{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a23.htm","path":"neu/ascp/a23.htm","source_url":"https://sacred-texts.com/neu/ascp/a23.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n \n \n The Creed\n Verse Indeterminate Saxon\n \n - \n Credo in deum patrem omnipotentem.\n \u00e6lmihtig f\u00e6der \u00a0\u00a0\u00a0\u00a0 up on rodore, \n \u00fee \u00f0a sciran gesceaft \u00a0\u00a0\u00a0\u00a0 sceope and worhtest\n and eor\u00f0an wang \u00a0\u00a0\u00a0\u00a0 ealne gesettest,\n- 5\n- \n ic \u00fee ecne god \u00a0\u00a0\u00a0\u00a0 \u00e6nne gecenne, \n lustum gelyfe. \u00a0\u00a0\u00a0\u00a0 \u00feu eart lifes frea,\n engla ordfruma, \u00a0\u00a0\u00a0\u00a0 eor\u00f0an wealdend,\n and \u00f0u garsecges \u00a0\u00a0\u00a0\u00a0 grundas geworhtest,\n and \u00feu \u00f0a menegu canst \u00a0\u00a0\u00a0\u00a0 m\u00e6rra tungla.\n- 10\n- \n Et in Iesum Christum filium eius unicum, dominum nostrum.\n Ic on sunu \u00feinne \u00a0\u00a0\u00a0\u00a0 so\u00f0ne gelyfe, \n h\u00e6lendne cyning, \u00a0\u00a0\u00a0\u00a0 hider asendne\n of \u00f0am uplican \u00a0\u00a0\u00a0\u00a0 engla rice,\n \u00feone Gabriel, \u00a0\u00a0\u00a0\u00a0 godes \u00e6rendraca,\n- 15\n- \n sanctan Marian \u00a0\u00a0\u00a0\u00a0 sylfre gebodode. \n Ides unm\u00e6ne, \u00a0\u00a0\u00a0\u00a0 heo \u00fe\u00e6t \u00e6rende\n onfeng freolice, \u00a0\u00a0\u00a0\u00a0 and \u00f0e f\u00e6der sylfne\n under breostcofan \u00a0\u00a0\u00a0\u00a0 bearn acende.\n N\u00e6s \u00f0\u00e6r gefremmed \u00a0\u00a0\u00a0\u00a0 firen \u00e6t giftum,\n- 20\n- \n ac \u00fe\u00e6r halig gast \u00a0\u00a0\u00a0\u00a0 handgyft sealde, \n \u00fe\u00e6re f\u00e6mnan bosm \u00a0\u00a0\u00a0\u00a0 fylde mid blisse,\n and heo cu\u00f0lice \u00a0\u00a0\u00a0\u00a0 cende swa m\u00e6rne\n eor\u00f0buendum \u00a0\u00a0\u00a0\u00a0 engla scyppend,\n se to frofre gewear\u00f0 \u00a0\u00a0\u00a0\u00a0 foldbuendum,\n- 25\n- \n and ymbe Bethleem \u00a0\u00a0\u00a0\u00a0 bodedan englas \n \u00fe\u00e6t acenned w\u00e6s \u00a0\u00a0\u00a0\u00a0 Crist on eor\u00f0an.\n Passus sub Pontio Pilato.\n \u00f0a se pontisca \u00a0\u00a0\u00a0\u00a0 Pilatus weold\n under Romwarum \u00a0\u00a0\u00a0\u00a0 rices and doma,\n- 30\n- \n \u00fea se deora frea \u00a0\u00a0\u00a0\u00a0 dea\u00f0 \u00ferowade, \n on gealgan stah, \u00a0\u00a0\u00a0\u00a0 gumena drihten,\n \u00feone geomormod \u00a0\u00a0\u00a0\u00a0 Iosep byrigde,\n and he of helle \u00a0\u00a0\u00a0\u00a0 hu\u00f0e gefette,\n of \u00feam suslhofe, \u00a0\u00a0\u00a0\u00a0 sawla manega,\n- 35\n- \n het \u00f0a uplicne \u00a0\u00a0\u00a0\u00a0 e\u00feel secan. \n Tertia die resurrexit a mortuis.\n \u00fe\u00e6s \u00fey \u00f0riddan d\u00e6ge \u00a0\u00a0\u00a0\u00a0 \u00feeoda wealdend\n aras, rices frea, \u00a0\u00a0\u00a0\u00a0 recene of moldan,\n and he XL daga \u00a0\u00a0\u00a0\u00a0 folgeras sine\n- 40\n- \n runum arette, \u00a0\u00a0\u00a0\u00a0 and \u00f0a his rice began, \n \u00feone uplican \u00a0\u00a0\u00a0\u00a0 e\u00f0el secan,\n cw\u00e6\u00f0 \u00fe\u00e6t he nolde \u00a0\u00a0\u00a0\u00a0 n\u00e6nne forl\u00e6tan\n \u00fee him for\u00f0 ofer \u00fe\u00e6t \u00a0\u00a0\u00a0\u00a0 fylian wolde\n and mid f\u00e6stum sefan \u00a0\u00a0\u00a0\u00a0 freode gel\u00e6stan.\n- 45\n- \n Credo in spiritum sanctum.\n Ic haligne gast \u00a0\u00a0\u00a0\u00a0 hihte beluce, \n emne swa ecne \u00a0\u00a0\u00a0\u00a0 swa is a\u00f0or gecweden,\n f\u00e6der o\u00f0\u00f0e freobearn, \u00a0\u00a0\u00a0\u00a0 folca gereordum.\n Ne synd \u00fe\u00e6t \u00fereo godas, \u00a0\u00a0\u00a0\u00a0 \u00feriwa genemned,\n- 50\n- \n ac is an god, \u00a0\u00a0\u00a0\u00a0 se \u00f0e ealle hafa\u00f0 \n \u00fea \u00fery naman \u00a0\u00a0\u00a0\u00a0 \u00feinga gerynum,\n so\u00f0 and sigef\u00e6st \u00a0\u00a0\u00a0\u00a0 ofer side gesceaft,\n wereda wuldorgyfa, \u00a0\u00a0\u00a0\u00a0 wlanc and ece.\nSanctum ecclesiam catholicam.\n- 55\n- \n Eac ic gelyfe \u00a0\u00a0\u00a0\u00a0 \u00fe\u00e6t syn leofe gode \n \u00fee \u00feurh \u00e6nne ge\u00feanc \u00a0\u00a0\u00a0\u00a0 ealdor heria\u00f0,\n heofona heahcyning \u00a0\u00a0\u00a0\u00a0 her for life,\n Sanctorum communionem.\n and ic gem\u00e6nscipe \u00a0\u00a0\u00a0\u00a0 m\u00e6rne getreowe\n- 60\n- \n \u00feinra haligra \u00a0\u00a0\u00a0\u00a0 her for life. \n Remissionem peccatorum.\n Lisse ic gelyfe \u00a0\u00a0\u00a0\u00a0 leahtra gehwylces,\n Carnis resurrectionem.\n and ic \u00feone \u00e6rest \u00a0\u00a0\u00a0\u00a0 ealra getreowe,\n- 65\n- \n fl\u00e6sces on foldan \u00a0\u00a0\u00a0\u00a0 on \u00fea forhtan tid, \n Et uitam eternam.\n \u00fe\u00e6r \u00f0u ece lif \u00a0\u00a0\u00a0\u00a0 eallum d\u00e6lest,\n swa her manna gehwylc \u00a0\u00a0\u00a0\u00a0 metode gecwema\u00f0.","title":"The Creed","type":"page"}