{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a43_04.htm","path":"neu/ascp/a43_04.htm","source_url":"https://sacred-texts.com/neu/ascp/a43_04.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n Metrical Charm 4: For a Sudden Stich\n Verse Indeterminate Saxon\n \n - \n Wi\u00f0 f\u00e6rstice feferfuige and seo reade netele, \u00f0e \u00feurh \n \u00e6rn inwyx\u00f0, and wegbrade; wyll in buteran.\n Hlude w\u00e6ran hy, la, hlude, \u00a0\u00a0\u00a0\u00a0 \u00f0a hy ofer \u00feone hl\u00e6w ridan,\n w\u00e6ran anmode, \u00a0\u00a0\u00a0\u00a0 \u00f0a hy ofer land ridan.\n- 5\n- \n Scyld \u00f0u \u00f0e nu, \u00feu \u00f0ysne ni\u00f0 \u00a0\u00a0\u00a0\u00a0 genesan mote. \n Ut, lytel spere, \u00a0\u00a0\u00a0\u00a0 gif her inne sie!\n Stod under linde, \u00a0\u00a0\u00a0\u00a0 under leohtum scylde,\n \u00fe\u00e6r \u00f0a mihtigan wif \u00a0\u00a0\u00a0\u00a0 hyra m\u00e6gen ber\u00e6ddon\n and hy gyllende \u00a0\u00a0\u00a0\u00a0 garas s\u00e6ndan;\n- 10\n- \n ic him o\u00f0erne \u00a0\u00a0\u00a0\u00a0 eft wille s\u00e6ndan, \n fleogende flane \u00a0\u00a0\u00a0\u00a0 forane togeanes.\n Ut, lytel spere, \u00a0\u00a0\u00a0\u00a0 gif hit her inne sy!\n S\u00e6t smi\u00f0, \u00a0\u00a0\u00a0\u00a0 sloh seax lytel,\n iserna, \u00a0\u00a0\u00a0\u00a0 wundrum swi\u00f0e.\n- 15\n- \n Ut, lytel spere, \u00a0\u00a0\u00a0\u00a0 gif her inne sy! \n Syx smi\u00f0as s\u00e6tan, \u00a0\u00a0\u00a0\u00a0 w\u00e6lspera worhtan.\n Ut, spere, \u00a0\u00a0\u00a0\u00a0 n\u00e6s in, spere!\n Gif her inne sy \u00a0\u00a0\u00a0\u00a0 isernes d\u00e6l,\n h\u00e6gtessan geweorc, \u00a0\u00a0\u00a0\u00a0 hit sceal gemyltan.\n- 20\n- \n Gif \u00f0u w\u00e6re on fell scoten \u00a0\u00a0\u00a0\u00a0 o\u00f0\u00f0e w\u00e6re on fl\u00e6sc scoten \n o\u00f0\u00f0e w\u00e6re on blod scoten\n o\u00f0\u00f0e w\u00e6re on li\u00f0 scoten, \u00a0\u00a0\u00a0\u00a0 n\u00e6fre ne sy \u00f0in lif at\u00e6sed;\n gif hit w\u00e6re esa gescot \u00a0\u00a0\u00a0\u00a0 o\u00f0\u00f0e hit w\u00e6re ylfa gescot\n o\u00f0\u00f0e hit w\u00e6re h\u00e6gtessan gescot, \u00a0\u00a0\u00a0\u00a0 nu ic wille \u00f0in helpan.\n- 25\n- \n \u00feis \u00f0e to bote esa gescotes, \u00a0\u00a0\u00a0\u00a0 \u00f0is \u00f0e to bote ylfa gescotes, \n \u00f0is \u00f0e to bote h\u00e6gtessan gescotes; \u00a0\u00a0\u00a0\u00a0 ic \u00f0in wille helpan.\n Fleoh \u00fe\u00e6r \u00a0\u00a0\u00a0\u00a0 on fyrgenheafde.\n Hal westu, \u00a0\u00a0\u00a0\u00a0 helpe \u00f0in drihten!\n Nim \u00feonne \u00fe\u00e6t seax, ado on w\u00e6tan.","title":"Metrical Charm 4: For a Sudden Stich","type":"page"}