{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a26.htm","path":"neu/ascp/a26.htm","source_url":"https://sacred-texts.com/neu/ascp/a26.htm","text":"Dauid w\u00e6s haten diormod h\u00e6le\u00f0,\nIsraela brega, \u00e6\u00f0el\u00e6 and rice,\ncyninga cynost, Criste liofost.\nW\u00e6s he under hiofenum hearpera m\u00e6rost\n5\n\u00f0ara we an folcum gefrigen h\u00e6bben.\nSangere he w\u00e6s so\u00f0f\u00e6stest, swi\u00f0e ge\u00f0ancol\nto \u00f0ingienne \u00feiodum sinum\nwi\u00f0 \u00feane mildostan manna sceppend.\nW\u00e6s se dryhtnes \u00f0iowa Dauid \u00e6t wige\n10\nso\u00f0 sigecempa, searocyne man,\ncasere creaftig, \u00feonne cumbulgebrec\non gewinndagum weor\u00f0an scoldan.\nHwe\u00f0ere him geiode, swa ful oft gede\u00f0\n\u00fe\u00e6tte godferhte gylt gefr\u00e6mma\u00f0\n15\n\u00feurh lichaman lene ge\u00f0ohtas.\nGelamp \u00fe\u00e6t him mon ansende saula neriend,\nwitgan mid wordum, weorada dominus,\nand secgan het, selfum gecy\u00f0an\nymb his womdeda waldendes doom,\n20\n\u00fe\u00e6t se fruma w\u00e6re his feores sceldig,\nfor \u00f0am \u00fee he Uriam het aldre beneman,\nfromne ferdrinc fere beserode,\nand him Bezabe brohte to wife\nfor gitsunga, \u00fee he godes eorre\n25\n\u00feurh his selfes weorc sona anfunde.\nHim \u00f0a \u00f0ingode \u00feioda aldor,\nDauid georne, and to dryhtne geb\u00e6d,\nand his synna hord selfa ontende,\ngyltas georne gode andhette,\n30\nweoruda dryhtne, and \u00f0us wordum sp\u00e6c: Miserere mei deus secundum magnam misericordiam tuam.\n\"Miltsa \u00f0u me, meahta walden, nu \u00f0u wast manna ge\u00f0ohtas,\nhelp \u00f0u, h\u00e6lend min, handgeweorces\n\u00feines anes, \u00e6lmehtig god,\n35\nefter \u00feinre \u00f0\u00e6re miclan mildhiortnesse. Et secundum multitudinem miserationem tuarum dele iniquitatem meam.\nOnd eac efter menio miltsa \u00f0inra,\ndryhten weoruda, adilga min unriht\nto forgefenesse gaste minum.\n40\nAmplius laua me ab iniustitia mea et a delicta mea munda m\u00e6.\nA\u00f0weah me of sennum, saule fram wammum,\ngasta sceppend, geltas geclansa,\n\u00fea \u00f0e ic on aldre \u00e6fre gefremede\n\u00f0urh lichaman le\u00f0re ge\u00f0ohtas.\n45\nQuoniam iniquitatem meam ego agnosco et delictum meum coram me est semper.\nFor\u00f0an ic unriht min eal oncnawe,\nand eac synna gehw\u00e6r selfum \u00e6t eagan,\nfirendeda ge\u00f0rec beforan stande\u00f0,\nscelda scina\u00f0; forgef me, sceppen min,\n50\nlifes liohtfruma, \u00f0inre lufan blisse. Tibi soli peccaui et malum coram te feci ut iustificeris in sermonibus tuis et uincas dum iudicaris.\nNu ic anum \u00f0e oft syngode,\nand yfela feola eac gefr\u00e6mede,\ngelta gramhegdig, ic \u00f0e, gasta breogo,\n55\nhelende Crist, helpe bidde,\n\u00f0\u00e6t me forgefene gastes wunde\nan for\u00f0gesceaft feran mote,\n\u00fey \u00f0ine wordcwidas weor\u00f0an gefelde,\n\u00f0\u00e6t \u00f0u ne wilnast weora \u00e6niges dea\u00f0;\nEcce enim iniquitatibus.\nIc on unrihtum eac \u00f0an in synnum\ngeeacnod w\u00e6s. \u00f0u \u00f0\u00e6t ana wast,\nm\u00e6htig dryhten, hu me modor geb\u00e6r\nin scame and in sceldum; forgef me, sceppend min,\n70\n\u00f0\u00e6t ic fram \u00f0\u00e6m synnum selfa gecerre,\n\u00fea \u00f0e mine \u00e6ldran \u00e6r geworhtan\nand ic selfa eac sio\u00f0\u00f0an beeode. Ecce enim ueritatem.\nAc \u00f0u, selua god, so\u00f0 an lufast;\n75\n\u00fey ic \u00f0e mid benum biddan wille\nlifes and lisse, liohtes aldor,\nfor\u00f0an \u00f0u me uncu\u00f0e eac \u00f0an derne\n\u00feinre snetera hord selfa ontendes. Asperies me ysopo et mundabor.\n80\n\u00f0u me, meahtig god, milde and bli\u00f0e\n\u00feurh ysopon ealne ahluttra,\n\u00feonne ic gecl\u00e6nsod Criste hero,\nand eac ofer snawe self scinende\n\u00feinre sibbe lufan sona gemete.\n85\nAuditui meo dabis gaudium.\nOntyn nu, elmehtig, earna hleo\u00f0or,\n\u00fe\u00e6t min gehernes hehtful weor\u00f0e\non gefean bli\u00f0se for\u00f0weard to \u00f0e;\n\u00f0anne bio\u00f0 on wenne, waldend, simle\n90\n\u00fea gebrocenan ban, bilwit dominus,\n\u00f0a \u00fee on h\u00e6n\u00f0um \u00e6r hwile w\u00e6ron. Auerte faciem tuam a peccatis meis et omnes.\nAhwerf nu fram synnum, saula neriend,\nand fram misdedum minra gylta\n95\n\u00feine ansione, \u00e6lmeahtig god,\nand \u00f0urh miltsunga meahta \u00feinra\n\u00f0u unriht min eall adilga. Cor mundum crea in me deus et spiritum rectum.\n\u00e6c \u00f0u, dryhten Crist, clene hiortan\n100\nin me, mehtig god, modswi\u00f0ne ge\u00f0anc\nto \u00f0olienne \u00f0inne willan\nand to healdenne halige domas,\nand \u00f0u rihtne gast, rodera waldend,\nin fer\u00f0e minum feste geniowa.\n105\nNe proicias me a facie tuae et spiritum sanctum tuum.\nNe aweorp \u00f0u me, weoruda dryhten,\nfram ansione ealra \u00feinra miltsa,\nne \u00f0ane godan fram me gast haligne\naferre, domine, frea \u00e6lmeahtig,\n110\n\u00feinra arna me eal ne bescerwe. Redde mihi letitiam.\nS\u00e6le nu bli\u00f0se me, bilewit dominus,\n\u00feinre h\u00e6lo heht, helm alwihta,\nand me, lifgende liohtes hiorde,\n115\ngaste \u00f0ine, god selfa, getreme,\n\u00f0\u00e6t ic aldorlice a for\u00f0 sio\u00f0\u00f0an\nto \u00f0inum willan weor\u00f0an mote. Doceam iniquos uias tuas et impii ad te.\nSimle ic \u00f0ine weogas wanhogan l\u00e6rde,\n120\n\u00f0\u00e6t hio arlease eft gecerdan\nto hiora selfra saula hiorde,\ngod selfa, to \u00f0e gastes mundberd\n\u00f0urh sibbe lufan seocan scoldan. Libera me de sanguinibus.\n125\nBefreo me an fer\u00f0e, f\u00e6der mancynnes,\nfram blodgete and bealani\u00f0um,\ngod lifigende, gylta geclansa,\nhelo and helpend, hiofenrices weard;\n\u00f0anne tunge min triowfest blissa\u00f0\n130\nfor \u00f0ines selfes so\u00f0festnesse. Domine labia mea aperies et os meum adnuntiauit.\nOntyn nu, waldend god, weoloras mine;\nswa min mu\u00f0 sio\u00f0\u00f0an m\u00e6hte \u00f0ine\nand lof georne liodum to bli\u00f0se,\n135\nso\u00f0 sigedryhten, secgende w\u00e6s. Quoniam si uoluisses.\nIc \u00f0e onsegednesse sona brohte,\nweoruda dryhtne, \u00f0er \u00f0u wolde swa,\n\u00f0a \u00f0u \u00fe\u00e6t ne lufedest, lifes bretta,\n140\n\u00f0\u00e6t ic \u00f0e bernelac brengan moste\ndeadra neata, dryhtne to willan. Sacrificium deo spiritus contribulatus.\nAc \u00f0e micle ma, mehtig dryhten,\nlifiende Crist, liicwer\u00f0e bi\u00f0\n145\nse gehnysta gast, hiorte geclansod\nand geeadmeded inge\u00feancum;\n\u00f0a \u00f0u, \u00e6lm\u00e6htig, \u00e6fre ne \u00e6west. Benigne fact domine in bona uoluntate.\nGedoo nu fr\u00e6msume frofre \u00f0ine\n150\nto \u00f0inum godan gastes willan,\n\u00f0\u00e6tte Sione dun sigefest weor\u00f0e,\nand weallas Sion wynfeste getremed,\nHierusolime, god lifiende. Tunc acceptabis sacrificium.","title":"Psalm 50","type":"page"}