \u00f0\u00e6s hehstan gebod;\non drihtnes namon se d\u00e6g is gewur\u00f0od. Et nunc et semper.\n35\nAnd nu and symble \u00feine so\u00f0an weorc\nand \u00f0in mycele miht manegum swytela\u00f0,\nswa \u00feine cr\u00e6ftas heo cy\u00f0a\u00fe wide\nofer ealle woruld; ece stande\u00fe\ngodes handgeweorc, growe\u00f0 swa \u00f0u hete.\n40\nEalle \u00fee heria\u00f0 halige dreamas\ncl\u00e6nre stefne and cristene bec,\neall middaneard, and we men cwe\u00fea\u00f0\non grunde her: \"Gode lof and \u00f0anc,\nece willa, and \u00f0in agen dom!\"\n45\nEt is secula seculorum.\nAnd on worulda woruld wuna\u00f0 and rixa\u00f0\ncyning innan wuldre and his \u00fea gecorenan,\nheah\u00ferymnesse haliges gastes,\nwlitige englas and wuldorgyfe,\n50\nso\u00f0e sibbe, sawla \u00feancung,\nmodes miltse. \u00fe\u00e6r is seo m\u00e6ste lufu;\nhaligdomes heofonas syndon\n\u00feurh \u00feine ecan word \u00e6ghw\u00e6r fulle,\nswa syndon \u00feine mihta ofer middangeard\n55\nswutele and gesyne, \u00fe\u00e6t \u00f0u hy sylf worhtest. Amen.\nWe \u00fe\u00e6t so\u00f0lice secga\u00f0 ealle:\n\u00feurh cl\u00e6ne gecynd \u00feu eart cyning on riht,\ncl\u00e6ne and cr\u00e6ftig. \u00feu gecyddest \u00fe\u00e6t\n60\n\u00fea \u00f0u, mihtig god, man geworhtest\nand him on dydest oru\u00f0 and sawul,\nsealdest word and gewitt and w\u00e6stma gecynd,\ncyddest \u00feine cr\u00e6ftas. Swylc is Cristes miht!","title":"The Gloria I","type":"page"}