{"collection":"Northern European Mythology","html_url":"https://unchartedknowledge.5gfusion.net/browse/neu/eng/child/ch228.htm","path":"neu/eng/child/ch228.htm","source_url":"https://sacred-texts.com/neu/eng/child/ch228.htm","text":"228A.1 \u2018AS I cam in by Glasgow town,\nThe Highland troops were a\u2019 before me,\nAnd the bonniest lass that eer I saw,\nShe lives in Glasgow, they ca her Peggie.\n228A.2 \u2018I wad gie my bonnie black horse,\nSo wad I my gude grey naigie,\nIf I were twa hundred miles in the north,\nAnd nane wi me but my bonnie Peggie.\u2019\n228A.3 Up then spak her father dear,\nDear wow! but he was wondrous sorrie;\n\u2018Weel may ye steal a cow or a yowe,\nBut ye dare nae steal my bonnie Peggie.\u2019\n228A.4 Up then spak her mother dear,\nDear wow! but she spak wondrous sorrie;\nNow since I have brought ye up this length,\nWad ye gang awa wi a Highland fellow?\u2019\n228A.5 He set her on his bonnie black horse,\nHe set himsel on his gude grey naigie,\nAnd they have ridden oer hills and dales,\nAnd he\u2019s awa wi his bonnie Peggie.\n228A.6 They have ridden oer hills and dales,\nThey have ridden oer mountains many,\nUntil they cam to a low, low glen,\nAnd there he\u2019s lain down wi his bonnie Peggie.\n228A.7 Up then spak the Earl of Argyle,\nDear wow! but he spak wondrous sorrie;\n\u2018The bonniest lass in a\u2019 Scotland\nIs off and awa wi a Highland fellow!\u2019\n228A.8 Their bed was of the bonnie green grass,\nTheir blankets war o the hay sae bonnie;\nHe folded his philabeg below her head,\nAnd he\u2019s lain down wi his bonnie Peggie.\n228A.9 Up then spak the bonny Lowland lass,\nAnd wow! but she spak wondrous sorrie;\n\u2018I\u2019se warrant my mither wad hae a gay sair heart\nTo see me lien here wi you, my Willie.\u2019\n228A.10 \u2018In my father\u2019s house there\u2019s feather-beds,\nFeather-beds, and blankets mony;\nThey\u2019re a\u2019 mine, and they\u2019ll sune be thine,\nAnd what needs your mither be sae sorrie, Peggie?\n228A.11 \u2018Dinna you see yon nine score o kye,\nFeeding on yon hill sae bonnie?\nThey\u2019re a\u2019 mine, and they\u2019ll sune be thine,\nAnd what needs your mither be sorrie, Peggie?\n228A.12 \u2018Dinna you see yon nine score o sheep,\nFeeding on yon brae sae bonnie?\nThey\u2019re a\u2019 mine, and they\u2019ll sune be thine,\nAnd what needs your mither be sorrie for ye?\n228A.13 \u2018Dinna ye see yon bonnie white house,\nShining on yon brae sae bonnie?\nAnd I am the Earl of the Isle of Skye,\nAnd surely my Peggie will be ca\u2019d a lady.\u2019\n228B: Glasgow Peggie\n228B.1 THE Lawland lads think they are fine,\nBut the Hieland lads are brisk and gaucy,\nAnd they are awa, near Glasgow toun,\nTo steal awa a bonnie lassie.\n228B.2 \u2018I wad gie my gude brown steed,\nAnd sae wad I my gude grey naigie,\nThat I war fifty miles frae the toun,\nAnd nane wi me but my bonnie Peggy.\u2019\n228B.3 But up then spak the auld gudman,\nAnd vow! but he spak wondrous saucie;\n\u2018Ye may steal awa our cows and ewes,\nBut ye sanna get our bonnie lassie.\u2019\n228B.4 \u2018I have got cows and ewes anew,\nI\u2019ve got gowd and gear already;\nSae I dinna want your cows nor ewes,\nBut I will hae your bonnie Peggy.\u2019\n228B.5 \u2018I\u2019ll follow you oure moss and muir,\nI\u2019ll follow you oure mountains many,\nI\u2019ll follow you through frost and snaw,\nI\u2019ll stay na langer wi my daddie.\u2019\n228B.6 He set her on a gude brown steed,\nHimself upon a gude grey naigie;\nThey\u2019re oure hills, and oure dales,\nAnd he\u2019s awa wi his bonnie Peggy.\n228B.7 As they rade out by Glasgow toun,\nAnd doun by the hills o Achildounie,\nThere they met the Earl of Hume,\nAnd his auld son, riding bonnie.\n228B.8 Out bespak the Earl of Hume,\nAnd O! but he spak wondrous sorry;\n\u2018The bonniest lass about a\u2019 Glasgow toun\nThis day is awa wi a Hieland laddie!\u2019\n228B.9 As they rade bye auld Drymen toun,\nThe lasses leuch and lookit saucy,\nThat the bonniest lass they ever saw\nSud be riding awa wi a Hieland laddie.\n228B.10 They rode on through moss and muir,\nAnd so did they owre mountains many,\nUntil that they cam to yonder glen,\nAnd she\u2019s lain doun wi her Hieland laddie.\n228B.11 Gude green hay was Peggy\u2019s bed,\nAnd brakens war her blankets bonnie,\nWi his tartan plaid aneath her head;\nAnd she\u2019s lain doun wi her Hieland laddie.\n228B.12 \u2018There\u2019s beds and bowsters in my father\u2019s house,\nThere\u2019s sheets and blankets, and a\u2019 thing ready,\nAnd wadna they be angry wi me,\nTo see me lie sae wi a Hieland laddie!\u2019\n228B.13 \u2018Tho there\u2019s beds and beddin in your father\u2019s house,\nSheets and blankets, and a\u2019 made ready,\nYet why sud they be angry wi thee,\nThough I be but a Hieland laddie?\n228B.14 \u2018It\u2019s I hae fifty acres of land,\nIt\u2019s a\u2019 plowd and sawn already;\nI am Donald, the Lord of Skye,\nAnd why sud na Peggy be calld a lady?\n228B.15 \u2018I hae fifty gude milk kye,\nA\u2019 tied to the staws already;\nI am Donald, the Lord of Skye,\nAnd why sud na Peggy be calld a lady?\n228B.16 \u2018See ye no a\u2019 yon castles and towrs?\nThe sun sheens owre them a sae bonnie;\nI am Donald, the Lord of Skye,\nI think I\u2019ll mak ye as blythe as onie.\u2019\n228B.17 A\u2019 that Peggy left behind\nWas a cot-house and a wee kail-yardie;\nNow I think she is better by far\nThan tho she had got a Lawland lairdie.\n228C: Glasgow Peggie\n228C.* * * *\n\u2018HE set her on his bonnie black horse,\nHe set himsel on his gude grey naigie;\nHe has ridden over hills, he has ridden over dales,\nAnd he\u2019s quite awa wi my bonny Peggy.\n228C.2 \u2018Her brow it is brent and her middle it is jimp,\nHer arms are long and her fingers slender;\nOne sight of her eyes makes my very heart rejoice,\nAnd wae\u2019s my heart that we should sunder!\u2019\n228C.3 His sheets were of the good green hay,\nHis blankets were of the brackens bonnie;\nHe\u2019s laid his trews beneath her head,\nAnd she\u2019s lain down wi her Highland laddie.\n228C.4 \u2018I am my mother\u2019s ae daughter,\nAnd she had nae mair unto my daddie,\nAnd this night she would have a sore, sore heart\nFor to see me lye down with a Highland laddie.\u2019\n228C.5 \u2018Ye are your mother\u2019s ae daughter,\nAnd she had nae mae unto your daddie;\nThis night she need not have a sore, sore heart\nFor to see you lie down with a Highland laddie.\n228C.6 \u2018I have four-and-twenty acres of land,\nIt is ploughed, it is sown, and is always ready,\nAnd you shall have servants at your command;\nAnd why should you slight a Highland laddie?\n228C.7 \u2018I have four-and-twenty good milk-kye,\nThey are feeding on yon meadow bonnie;\nBesides, I have both lambs and ewes,\nGoing low in the haughs o Galla water.\n228C.8 \u2018My house it stands on yon hill-side,\nMy broadsword, durk, and bow is ready,\nAnd you shall have servants at your command;\nAnd why may not Peggy be called a lady?\u2019\n228D: Glasgow Peggie\n228D.1 A BONNY laddie brisk and gay,\nA handsome youth sae brisk and gaddie,\nAnd he is on to Glasgow town,\nTo steal awa his bonny Peggy.\n228D.2 When he came into Glasgow town,\nUpon her father\u2019s green sae steady,\n\u2018Come forth, come forth, old man,\u2019 he says,\n\u2018For I am come for bonny Peggy.\u2019\n228D.3 Out it spake her father then;\n\u2018Begone from me, ye Highland laddie;\nThere\u2019s nane in a\u2019 the West Country\nDare steal from me my bonny Peggy.\u2019\n228D.4 \u2018I\u2019ve ten young men all at my back,\nThat ance to me were baith true and steady;\nIf ance I call, they\u2019ll soon be nigh,\nAnd bring to me my bonny Peggy.\u2019\n228D.5 Out it spake her mother then,\nDear! but she spake wondrous saucy;\nSays, Ye may steal a cow or ewe,\nBut I\u2019ll keep sight o my ain lassie.\n228D.6 \u2018Hold your tongue, old woman,\u2019 he says,\n\u2018Ye think your wit it is fu ready;\nFor cow nor ewe I ever stole,\nBut I will steal your bonny Peggy.\u2019\n228D.7 Then all his men they boldly came,\nThat was to him baith true and steady,\nAnd thro the ha they quickly went,\nAnd forth they carried bonny Peggy.\n228D.8 Her father gae mony shout and cry,\nHer mother cursed the Highland laddie;\nBut he heard them as he heard them not,\nBut fixd his eye on bonny Peggy.\n228D.9 He set her on his milk-white steed,\nAnd he himsell on his grey naigie;\nStill along the way they rode,\nAnd he\u2019s awa wi bonny Peggy.\n228D.10 Says, I wad gie baith cow and ewe,\nAnd sae woud I this tartan plaidie,\nThat I was far into the north,\nAnd alang wi me my bonny Peggy.\n228D.11 As they rode down yon pleasant glen,\nFor trees and brambles were right mony,\nThere they met the Earl o Hume,\nAnd his young son, were riding bonny.\n228D.12 Then out it spake the young Earl Hume,\nDear! but he spake wondrous gaudie;\n\u2018I\u2019m wae to see sae fair a dame\nRiding alang wi a Highland laddie.\u2019\n228D.13 \u2018Hold you tongue, ye young Earl Hume,\nO dear! but ye do speak right gaudie;\nThere\u2019s nae a lord in a\u2019 the south\nDare eer compete wi a Highland laddie.\u2019\n228D.14 Then he rade five miles thro the north,\nThro mony hills sae rough and scroggie,\nTill they came down to a low glen,\nAnd he lay down wi bonny Peggy.\n228D.15 Then he inclosed her in his arms,\nAnd rowd her in his tartan plaidie:\n\u2018There are blankets and sheets in my father\u2019s house,\nHow have I lien down wi a Highland laddie!\u2019\n228D.16 Says he, There are sheep in my father\u2019s fauld,\nAnd every year their wool is ready;\nBy the same our debts we pay,\nAltho I be but a Highland laddie.\n228D.17 \u2018There are fifty cows in my father\u2019s byre,\nThat all are tyed to the stakes and ready,\nFive thousand pounds I hae ilk year,\nAltho I be but a Highland laddie.\n228D.18 \u2018My father has fifty well shod horse,\nBesides your steed and my grey naigie;\nI\u2019m Donald o the Isle o Sky,\nWhy may not you be ca\u2019d a lady?\n228D.19 \u2018See ye not yon fine castle,\nOn yonder hill that stands sae gaudie?\nAnd there we\u2019ll win this very night,\nWhere ye\u2019ll enjoy your Highland laddie.\u2019\n228E: Glasgow Peggie\n228E.1 THE Hielan lads sae brisk and braw,\nThe Hielan lads sae brisk and gaudie,\nHae gane awa to Glasgow town,\nTo steal awa the bonny Peggy.\n228E.2 As they came on to Glasgow town,\nAnd passd the banks and braes sae bonny,\nThere they espied the weel-faurd may,\nAnd she said to them her name was Peggy.\n228E.3 Their chief did meet her father soon,\nAnd O! but he was wondrous angry;\nSays, Ye may steal my owsen and kye,\nBut ye maunna steal my bonnie Peggy.\n228E.4 \u2018O haud your tongue, ye gude auld man,\nFor I\u2019ve got cows and ewes already;\nI come na to steal your owsen and kye,\nBut I will steal your bonny Peggy.\u2019\n228E.5 He set her on a milk-white steed,\nAnd he himsel rode a gude grey naigie,\nAnd they are on mony miles to the north,\nAnd nane wi them but the bonny Peggy.\n228E.6 \u2018I hae fifty acres o gude red lan,\nAnd a\u2019 weel ploughd and sawn already,\nAnd why should your father be angry wi me,\nAnd ca me naething but a Hielan laddie?\n228E.7 \u2018I hae twenty weel mounted steeds,\nBlack and brown and grey, already;\nAnd ilk ane o them is tended by a groom,\nAltho I be but a Hielan laddie.\n228E.8 \u2018I hae now ten thousand sheep,\nA\u2019 feeding on yon braes sae bonny,\nAnd ilka hundred a shepherd has,\nAltho I be but a Hieland laddie.\n228E.9 \u2018I hae a castle on yonder hill,\nIt\u2019s a\u2019 set roun wi windows many;\nI\u2019m Lord M\u2019Donald o the whole Isle of Skye;\nAnd why shouldna Peggy be ca\u2019d my Lady?\u2019\n228E.10 Now a\u2019 that Peggy had before\nWas a wee cot-house and a little kail-yairdie,\nBut now she is lady o the whole Isle o Skye,\nAnd now bonny Peggy is ca\u2019d my Lady.\n228F: Glasgow Peggie\n228F.1 THE young Maclean is brisk and bauld,\nThe young Maclean is rash an ready,\nAn he is to the Lowlands gane,\nTo steal awa a bonnie ladye.\n* * * * *\n228F.2 Out an spak her auld father,\nAn O! but he spak wondrous angry;\n\u2018Ye may steal my cows an ewes,\nBut ye shall not steal my dochter Peggie.\u2019\n228F.3 \u2018O haud your tongue, ye gude auld man,\nFor I hae gear enough already;\nI cum na for your cows an ewes,\nBut I cum for your dochter Peggie.\u2019\n228F.4 He set her on a milk-white steed,\nHimsel upon a gude gray naggie,\nAn they are to the Highlands gane,\nThe young Maclean an his bonnie ladye.\n228[G]: Glasgow Peggie\n228[G].1 It was on a day, and a fine summer\u2019s day,\nWhen the Lowlands they were making ready,\nThere I espied a weel-far\u2019d lass,\nShe was gaun to Glasgow, and they ca her Peggy.\n228[G.2] It\u2019s up then spak a silly auld man,\nAnd O but he spak wondrous poorly!\nSayin, Ye may steal awa my cows and my ewes,\nBut ye\u2019ll never steal awa my bonny Peggy.\n228[G.3] \u2018O haud yer tongue, ye silly auld man,\nFor ye hae said eneugh already,\nFor I\u2019ll never steal awa yer cows and yer ewes,\nBut I\u2019ll steal awa yer bonny Peggy.\u2019\n228[G.4] So he mounted her on a milk-white steed,\nHimsel upon a wee grey naigie,\nAnd they hae ridden ower hill and dale,\nAnd over moors and mosses many.\n228[G.5] They rade till they cam to the head o yon glen,\nIt might hae frightened anybody;\nHe said, Whether will ye go alongst with me,\nOr will ye return back again to your mammie?\n* * * * *\n228[G.6] Their bed was o the green, green grass,\nAnd their blankets o the bracken sae bonnie,\nAnd he\u2019s laid his trews beneath their head,\nAnd Peggy\u2019s lain doun wi her Heilan laddie.\n228[G.7] They lay till it cam to the break o day,\nThen up they rose and made them ready;\nHe said, Whether will ye go alongst with me,\nOr will ye return back again to your mammie?\n228[G.8] \u2018I\u2019ll follow you through frost and snow,\nI\u2019ll follow your through dangers many,\nAnd wherever ye go I will go alongst with you,\nFor I\u2019ll never return back again to my mammie.\u2019\n228[G.9] \u2018I hae four-and-twenty gude milk-kye,\nThey\u2019re a\u2019 bun in yon byre sae bonny,\nAnd I am the earl o the Isle o Skye,\nAnd why should not Peggy be called a lady?\n228[G.10] \u2018I hae fifty acres o gude land,\nA\u2019 ploughed ower and sawn sae bonny,\nAnd I am young Donald o the Isle o Skye,\nAnd wherever I\u2019m laird I\u2019ll make ye lady.\u2019","title":"The Child Ballads: 228. Glasgow Peggie","type":"page"}