{"collection":"Northern European Mythology","html_url":"https://unchartedknowledge.5gfusion.net/browse/neu/eng/child/ch234.htm","path":"neu/eng/child/ch234.htm","source_url":"https://sacred-texts.com/neu/eng/child/ch234.htm","text":"Sacred Texts\u00a0\n Legends & Sagas\u00a0\n England\u00a0\n Index\u00a0\n Previous\u00a0\n Next\u00a0\n \n \n \n 234A: Charlie MacPherson\n \n \n 234A.1 CHARLIE MACPHERSON, that braw Hieland lad[die],\n On Valentine\u2019s even cam doun to Kinaltie,\n Courtit Burd Hellen, baith wakin an sleepin:\n \u2018Oh, fair fa them has my love in keepin!\u2019\n 234A.2 Charlie MacPherson cam doun the dykeside,\n Baith Milton an Muirton an a\u2019 bein his guide;\n Baith Milton an Muirton an auld Water Nairn,\n A\u2019 gaed wi him, for to be his warn.\n 234A.3 Whan he cam to the hoose o Kinaltie,\n \u2018Open your yetts, mistress, an lat us come in!\n Open your yetts, mistress, an lat us come in!\n For here\u2019s a commission come frae your gudeson.\n 234A.4 \u2018Madam,\u2019 says Charlie, \u2019whare [i]s your dochter?\n Mony time have I come to Kinatie an socht her;\n Noo maun she goe wi me mony a mile,\n Because I\u2019ve brocht mony men frae the West Isle.\u2019\n 234A.5 \u2018As for my dochter, she has gane abroad,\n You\u2019ll no get her for her tocher gude;\n She\u2019s on to Whitehouse, to marry auld Gairn:\n Oh, fair fa them that wait on my bairn!\u2019\n 234A.6 Charlie MacPherson gaed up the dykeside,\n Baith Muirtoun an Milton an a\u2019 bein his guide;\n Baith Muirton an Milton an auld Water Nairn,\n A\u2019 gaed wi him, for to be his warn.\n 234A.7 Whan he cam to the hoose in Braemar,\n Sae weel as he kent that his Nellie was there!\n An Nellie was sittin upon the bed-side,\n An every one there was ca\u2019ing her, bride.\n 234A.8 The canles gaed oot, they waurna weel licht,\n Swords an spears they glancet fou bright;\n Sae laith as she was her true-love to beguile,\n Because he brocht mony men frae the West Isle.\n * * * * *\n \n \n \n 234B: Charlie MacPherson\n \n \n 234B.1 CHARLIE MRR\u2019rrPHERSON, that brisk Highland laddie,\n At Valentine even he came to Kinadie:\n 234B.2 To court her Burd Helen, baith waking and sleeping;\n Joy be wi them that has her a keeping!\n 234B.3 Auldtown and Muirtown, likewise Billy Beg,\n All gaed wi Charlie, for to be his guide.\n 234B.4 Jamie M\u2019Robbie, likewise Wattie Nairn,\n All gaed wi Charlie, for to be his warran.\n 234B.5 When they came to Kinadie, they knockd at the door;\n When nae ane woud answer, they gaed a loud roar.\n 234B.6 \u2018Ye\u2019ll open the door, mistress, and lat us come in;\n For tidings we\u2019ve brought frae your appearant guid-son.\u2019\n 234B.7 For to defend them, she was not able;\n They bangd up the stair, sat down at the table.\n 234B.8 \u2018Ye\u2019ll eat and drink, gentlemen, and eat at your leisure;\n Nae thing\u2019s disturb you, take what\u2019s your pleasure.\u2019\n 234B.9 \u2018O madam,\u2019 said he, \u2018I\u2019m come for your daughter;\n Lang hae I come to Kinadie and there sought her.\n 234B.10 \u2018Now she\u2019s gae wi me for mony a mile,\n Before that I return unto the West Isle.\u2019\n 234B.11 \u2018My daughter\u2019s not at home, she is gone abroad;\n Ye darena now steal her, her tocher is guid.\n 234B.12 \u2018My daughter\u2019s in Whitehouse, wi Mistress Dalgairn;\n Joy be wi them that waits on my bairn!\u2019\n 234B.13 The swords an the targe that hang about Charlie,\n They had sic a glitter, and set him sae rarelie!\n 234B.14 They had sic a glitter, and kiest sic a glamour,\n They showed mair light than they had in the chamour.\n 234B.15 To Whitehouse he went, and when he came there\n Right sair was his heart when he went up the stair.\n 234B.16 Burd Helen was sitting by Thomas\u2019 bed-side,\n And all in the house were addressing her, bride.\n 234B.17 \u2018O farewell now, Helen, I\u2019ll bid you adieu;\n Is this a\u2019 the comfort I\u2019m getting frae you?\n 234B.18 \u2018It was never my intention ye shoud be the waur;\n My heavy heart light on Whitehouse o Cromar!\n 234B.19 \u2018For you I hae travelled full mony lang mile,\n Awa to Kinadie, far frae the West Isle.\n 234B.20 \u2018But now ye are married, and I am the waur;\n My heavy heart light on Whitehouse o Cromar!\u2019\n \n \n \n \n \n \n Next: 235. The Earl of Aboyne","title":"The Child Ballads: 234. Charlie MacPherson","type":"page"}