{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a43_01.htm","path":"neu/ascp/a43_01.htm","source_url":"https://sacred-texts.com/neu/ascp/a43_01.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Next\u00a0\n \n \n Metrical Charm 1: For Unfruitful Land\n Verse Indeterminate Saxon\n \n - \n Her ys seo bot, hu \u00f0u meaht \u00feine \u00e6ceras betan gif hi \n nella\u00fe wel wexan o\u00fe\u00fee \u00fe\u00e6r hwilc ungedefe \u00feing on gedon bi\u00f0\n on dry o\u00f0\u00f0e on lyblace. Genim \u00feonne on niht, \u00e6r hyt\n dagige, feower tyrf on feower healfa \u00fe\u00e6s landes, and gemearca\n- 5\n- \n hu hy \u00e6r stodon. Nim \u00feonne ele and hunig and beorman, \n and \u00e6lces feos meolc \u00fee on \u00fe\u00e6m lande sy, and \u00e6lces treow-\n cynnes d\u00e6l \u00fee on \u00fe\u00e6m lande sy gewexen, butan heardan\n beaman, and \u00e6lcre namcu\u00fere wyrte d\u00e6l, butan glappan anon,\n and do \u00feonne haligw\u00e6ter \u00f0\u00e6r on, and drype \u00feonne \u00feriwa on\n- 10\n- \n \u00feone sta\u00f0ol \u00feara turfa, and cwe\u00fee \u00f0onne \u00f0as word: Crescite, \n wexe, et multiplicamini, and gem\u00e6nigfealda, et replete, and\n gefylle, terre, \u00feas eor\u00f0an. In nomine patris et filii et spiritus\n sancti sit benedicti. And Pater Noster swa oft swa \u00fe\u00e6t o\u00f0er.\n And bere si\u00fe\u00fean \u00f0a turf to circean, and m\u00e6ssepreost asinge\n- 15\n- \n feower m\u00e6ssan ofer \u00fean turfon, and wende man \u00fe\u00e6t grene to \n \u00f0an weofode, and si\u00fe\u00fean gebringe man \u00fea turf \u00fe\u00e6r hi \u00e6r\n w\u00e6ron \u00e6r sunnan setlgange. And h\u00e6bbe him g\u00e6worht of\n cwicbeame feower Cristes m\u00e6lo and awrite on \u00e6lcon ende:\n Matheus and Marcus, Lucas and Iohannes. Lege \u00fe\u00e6t\n- 20\n- \n Cristes m\u00e6l on \u00feone pyt neo\u00feeweardne, cwe\u00f0e \u00f0onne: Crux \n Matheus, crux Marcus, crux Lucas, crux sanctus Iohannes.\n Nim \u00f0onne \u00fea turf and sete \u00f0\u00e6r ufon on and cwe\u00fee \u00f0onne\n nigon si\u00feon \u00feas word, Crescite, and swa oft Pater Noster,\n and wende \u00fee \u00feonne eastweard, and onlut nigon si\u00f0on\n- 25\n- \n eadmodlice, and cwe\u00f0 \u00feonne \u00feas word: \n Eastweard ic stande, \u00a0\u00a0\u00a0\u00a0 arena ic me bidde,\n bidde ic \u00feone m\u00e6ran domine, \u00a0\u00a0\u00a0\u00a0 bidde \u00f0one miclan drihten,\n bidde ic \u00f0one haligan \u00a0\u00a0\u00a0\u00a0 heofonrices weard,\n eor\u00f0an ic bidde \u00a0\u00a0\u00a0\u00a0 and upheofon\n- 30\n- \n and \u00f0a so\u00fean \u00a0\u00a0\u00a0\u00a0 sancta Marian \n and heofones meaht \u00a0\u00a0\u00a0\u00a0 and heahreced,\n \u00fe\u00e6t ic mote \u00feis gealdor \u00a0\u00a0\u00a0\u00a0 mid gife drihtnes\n to\u00f0um ontynan \u00a0\u00a0\u00a0\u00a0 \u00feurh trumne ge\u00feanc,\n aweccan \u00feas w\u00e6stmas \u00a0\u00a0\u00a0\u00a0 us to woruldnytte,\n- 35\n- \n gefyllan \u00feas foldan \u00a0\u00a0\u00a0\u00a0 mid f\u00e6ste geleafan, \n wlitigigan \u00feas wancgturf, \u00a0\u00a0\u00a0\u00a0 swa se witega cw\u00e6\u00f0\n \u00fe\u00e6t se h\u00e6fde are on eor\u00ferice, \u00a0\u00a0\u00a0\u00a0 se \u00fee \u00e6lmyssan\n d\u00e6lde domlice \u00a0\u00a0\u00a0\u00a0 drihtnes \u00feances.\n Wende \u00fee \u00feonne III sunganges, astrece \u00feonne on andlang\n- 40\n- \n and arim \u00fe\u00e6r letanias and cwe\u00f0 \u00feonne: Sanctus, sanctus, \n sanctus o\u00fe ende. Sing \u00feonne Benedicite a\u00feenedon earmon\n and Magnificat and Pater Noster III, and bebeod hit Criste\n and sancta Marian and \u00fe\u00e6re halgan rode to lofe and to\n weor\u00feinga and to are \u00feam \u00fee \u00fe\u00e6t land age and eallon \u00feam \u00fee\n- 45\n- \n him under\u00f0eodde synt. \u00f0onne \u00fe\u00e6t eall sie gedon, \u00feonne \n nime man uncu\u00fe s\u00e6d \u00e6t \u00e6lmesmannum and selle him twa\n swylc, swylce man \u00e6t him nime, and gegaderie ealle his\n sulhgeteogo tog\u00e6dere; borige \u00feonne on \u00feam beame stor and\n finol and gehalgode sapan and gehalgod sealt. Nim \u00feonne\n- 50\n- \n \u00fe\u00e6t s\u00e6d, sete on \u00fe\u00e6s sules bodig, cwe\u00f0 \u00feonne: \n Erce, Erce, Erce, \u00a0\u00a0\u00a0\u00a0 eor\u00fean modor,\n geunne \u00fee se alwalda, \u00a0\u00a0\u00a0\u00a0 ece drihten,\n \u00e6cera wexendra \u00a0\u00a0\u00a0\u00a0 and wridendra,\n eacniendra \u00a0\u00a0\u00a0\u00a0 and elniendra,\n- 55\n- \n sceafta hehra, \u00a0\u00a0\u00a0\u00a0 scirra w\u00e6stma, \n and \u00fe\u00e6ra bradan \u00a0\u00a0\u00a0\u00a0 berew\u00e6stma,\n and \u00fe\u00e6ra hwitan \u00a0\u00a0\u00a0\u00a0 hw\u00e6tew\u00e6stma,\n and ealra \u00a0\u00a0\u00a0\u00a0 eor\u00fean w\u00e6stma.\n Geunne him \u00a0\u00a0\u00a0\u00a0 ece drihten\n- 60\n- \n and his halige, \u00a0\u00a0\u00a0\u00a0 \u00fee on heofonum synt, \n \u00fe\u00e6t hys yr\u00fe si gefri\u00feod \u00a0\u00a0\u00a0\u00a0 wi\u00f0 ealra feonda gehw\u00e6ne,\n and heo si geborgen \u00a0\u00a0\u00a0\u00a0 wi\u00f0 ealra bealwa gehwylc,\n \u00feara lyblaca \u00a0\u00a0\u00a0\u00a0 geond land sawen.\n Nu ic bidde \u00f0one waldend, \u00a0\u00a0\u00a0\u00a0 se \u00f0e \u00f0as woruld gesceop,\n- 65\n- \n \u00fe\u00e6t ne sy nan to \u00fe\u00e6s cwidol wif \u00a0\u00a0\u00a0\u00a0 ne to \u00fe\u00e6s cr\u00e6ftig man \n \u00fe\u00e6t awendan ne m\u00e6ge \u00a0\u00a0\u00a0\u00a0 word \u00feus gecwedene.\n \u00feonne man \u00fea sulh for\u00f0 drife and \u00fea forman furh onsceote,\n cwe\u00f0 \u00feonne:\n Hal wes \u00feu, folde, \u00a0\u00a0\u00a0\u00a0 fira modor!\n- 70\n- \n Beo \u00feu growende \u00a0\u00a0\u00a0\u00a0 on godes f\u00e6\u00feme, \n fodre gefylled \u00a0\u00a0\u00a0\u00a0 firum to nytte.\n Nim \u00feonne \u00e6lces cynnes melo and abac\u00e6 man innewerdre\n handa bradn\u00e6 hlaf and gecned hine mid meolce and mid\n haligw\u00e6tere and lecge under \u00fea forman furh. Cwe\u00fee \u00feonne:\n- 75\n- \n Ful \u00e6cer fodres \u00a0\u00a0\u00a0\u00a0 fira cinne, \n beorhtblowende, \u00a0\u00a0\u00a0\u00a0 \u00feu gebletsod weor\u00fe\n \u00fe\u00e6s haligan noman \u00a0\u00a0\u00a0\u00a0 \u00fee \u00f0as heofon gesceop\n and \u00f0as eor\u00fean \u00a0\u00a0\u00a0\u00a0 \u00fee we on lifia\u00fe;\n se god, se \u00feas grundas geworhte, \u00a0\u00a0\u00a0\u00a0 geunne us growende gife,\n- 80\n- \n \u00fe\u00e6t us corna gehwylc \u00a0\u00a0\u00a0\u00a0 cume to nytte. \n Cwe\u00f0 \u00feonne III Crescite in nomine patris, sit benedicti.\n Amen and Pater Noster \u00feriwa.","title":"Metrical Charm 1: For Unfruitful Land","type":"page"}