{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a22.htm","path":"neu/ascp/a22.htm","source_url":"https://sacred-texts.com/neu/ascp/a22.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n The Lord's Prayer III\n Verse Indeterminate Saxon\n \n - \n Pater noster qui es in celis.\n F\u00e6der manncynnes, \u00a0\u00a0\u00a0\u00a0 frofres ic \u00fee bidde, \n halig drihten, \u00a0\u00a0\u00a0\u00a0 \u00feu \u00f0e on heofonum eart.\nSanctificetur nomen tuum.\n- 5\n- \n \u00fe\u00e6t sy gehalgod, \u00a0\u00a0\u00a0\u00a0 hygecr\u00e6ftum f\u00e6st, \n \u00fein nama nu \u00f0a, \u00a0\u00a0\u00a0\u00a0 neriende Crist,\n in urum ferh\u00f0locan \u00a0\u00a0\u00a0\u00a0 f\u00e6ste gesta\u00f0elod.\n Adueniat regnum tuum.\n Cume nu to mannum, \u00a0\u00a0\u00a0\u00a0 mihta wealdend,\n- 10\n- \n \u00fein rice to us, \u00a0\u00a0\u00a0\u00a0 rihtwis dema, \n and \u00f0in geleafa \u00a0\u00a0\u00a0\u00a0 in lifd\u00e6ge\n Fiat uolontas tua sicut in celo et in terra.\n on urum mode \u00a0\u00a0\u00a0\u00a0 m\u00e6re \u00feurhwunige.\n And \u00fein willa mid us \u00a0\u00a0\u00a0\u00a0 weor\u00f0e gel\u00e6sted\n- 15\n- \n on eardunge \u00a0\u00a0\u00a0\u00a0 eor\u00f0an rices, \n swa hluttor is \u00a0\u00a0\u00a0\u00a0 in heofonwuldre,\n wynnum gewlitegod \u00a0\u00a0\u00a0\u00a0 a to worulde for\u00f0.\n Panem nostrum cotidianum da nobis hodie.\n Syle us nu to d\u00e6ge, \u00a0\u00a0\u00a0\u00a0 drihten gumena,\n- 20\n- \n heofena heahcyning, \u00a0\u00a0\u00a0\u00a0 hlaf urne, \n \u00feone \u00f0u onsendest \u00a0\u00a0\u00a0\u00a0 sawlum to h\u00e6le\n on middaneard \u00a0\u00a0\u00a0\u00a0 manna cynnes;\n \u00fe\u00e6t is se cl\u00e6na \u00a0\u00a0\u00a0\u00a0 Crist, drihten god.\nEt dimitte nobis debita nostra.\n- 25\n- \n Forgyf us, gumena weard, \u00a0\u00a0\u00a0\u00a0 gyltas and synna, \n and ure leahtras alet, \u00a0\u00a0\u00a0\u00a0 lices wunda\n and mand\u00e6da, \u00a0\u00a0\u00a0\u00a0 swa we mildum wi\u00f0 \u00f0e,\n \u00e6lmihtigum gode, \u00a0\u00a0\u00a0\u00a0 oft abylgea\u00f0,\nSicut et nos dimittimus debitoribus nostris.\n- 30\n- \n swa swa we forl\u00e6ta\u00f0 \u00a0\u00a0\u00a0\u00a0 leahtras on eor\u00fean \n \u00feam \u00fee wi\u00f0 us \u00a0\u00a0\u00a0\u00a0 oft agylta\u00f0,\n and him womd\u00e6de \u00a0\u00a0\u00a0\u00a0 witan ne \u00feenca\u00f0\n for earnunge \u00a0\u00a0\u00a0\u00a0 ecan lifes.\nEt no nos inducas in temptationem.\n- 35\n- \n Ne l\u00e6d \u00feu us to wite \u00a0\u00a0\u00a0\u00a0 in wean sorge \n ne in costunge, \u00a0\u00a0\u00a0\u00a0 Crist nerigende,\n \u00fey l\u00e6s we arlease \u00a0\u00a0\u00a0\u00a0 ealra \u00feinra mildsa\n \u00feurh feondscipe \u00a0\u00a0\u00a0\u00a0 fremde weor\u00f0an.\nSed libera nos a malo.\n- 40\n- \n And wi\u00f0 yfele gefreo \u00a0\u00a0\u00a0\u00a0 us eac nu \u00f0a \n feonda gehwylces; \u00a0\u00a0\u00a0\u00a0 we in ferh\u00f0locan,\n \u00feeoden engla, \u00a0\u00a0\u00a0\u00a0 \u00f0anc and wuldor,\n so\u00f0 sigedrihten, \u00a0\u00a0\u00a0\u00a0 secga\u00f0 georne,\n \u00fe\u00e6s \u00f0e \u00feu us milde \u00a0\u00a0\u00a0\u00a0 mihtum alysdest\n- 45\n- \n fram h\u00e6ftnyde \u00a0\u00a0\u00a0\u00a0 hellewites. \n Amen.\n Weor\u00f0e \u00fe\u00e6t.","title":"The Lord's Prayer III","type":"page"}