{"collection":"Northern European Mythology","html_url":"https://unchartedknowledge.5gfusion.net/browse/neu/eng/boeb/boeb19.htm","path":"neu/eng/boeb/boeb19.htm","source_url":"https://sacred-texts.com/neu/eng/boeb/boeb19.htm","text":"As I was walking all alane,\n I heard twa corbies making a maen:\n The tane unto the t'ither did say,\n \"Whaur shall we gang and dine the day?\"\n\"O doun beside yon auld fail dyke,\n I wot there lies a new-slain knight;\n And naebody kens that he lies there\n But his hawk, his hound, and his lady fair.\n\"His hound is to the hunting gane,\n His hawk to fetch the wild-fowl hame,\n His lady's ta'en another mate,\n Sae we may mak' our dinner sweet.\nO we'll sit on his white hause bane,\n And I'll pyke out his bonny blue e'en;\n Wi' ae lock o' his gowden hair\n We'll theek our nest when it blaws bare.\n\"Mony a ane for him makes maen,\n But nane shall ken whaur he is gane.\n Over his banes when they are bare,\n The wind shall blaw for evermair.\"","title":"A Book of Old English Ballads: The Twa Corbies","type":"page"}