{"collection":"Northern European Mythology","html_url":"https://unchartedknowledge.5gfusion.net/browse/neu/eng/child/ch111.htm","path":"neu/eng/child/ch111.htm","source_url":"https://sacred-texts.com/neu/eng/child/ch111.htm","text":"111.1 THROUGHE a forest as I can ryde,\nTo take my sporte yn an mornyng,\nI cast my eye on euery syde,\nI was ware of a bryde syngynge.\n111.2 I sawe a faire mayde come rydyng;\nI speake to hur of loue, I trowe;\nShe answered me all yn scornyng,\nAnd sayd, The crowe shall byte yow.\n111.3 \u2018I pray yow, damesell, scorne me nott;\nTo wyn your loue ytt ys my wyll;\nFor your loue I haue dere bought,\nAnd I wyll take good hede thertyll.\u2019\n111.4 \u2018Nay, for God, ser, that I nyll;\nI tell the, Jenken, as I trowe,\nThou shalt nott fynde me suche a gyll;\nTherfore the crowe shall byte yow.\u2019\n111.5 He toke then owt a good golde ryng,\nA purse of velweytt, that was soo fyne:\n\u2018Haue ye thys, my dere swetyng,\nWith that ye wylbe lemman myn.\u2019\n111.6 \u2018Be Cryst, I dare nott, for my dame,\nTo dele with hym that I doo nott knowe;\nFor soo I myght dyspyse my name;\nTherfore the crow shall byte yow.\u2019\n111.7 He toke hur abowte the mydell small,\nThat was soo faire of hyde and hewe;\nHe kyssed hur cheke as whyte as whall,\nAnd prayed hur that she wolde vpon hym rewe.\n111.8 She scornyd hym, and callyd hym Hew;\nHis loue was as a paynted blowe:\n\u2018To-day me, to-morrowe a newe;\nTherfore the crow shall byte yow.\u2019\n111.9 He toke hur abowte the mydell small,\nAnd layd hur downe vpon the grene;\nTwys or thrys he served hur soo withall,\nHe wolde nott stynt yet, as I wene.\n111.10 \u2018But sythe ye haue i-lyen me bye,\nYe wyll wedde me now, as I trowe:\u2019\n\u2018I wyll be aduysed, Gyll,\u2019 sayd he,\n\u2018For now the pye hathe peckyd yow.\u2019\n111.11 \u2018But sythe ye haue i-leyn me by,\nAnd brought my body vnto shame,\nSome of your good ye wyll part with me,\nOr elles, be Cryst, ye be to blame.\u2019\n111.12 \u2018I wylbe aduysed,\u2019 he sayde;\n\u2018THe wynde ys wast that thow doyst blowe;\nI haue a-noder that most be payde;\nTherfore the pye hathe pecked yow.\u2019\n111.13 \u2018Now sythe ye haue i-leyn me bye,\nA lyttle thyng ye wyll tell;\nIn case that I with chylde be,\nWhat ys your name? Wher doo ye dwell?\u2019\n111.14 \u2018At Yorke, at London, at Clerkenwell,\nAt Leycester, Cambryge, at myrye Brystowe;\nSome call me Rychard, Robart, Jacke, and Wyll;\nFor now the pye hathe peckyd yow.\n111.15 \u2018But, all medons, be ware be rewe,\nAnd lett no man downe yow throwe;\nFor and yow doo, ye wyll ytt rewe,\nFor then the pye wyll pecke yow.\u2019\n111.16 \u2018Farewell, corteor, ouer the medoo,\nPluke vp your helys, I yow beshrew!\nYour trace, wher so euer ye ryde or goo,\nCrystes curse goo wythe yow!\n111.17 \u2018Thoughe a knave hathe by me layne,\nYet am I noder dede nor slowe;\nI trust to recouer my harte agayne,\nAnd Crystes curse goo wythe yow!\u2019","title":"The Child Ballads: 111. Crow and Pie","type":"page"}