{"collection":"Northern European Mythology","html_url":"https://unchartedknowledge.5gfusion.net/browse/neu/eng/child/ch013.htm","path":"neu/eng/child/ch013.htm","source_url":"https://sacred-texts.com/neu/eng/child/ch013.htm","text":"13A.1 \u2018WHAT bluid\u2019s that on thy coat lap,\nSon Davie, son Davie?\nWhat bluid\u2019s that on thy coat lap?\nAnd the truth come tell to me.\u2019\n13A.2 \u2018It is the bluid of my great hawk,\nMother lady, mother lady:\nIt is the bluid of my great hawk,\nAnd the truth I have told to thee.\u2019\n13A.3 \u2018Hawk\u2019s bluid was neer sae red,\nSon Davie, son Davie:\nHawk\u2019s bluid was neer sae red,\nAnd the truth come tell to me.\u2019\n13A.4 \u2018It is the bluid of my greyhound,\nMother lady, mother lady:\nIt is the bluid of my greyhound,\nAnd it wadna rin for me.\u2019\n13A.5 \u2018Hound\u2019s bluid was neer sae red,\nSon Davie, son Davie:\nHound\u2019s bluid was neer sae red,\nAnd the truth come tell to me.\u2019\n13A.6 \u2018It is the bluid o my brither John,\nMother lady, mother lady:\nIt is the bluid o my brither John,\nAnd the truth I have told to thee.\u2019\n13A.7 \u2018What about did the plea begin,\nSon Davie, son Davie?\u2019\n\u2018It began about the cutting of a willow wand\nThat would never been a tree.\u2019\n13A.8 \u2018What death dost thou desire to die,\nSon Davie, son Davie?\nWhat death dost thou desire to die?\nAnd the truth come tell to me.\u2019\n13A.9 \u2018I\u2019ll set my foot in a bottomless ship,\nMother lady, mother lady:\nI\u2019ll set my foot in a bottomless ship,\nAnd ye\u2019ll never see mair o me.\u2019\n13A.10 \u2018What wilt thou leave to thy poor wife,\nSon Davie, son Davie?\u2019\n\u2018Grief and sorrow all her life,\nAnd she\u2019ll never see mair o me.\u2019\n13A.11 \u2018What wilt thou leave to thy old son,\nSon Davie, son Davie?\u2019\n\u2018I\u2019ll leave him the weary world to wander up and down,\nAnd he\u2019ll never get mair o me.\u2019\n13A.12 \u2018What wilt thou leave to thy mother dear,\nSon Davie, son Davie?\u2019\n\u2018A fire o coals to burn her, wi hearty cheer,\nAnd she\u2019ll never get mair o me.\u2019\n13B: Edward\n13B.1 \u2018WHY dois your brand sae drap wi bluid,\nEdward, Edward,\nWhy dois your brand sae drap wi bluid,\nAnd why sae sad gang yee O?\u2019\n\u2018O I hae killed my hauke sae guid,\nMither, mither,\nO I hae killed my hauke sae guid,\nAnd I had nae mair bot hee O.\u2019\n13B.2 \u2018Your haukis bluid was nevir sae reid,\nEdward, Edward,\nYour haukis bluid was nevir sae reid,\nMy deir son I tell thee O.\u2019\n\u2018O I hae killed my reid-roan steid,\nMither, mither,\nO I hae killed my reid-roan steid,\nThat erst was sae fair and frie O.\u2019\n13B.3 \u2018Your steid was auld, and ye hae gat mair,\nEdward, Edward,\nYour steid was auld, and ye hae gat mair,\nSum other dule ye drie O.\u2019\n\u2018O I hae killed my fadir deir,\nMither, mither,\nO I hae killed my fadir deir,\nAlas, and wae is mee O!\u2019\n13B.4 \u2018And whatten penance wul ye drie, for that,\nEdward, Edward?\nAnd whatten penance will ye drie for that?\nMy deir son, now tell me O.\u2019\n\u2018Ile set my feit in yonder boat,\nMither, mither,\nIle set my feit in yonder boat,\nAnd Ile fare ovir the sea O.\u2019\n13B.5 \u2018And what wul ye doe wi your towirs and your ha,\nEdward, Edward?\nAnd what wul ye doe wi your towirs and your ha,\nThat were sae fair to see O?\u2019\n\u2018Ile let thame stand tul they doun fa,\nMither, mither,\nIle let thame stand tul they doun fa,\nFor here nevir mair maun I bee O.\u2019\n13B.6 \u2018And what wul ye leive to your bairns and your wife,\nEdward, Edward?\nAnd what wul ye leive to your bairns and your wife,\nWhan ye gang ovir the sea O?\u2019\n\u2018The warldis room, late them beg thrae life,\nMither, mither,\nThe warldis room, late them beg thrae life,\nFor thame nevir mair wul I see O.\u2019\n13B.7 \u2018And what wul ye leive to your ain mither deir,\nEdward, Edward?\nAnd what wul ye leive to your ain mither deir?\nMy deir son, now tell me O.\u2019\n\u2018The curse of hell frae me sall ye beir,\nMither, mither,\nThe curse of hell frae me sall ye beir,\nSic counseils ye gave to me O.\u2019\n13C: Edward\n13C.1 \u2018O WHAT did the fray begin about?\nMy son, come tell to me:\u2019\n\u2018It began about the breaking o the bonny hazel wand,\nAnd a penny wad hae bought the tree.\u2019","title":"The Child Ballads: 13. Edward","type":"page"}