{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a25.htm","path":"neu/ascp/a25.htm","source_url":"https://sacred-texts.com/neu/ascp/a25.htm","text":"Wuton wuldrian weorada dryhten\nhalgan hlio\u00f0orcwidum, hiofenrices weard,\nlufian liofwendum, lifes agend,\nand him simle sio sigefest wuldor\n5\nuppe mid \u00e6nglum, and on eor\u00f0an sibb\ngumena gehwilcum goodes willan.\nWe \u00f0e heria\u00f0 halgum stefnum\nand \u00fee bl\u00e6tsia\u00f0, bilewit feder,\nand \u00f0e \u00feancia\u00f0, \u00feioda walden,\n10\n\u00f0ines weor\u00f0lican wuldordreames\nand \u00f0inra miclan m\u00e6gena gerena,\n\u00f0e \u00f0u, god dryhten, gastes m\u00e6htum\nhafest on gewealdum hiofen and eor\u00f0an,\nan ece feder, \u00e6lmehtig god.\n15\n\u00f0u eart cyninga cyningc cwicera gehwilces,\n\u00f0u eart sigefest sunu and so\u00f0 helend\nofer ealle gesceft angla and manna.\n\u00f0u, dryhten god, on dreamum wunast\non \u00f0\u00e6re upplican \u00e6\u00f0elan ceastre,\nsitest sigehr\u00e6mig on \u00f0a swi\u00f0ran hand\n\u00f0inum godf\u00e6der, gasta gemyndig.\nMildsa nu, meahtig, manna cynne,\nand of leahtrum ales \u00f0ine \u00f0a liofan gesceft,\nand us hale gedo, hele\u00f0a sceppend,\n35\nni\u00f0a nergend, for \u00f0ines naman are.\n\u00f0u eart so\u00f0lice simle halig,\nand \u00f0u eart ana \u00e6ce dryhten,\nand \u00f0u ana bist eallra dema\ncwucra ge deadra, Crist nergende,\n40\nfor\u00f0an \u00f0u on \u00f0rymme ricsast and on \u00f0rinesse\nand on annesse, ealles waldend,\nhiofena heahcyninc, haliges gastes\nfegere gefelled in f\u00e6der wuldre.","title":"The Kentish Hymn","type":"page"}