{"collection":"Northern European Mythology","html_url":"https://unchartedknowledge.5gfusion.net/browse/neu/eng/child/ch023.htm","path":"neu/eng/child/ch023.htm","source_url":"https://sacred-texts.com/neu/eng/child/ch023.htm","text":"23.1 HIT wes upon a Scere-thorsday that ure loverd aros;\nFul milde were the wordes he spec to Judas.\n23.2 \u2018Judas, thou most to Jurselem, oure mete for to bugge;\nThritti platen of selver thou bere up othi rugge.\n23.3 \u2018Thou comest fer ithe brode stret, fer ithe brode strete;\nSumme of thine tunesmen ther thou meiht imete.\u2019\n23.4 . . . . .\nImmette wid is soster, the swikele wimon.\n23.5 \u2018Judas, thou were wrthe me stende the wid ston,\nFor the false prophete that tou bilevest upon.\u2019\n23.6 \u2018Be stille, leve soster, thin herte the tobreke!\nWiste min loverd Crist, ful wel he wolde be wreke.\u2019\n23.7 \u2018Judas, go thou on the roc, heie upon the ston;\nLei thin heved imy barm, slep thou the anon.\u2019\n23.8 Sone so Judas of slepe was awake,\nThritti platen of selver from hym weren itake.\n23.9 He drou hymselve bi the cop, that al it lavede a blode;\nThe Jewes out of Jurselem awenden he were wode.\n23.10 Foret hym com the riche Jeu that heihte Pilatus:\n\u2018Wolte sulle thi loverd, that hette Jesus?\u2019\n23.11 \u2018I nul sulle my loverd [for] nones cunnes eihte,\nBote hit be for the thritti platen that he me bitaihte.\u2019\n23.12 \u2018Wolte sulle thi lord Crist for enes cunnes golde?\u2019\n\u2018Nay, bote hit be for the platen that he habben wolde.\u2019\n23.13 In him com ur lord Crist gon, as is postles seten at mete:\n\u2018Wou sitte ye, postles, ant wi nule ye ete?\n23.14 [\u2018Wou sitte ye, postles, ant wi nule ye ete?]\nIc am ibouht ant isold today for oure mete.\u2019\n23.15 Up stod him Judas: \u2018Lord, am I that . . .?\n\u2018I nas never othe stude ther me the evel spec.\u2019\n23.16 Up him stod Peter, and spec wid al is mihte,\n. . . . . .\n23.17 \u2018Thau Pilatus him come wid ten hundred cnihtes,\nYet ic wolde, loverd, for thi love fihte.\u2019\n23.18 \u2018Still thou be, Peter, wel I the icnowe;\nThou wolt fursake me thrien ar the coc him crowe.\u2019","title":"The Child Ballads: 23. Judas","type":"page"}