{"collection":"Northern European Mythology","html_url":"https://unchartedknowledge.5gfusion.net/browse/neu/ascp/a43_11.htm","path":"neu/ascp/a43_11.htm","source_url":"https://sacred-texts.com/neu/ascp/a43_11.htm","text":"Sacred Texts\u00a0\n Legends and Sagas\u00a0\n WordGumbo: Old English Dictionaries [External Site]\n Index\u00a0\n Previous\u00a0\n Next\u00a0\n \n \n Metrical Charm 11: A Journey Charm\n Verse Indeterminate Saxon\n \n - \n Ic me on \u00feisse gyrde beluce \u00a0\u00a0\u00a0\u00a0 and on godes helde bebeode \n wi\u00f0 \u00feane sara stice, \u00a0\u00a0\u00a0\u00a0 wi\u00f0 \u00feane sara slege,\n wi\u00f0 \u00feane grymma gryre,\n wi\u00f0 \u00f0ane micela egsa \u00a0\u00a0\u00a0\u00a0 \u00fee bi\u00f0 eghwam la\u00f0,\n- 5\n- \n and wi\u00f0 eal \u00fe\u00e6t la\u00f0 \u00a0\u00a0\u00a0\u00a0 \u00fee in to land fare. \n Sygegealdor ic begale, \u00a0\u00a0\u00a0\u00a0 sigegyrd ic me wege,\n wordsige and worcsige. \u00a0\u00a0\u00a0\u00a0 Se me dege;\n ne me mere ne gemyrre, \u00a0\u00a0\u00a0\u00a0 ne me maga ne geswence,\n ne me n\u00e6fre minum feore \u00a0\u00a0\u00a0\u00a0 forht ne gewur\u00fee,\n- 10\n- \n ac geh\u00e6le me \u00e6lmihtig and sunu \u00a0\u00a0\u00a0\u00a0 and frofre gast, \n ealles wuldres \u00a0\u00a0\u00a0\u00a0 wyr\u00f0ig dryhten,\n swa swa ic gehyrde \u00a0\u00a0\u00a0\u00a0 heofna scyppende.\n Abrame and Isace\n and swilce men, \u00a0\u00a0\u00a0\u00a0 Moyses and Iacob,\n- 15\n- \n and Dauit and Iosep \u00a0\u00a0\u00a0\u00a0 \n and Evan and Annan \u00a0\u00a0\u00a0\u00a0 and Elizabet,\n Saharie and ec Marie, \u00a0\u00a0\u00a0\u00a0 modur Cristes,\n and eac \u00fe\u00e6 gebro\u00feru, \u00a0\u00a0\u00a0\u00a0 Petrus and Paulus,\n and eac \u00feusend \u00a0\u00a0\u00a0\u00a0 \u00feinra engla\n- 20\n- \n clipige ic me to are \u00a0\u00a0\u00a0\u00a0 wi\u00f0 eallum feondum. \n Hi me ferion and fri\u00feion \u00a0\u00a0\u00a0\u00a0 and mine fore nerion,\n eal me gehealdon, \u00a0\u00a0\u00a0\u00a0 me gewealdon,\n worces stirende; \u00a0\u00a0\u00a0\u00a0 si me wuldres hyht,\n hand ofer heafod, \u00a0\u00a0\u00a0\u00a0 haligra rof,\n- 25\n- \n sigerofra sceolu, \u00a0\u00a0\u00a0\u00a0 so\u00f0f\u00e6stra engla. \n Biddu ealle \u00a0\u00a0\u00a0\u00a0 bli\u00f0u mode\n \u00fe\u00e6t me beo Matheus helm, \u00a0\u00a0\u00a0\u00a0 Marcus byrne,\n leoht, lifes rof, \u00a0\u00a0\u00a0\u00a0 Lucos min swurd,\n scearp and scirecg, \u00a0\u00a0\u00a0\u00a0 scyld Iohannes,\n- 30\n- \n wuldre gewlitegod \u00a0\u00a0\u00a0\u00a0 w\u00e6lgar Serafhin. \n For\u00f0 ic gefare, \u00a0\u00a0\u00a0\u00a0 frind ic gemete,\n eall engla bl\u00e6d, \u00a0\u00a0\u00a0\u00a0 eadiges lare.\n Bidde ic nu sigeres god \u00a0\u00a0\u00a0\u00a0 godes miltse,\n si\u00f0f\u00e6t godne, \u00a0\u00a0\u00a0\u00a0 smylte and lihte\n- 35\n- \n windas on waro\u00feum. \u00a0\u00a0\u00a0\u00a0 Windas gefran, \n circinde w\u00e6ter \u00a0\u00a0\u00a0\u00a0 simble geh\u00e6lede\n wi\u00f0 eallum feondum. \u00a0\u00a0\u00a0\u00a0 Freond ic gemete wi\u00f0,\n \u00fe\u00e6t ic on \u00fe\u00e6s \u00e6lmihtgian fri\u00f0 \u00a0\u00a0\u00a0\u00a0 wunian mote,\n belocun wi\u00f0 \u00feam la\u00fean, \u00a0\u00a0\u00a0\u00a0 se me lyfes eht,\n- 40\n- \n on engla bl\u00e6d \u00a0\u00a0\u00a0\u00a0 gesta\u00feelod, \n and inna halre hand \u00a0\u00a0\u00a0\u00a0 heofna rices,\n \u00fea hwile \u00fee ic on \u00feis life \u00a0\u00a0\u00a0\u00a0 wunian mote.\n Amen.","title":"Metrical Charm 11: A Journey Charm","type":"page"}