{"collection":"phi","html_url":"https://unchartedknowledge.5gfusion.net/browse/phi/spinoza/lateth/eth05.htm","path":"phi/spinoza/lateth/eth05.htm","source_url":"https://sacred-texts.com/phi/spinoza/lateth/eth05.htm","text":"The Ethics, by Baruch Spinoza, [1677]\nSPINOZAE ETHICA\n ORDINE GEOMETRICO DEMONSTRATA\n ET IN QUINQUE PARTES DISTINCTA\nPARS QUINTA\nDE POTENTIA INTELLECTUS\nSEU DE LIBERTATE HUMANA\nPR\u00c6FATIO\nTranseo tandem ad alteram Ethices partem qu\u00e6 est de modo sive via qu\u00e6 ad libertatem ducit. In hac ergo de potentia rationis agam ostendens quid ipsa ratio in affectus possit et deinde quid mentis libertas seu beatitudo sit, ex quibus videbimus quantum sapiens potior sit ignaro. Quomodo autem et qua via debeat intellectus perfici et qua deinde arte corpus sit curandum ut possit suo officio recte fungi, huc non pertinet; hoc enim ad medicinam, illud autem ad logicam spectat. Hic igitur ut dixi de sola mentis seu rationis potentia agam et ante omnia quantum et quale imperium in affectus habeat ad eosdem coercendum et moderandum ostendam. Nam nos in ipsos imperium absolutum non habere jam supra demonstravimus. Stoici tamen putarunt eosdem a nostra voluntate absolute pendere nosque iis absolute imperare posse. Attamen ab experientia reclamante, non vero ex suis principiis coacti sunt fateri usum et studium non parvum requiri ad eosdem coercendum et moderandum; quod quidam exemplo duorum canum (si recte memini) unius scilicet domestici, alterius venatici conatus est ostendere nempe quia usu efficere tandem potuit ut domesticus venari, venaticus contra a leporibus sectandis abstinere assuesceret. Huic opinioni non parum favet Cartesius. Nam statuit animam seu mentem unitam pr\u00e6cipue esse cuidam parti cerebri, glandul\u00e6 scilicet pineali dict\u00e6 cujus ope mens motus omnes qui in corpore excitantur, et objecta externa sentit quamque mens eo solo quod vult, varie movere potest. Hanc glandulam in medio cerebri ita suspensam esse statuit ut minimo spirituum animalium motu possit moveri. Deinde statuit quod h\u00e6c glans tot variis modis in medio cerebro suspendatur quot variis modis spiritus animales in eandem impingunt et quod pr\u00e6terea tot varia vestigia in eadem imprimantur quot varia objecta externa ipsos spiritus animales versus eandem propellunt, unde fit ut si glans postea ab anim\u00e6 voluntate illam diversimode movente hoc aut illo modo suspendatur quo semel fuit suspensa a spiritibus hoc aut illo modo agitatis, tum ipsa glans ipsos spiritus animales eodem modo propellet et determinabit ac antea a simili glandul\u00e6 suspensione repulsi fuerant. Pr\u00e6terea statuit unamquamque mentis voluntatem natura esse unitam certo cuidam glandis motui. Exempli gratia si quis voluntatem habet objectum remotum intuendi, h\u00e6c voluntas efficiet ut pupilla dilatetur sed si de sola dilatanda pupilla cogitet, nihil proderit ejus rei habere voluntatem quia natura non junxit motum glandis qui inservit impellendis spiritibus versus nervum opticum modo conveniente dilatand\u00e6 vel contrahend\u00e6 pupill\u00e6 cum voluntate eandem dilatandi vel contrahendi sed demum cum voluntate intuendi objecta remota vel proxima. Denique statuit quod etsi unusquisque motus hujus glandul\u00e6 videatur connexus esse per naturam singulis ex nostris cogitationibus ab initio nostr\u00e6 vit\u00e6, aliis tamen per habitum possunt jungi, quod probare conatur articulo 50 partis I de passionibus anim\u00e6. Ex his concludit nullam esse tam imbecillem animam qu\u00e6 non possit cum bene dirigitur, acquirere potestatem absolutam in suas passiones. Nam h\u00e6 ut ab eo definiuntur, sunt \"perceptiones aut sensus aut commotiones anim\u00e6 qu\u00e6 ad eam speciatim referuntur qu\u00e6que nota bene producuntur, conservantur et corroborantur per aliquem motum spirituum\" (vide articulum 27 partis I passionum anim\u00e6). At quandoquidem cuilibet voluntati possumus jungere motum quemcunque glandis et consequenter spirituum et determinatio voluntatis a sola nostra potestate pendet, si igitur nostram voluntatem certis et firmis judiciis secundum qu\u00e6 nostr\u00e6 vit\u00e6 actiones dirigere volumus, determinemus et motus passionum quas habere volumus, hisce judiciis jungamus, imperium acquiremus absolutum in nostras passiones. H\u00e6c est clarissimi hujus viri sententia (quantum ex ipsius verbis conjicio) quam ego vix credidissem a tanto viro prolatam esse si minus acuta fuisset. Profecto mirari satis non possum quod vir philosophus qui firmiter statuerat nihil deducere nisi ex principiis per se notis et nihil affirmare nisi quod clare et distincte perciperet et qui toties scholasticos reprehenderat quod per occultas qualitates res obscuras voluerint explicare, hypothesin sumat omni occulta qualitate occultiorem. Quid qu\u00e6so per mentis et corporis unionem intelligit? Quem inquam clarum et distinctum conceptum habet cogitationis arctissime unit\u00e6 cuidam quantitatis portiuncul\u00e6? Vellem sane ut hanc unionem per proximam suam causam explicuisset. Sed ille mentem a corpore adeo distinctam conceperat ut nec hujus unionis nec ipsius mentis ullam singularem causam assignare potuerit sed necesse ipsi fuerit ad causam totius Universi hoc est ad Deum recurrere. Deinde pervelim scire quot motus gradus potest glandul\u00e6 isti pineali mens tribuere et quanta cum vi eandem suspensam tenere potest. Nam nescio an h\u00e6c glans tardius vel celerius a mente circumagatur quam a spiritibus animalibus et an motus passionum quos firmis judiciis arcte junximus, non possint ab iisdem iterum a causis corporeis disjungi; ex quo sequeretur ut quamvis mens firmiter proposuerit contra pericula ire atque huic decreto motus audaci\u00e6 junxerit, viso tamen periculo, glans ita suspendatur ut mens non nisi de fuga possit cogitare et sane cum nulla detur ratio voluntatis ad motum, nulla etiam datur comparatio inter mentis et corporis potentiam seu vires et consequenter hujus vires nequaquam viribus illius determinari possunt. His adde quod nec h\u00e6c glans ita in medio cerebro sita reperiatur ut tam facile totque modis circumagi possit et quod non omnes nervi ad cavitates usque cerebri protendantur. Denique omnia qu\u00e6 de voluntate ejusque libertate asserit, omitto quandoquidem h\u00e6c falsa esse satis superque ostenderim. Igitur quia mentis potentia ut supra ostendi, sola intelligentia definitur, affectuum remedia qu\u00e6 omnes experiri quidem sed non accurate observare nec distincte videre credo sola mentis cognitione, determinabimus et ex eadem illa omnia qu\u00e6 ad ipsius beatitudinem spectant, deducemus.\nAXIOMATA\nI. Si in eodem subjecto du\u00e6 contrari\u00e6 actiones excitentur, debebit necessario vel in utraque vel in una sola mutatio fieri donec desinant contrari\u00e6 esse.\nII. Effectus potentia definitur potentia ipsius caus\u00e6 quatenus ejus essentia per ipsius caus\u00e6 essentiam explicatur vel definitur. Patet hoc axioma ex propositione 7 partis III.\nPROPOSITIO I: Prout cogitationes rerumque ide\u00e6 ordinantur et concatenantur in mente, ita corporis affectiones seu rerum imagines ad amussim ordinantur et concatenantur in corpore.\nDEMONSTRATIO: Ordo et connexio idearum idem est (per propositionem 7 partis II) ac ordo et connexio rerum et vice versa ordo et connexio rerum idem est (per corollaria propositionum 6 et 7 partis II) ac ordo et connexio idearum. Quare sicuti ordo et connexio idearum in mente fit secundum ordinem et concatenationem affectionum corporis (per propositionem 18 partis II) sic vice versa (per propositionem 2 partis III) ordo et connexio affectionum corporis fit prout cogitationes rerumque ide\u00e6 ordinantur et concatenantur in mente. Q.E.D.\nPROPOSITIO II: Si animi commotionem seu affectum a caus\u00e6 extern\u00e6 cogitatione amoveamus et aliis jungamus cogitationibus, tum amor seu odium erga causam externam ut et animi fluctuationes qu\u00e6 ex his affectibus oriuntur, destruentur.\nDEMONSTRATIO: Id enim quod formam amoris vel odii constituit, est l\u00e6titia vel tristitia concomitante idea caus\u00e6 extern\u00e6 (per definitiones 6 et 7 affectuum); hac igitur sublata, amoris vel odii forma simul tollitur adeoque hi affectus et qui ex his oriuntur, destruuntur. Q.E.D.\nPROPOSITIO III: Affectus qui passio est, desinit esse passio simulatque ejus claram et distinctam formamus ideam.\nDEMONSTRATIO: Affectus qui passio est, idea est confusa (per generalem affectuum definitionem). Si itaque ipsius affectus claram et distinctam formemus ideam, h\u00e6c idea ab ipso affectu quatenus ad solam mentem refertur, non nisi ratione distinguetur (per propositionem 21 partis II cum ejusdem scholio) adeoque (per propositionem 3 partis III) affectus desinet esse passio. Q.E.D.\nCOROLLARIUM: Affectus igitur eo magis in nostra potestate est et mens ab eo minus patitur quo nobis est notior.\nPROPOSITIO IV: Nulla est corporis affectio cujus aliquem clarum et distinctum non possumus formare conceptum.\nDEMONSTRATIO: Qu\u00e6 omnibus communia sunt, non possunt concipi nisi ad\u00e6quate (per propositionem 38 partis II) adeoque (per propositionem 12 et lemma 2 quod habetur post scholium propositionis 13 partis II) nulla est corporis affectio cujus aliquem clarum et distinctum non possumus formare conceptum. Q.E.D.\nCOROLLARIUM: Hinc sequitur nullum esse affectum cujus non possumus aliquem clarum et distinctum formare conceptum. Est namque affectus corporis affectionis idea (per generalem affectuum definitionem) qu\u00e6 propterea (per propositionem pr\u00e6cedentem) aliquem clarum et distinctum involvere debet conceptum.\nSCHOLIUM: Quandoquidem nihil datur ex quo aliquis effectus non sequatur (per propositionem 36 partis I) et quicquid ex idea qu\u00e6 in nobis est ad\u00e6quata, sequitur, id omne clare et distincte intelligimus (per propositionem 40 partis II) hinc sequitur unumquemque potestatem habere se suosque affectus, si non absolute, ex parte saltem clare et distincte intelligendi et consequenter efficiendi ut ab iisdem minus patiatur. Huic igitur rei pr\u00e6cipue danda est opera ut unumquemque affectum quantum fieri potest clare et distincte cognoscamus ut sic mens ex affectu ad illa cogitandum determinetur qu\u00e6 clare et distincte percipit et in quibus plane acquiescit atque adeo ut ipse affectus a cogitatione caus\u00e6 extern\u00e6 separetur et veris jungatur cogitationibus; ex quo fiet ut non tantum amor, odium etc. destruantur (per propositionem 2 hujus) sed ut etiam appetitus seu cupiditates qu\u00e6 ex tali affectu oriri solent, excessum habere nequeant (per propositionem 61 partis IV). Nam apprime notandum est unum eundemque esse appetitum per quem homo tam agere quam pati dicitur. Exempli gratia cum natura humana ita comparatum esse ostendimus ut unusquisque appetat ut reliqui ex ipsius ingenio vivant (vide corollarium propositionis 31 partis III) qui quidem appetitus in homine qui ratione non ducitur, passio est qu\u00e6 ambitio vocatur nec multum a superbia discrepat et contra in homine qui ex rationis dictamine vivit, actio seu virtus est qu\u00e6 pietas appellatur (vide scholium I propositionis 37 partis IV et II demonstrationem ejusdem propositionis). Et hoc modo omnes appetitus seu cupiditates eatenus tantum passiones sunt quatenus ex ideis inad\u00e6quatis oriuntur atque e\u00e6dem virtuti accensentur quando ab ideis ad\u00e6quatis excitantur vel generantur. Nam omnes cupiditates quibus ad aliquid agendum determinamur, tam oriri possunt ab ad\u00e6quatis quam ab inad\u00e6quatis ideis (vide propositionem 59 partis IV). Atque hoc (ut eo unde digressus sum revertar) affectuum remedio quod scilicet in eorum vera cognitione consistit, nullum pr\u00e6stantius aliud quod a nostra potestate pendeat, excogitari potest quandoquidem nulla alia mentis potentia datur quam cogitandi et ad\u00e6quatas ideas formandi, ut supra (per propositionem 3 partis III) ostendimus.\nPROPOSITIO V: Affectus erga rem quam simpliciter et non ut necessariam neque ut possibilem neque ut contingentem imaginamur, c\u00e6teris paribus omnium est maximus.\nDEMONSTRATIO: Affectus erga rem quam liberam esse imaginamur, major est quam erga necessariam (per propositionem 49 partis III) et consequenter adhuc major quam erga illam quam ut possibilem vel contingentem imaginamur (per propositionem 11 partis IV). At rem aliquam ut liberam imaginari nihil aliud esse potest quam quod rem simpliciter imaginamur dum causas a quibus ipsa ad agendum determinata fuit, ignoramus (per illa qu\u00e6 in scholio propositionis 35 partis II ostendimus); ergo affectus erga rem quam simpliciter imaginamur, c\u00e6teris paribus major est quam erga necessariam, possibilem vel contingentem et consequenter maximus. Q.E.D.\nPROPOSITIO VI: Quatenus mens res omnes ut necessarias intelligit eatenus majorem in affectus potentiam habet seu minus ab iisdem patitur.\nDEMONSTRATIO: Mens res omnes necessarias esse intelligit (per propositionem 29 partis I) et infinito causarum nexu determinari ad existendum et operandum (per propositionem 28 partis I) adeoque (per propositionem pr\u00e6cedentem) eatenus efficit ut ab affectibus qui ex iis oriuntur, minus patiatur et (per propositionem 48 partis III) minus erga ipsas afficiatur. Q.E.D.\nSCHOLIUM: Quo h\u00e6c cognitio quod scilicet res necessari\u00e6 sint, magis circa res singulares quas distinctius et magis vivide imaginamur, versatur, eo h\u00e6c mentis in affectus potentia major est, quod ipsa etiam experientia testatur. Videmus enim tristitiam boni alicujus quod periit mitigari simulac homo qui id perdidit, considerat bonum illud servari nulla ratione potuisse. Sic etiam videmus quod nemo miseretur infantis propterea quod nescit loqui, ambulare, ratiocinari et quod denique tot annos quasi sui inscius vivat. At si plerique adulti et unus aut alter infans nascerentur, tum unumquemque misereret infantum quia tum ipsam infantiam non ut rem naturalem et necessariam sed ut natur\u00e6 vitium seu peccatum consideraret et ad hunc modum plura alia notare possemus.\nPROPOSITIO VII: Affectus qui ex ratione oriuntur vel excitantur, si ratio temporis habeatur, potentiores sunt iis qui ad res singulares referuntur quas ut absentes contemplamur.\nDEMONSTRATIO: Rem aliquam ut absentem non contemplamur ex affectu quo eandem imaginamur sed ex eo quod corpus alio afficitur affectu qui ejusdem rei existentiam secludit (per propositionem 17 partis II). Quare affectus qui ad rem quam ut absentem contemplamur, refertur, ejus natur\u00e6 non est ut reliquas hominis actiones et potentiam superet (de quibus vide propositionem 6 partis IV) sed contra ejus natur\u00e6 est ut ab iis affectionibus qu\u00e6 existentiam extern\u00e6 ejus caus\u00e6 secludunt, coerceri aliquo modo possit (per propositionem 9 partis IV). At affectus qui ex ratione oritur, refertur necessario ad communes rerum proprietates (vide rationis definitionem in II scholio propositionis 40 partis II) quas semper ut pr\u00e6sentes contemplamur (nam nihil dari potest quod earum pr\u00e6sentem existentiam secludat) et quas semper eodem modo imaginamur (per propositionem 38 partis II). Quare talis affectus idem semper manet et consequenter (per axioma 1 hujus) affectus qui eidem sunt contrarii quique a suis causis externis non foventur, eidem magis magisque sese accommodare debebunt donec non amplius sint contrarii et eatenus affectus qui ex ratione oritur, est potentior. Q.E.D.\nPROPOSITIO VIII: Quo affectus aliquis a pluribus causis simul concurrentibus excitatur, eo major est.\nDEMONSTRATIO: Plures caus\u00e6 simul plus possunt quam si pauciores essent (per propositionem 7 partis III) adeoque (per propositionem 5 partis IV) quo affectus aliquis a pluribus causis simul excitatur, eo fortior est. Q.E.D.\nSCHOLIUM: H\u00e6c propositio patet etiam ex axiomate 2 hujus partis.\nPROPOSITIO IX: Affectus qui ad plures et diversas causas refertur quas mens cum ipso affectu simul contemplatur, minus noxius est et minus per ipsum patimur et erga unamquamque causam minus afficimur quam alius \u00e6que magnus affectus qui ad unam solam vel pauciores causas refertur.\nDEMONSTRATIO: Affectus eatenus tantum malus seu noxius est quatenus mens ab eo impeditur quominus possit cogitare (per propositiones 26 et 27 partis IV) adeoque ille affectus a quo mens ad plura simul objecta contemplandum determinatur, minus noxius est quam alius \u00e6que magnus affectus qui mentem in sola unius aut pauciorum objectorum contemplatione ita detinet ut de aliis cogitare nequeat, quod erat primum. Deinde quia mentis essentia hoc est (per propositionem 7 partis III) potentia in sola cogitatione consistit (per propositionem 11 partis II) ergo mens per affectum a quo ad plura simul contemplandum determinatur, minus patitur quam per \u00e6que magnum affectum qui mentem in sola unius aut pauciorum objectorum contemplatione occupatam tenet, quod erat secundum. Denique hic affectus (per propositionem 48 partis III) quatenus ad plures causas externas refertur, est etiam erga unamquamque minor. Q.E.D.\nPROPOSITIO X: Quamdiu affectibus qui nostr\u00e6 natur\u00e6 sunt contrarii, non conflictamur tamdiu potestatem habemus ordinandi et concatenandi corporis affectiones secundum ordinem ad intellectum.\nDEMONSTRATIO: Affectus qui nostr\u00e6 natur\u00e6 sunt contrarii hoc est (per propositionem 30 partis IV) qui mali sunt, eatenus mali sunt quatenus impediunt quominus mens intelligat (per propositionem 27 partis IV). Quamdiu igitur affectibus qui nostr\u00e6 natur\u00e6 contrarii sunt, non conflictamur tamdiu mentis potentia qua res intelligere conatur (per propositionem 26 partis IV) non impeditur atque adeo tamdiu potestatem habet claras et distinctas ideas formandi et alias ex aliis deducendi (vide II scholium propositionis 40 et scholium propositionis 47 partis II) et consequenter (per propositionem 1 hujus) tamdiu potestatem habemus ordinandi et concatenandi affectiones corporis secundum ordinem ad intellectum. Q.E.D.\nSCHOLIUM: Hac potestate recte ordinandi et concatenandi corporis affectiones efficere possumus ut non facile malis affectibus afficiamur. Nam (per propositionem 7 hujus) major vis requiritur ad affectus secundum ordinem ad intellectum ordinatos et concatenatos coercendum quam incertos et vagos. Optimum igitur quod efficere possumus quamdiu nostrorum affectuum perfectam cognitionem non habemus, est rectam vivendi rationem seu certa vit\u00e6 dogmata concipere eaque memori\u00e6 mandare et rebus particularibus in vita frequenter obviis continuo applicare ut sic nostra imaginatio late iisdem afficiatur et nobis in promptu sint semper. Exempli gratia inter vit\u00e6 dogmata posuimus (vide propositionem 46 partis IV cum ejusdem scholio) odium amore seu generositate vincendum, non autem reciproco odio compensandum. Ut autem hoc rationis pr\u00e6scriptum semper in promptu habeamus ubi usus erit, cogitand\u00e6 et s\u00e6pe meditand\u00e6 sunt communes hominum injuri\u00e6 et quomodo et qua via generositate optime propulsentur; sic enim imaginem injuri\u00e6 imaginationi hujus dogmatis jungemus et nobis (per propositionem 18 partis II) in promptu semper erit ubi nobis injuria afferetur. Quod si etiam in promptu habuerimus rationem nostri veri utilis ac etiam boni quod ex mutua amicitia et communi societate sequitur et pr\u00e6terea quod ex recta vivendi ratione summa animi acquiescentia oriatur (per propositionem 52 partis IV) et quod homines ut reliqua, ex natur\u00e6 necessitate agant, tum injuria sive odium quod ex eadem oriri solet, minimam imaginationis partem occupabit et facile superabitur; vel si ira qu\u00e6 ex maximis injuriis oriri solet, non adeo facile superetur, superabitur tamen quamvis non sine animi fluctuatione, longe minore temporis spatio quam si h\u00e6c non ita pr\u00e6meditata habuissemus, ut patet ex propositione 6, 7 et 8 hujus partis. De animositate ad metum deponendum eodem modo cogitandum est; enumeranda scilicet sunt et s\u00e6pe imaginanda communia vit\u00e6 pericula et quomodo animi pr\u00e6sentia et fortitudine optime vitari et superari possunt. Sed notandum quod nobis in ordinandis nostris cogitationibus et imaginibus semper attendendum est (per corollarium propositionis 63 partis IV et propositionem 59 partis III) ad illa qu\u00e6 in unaquaque re bona sunt ut sic semper ex l\u00e6titi\u00e6 affectu ad agendum determinemur. Exempli gratia si quis videt se nimis gloriam sectari, de ejus recto usu cogitet et in quem finem sectanda sit et quibus mediis acquiri possit sed non de ipsius abusu et vanitate et hominum inconstantia vel aliis hujusmodi de quibus nemo nisi ex animi \u00e6gritudine cogitat; talibus enim cogitationibus maxime ambitiosi se maxime afflictant quando de assequendo honore quem ambiunt desperant et dum iram evomunt, sapientes videri volunt. Quare certum est eos glori\u00e6 maxime esse cupidos qui de ipsius abusu et mundi vanitate maxime clamant. Nec hoc ambitiosis proprium sed omnibus commune est quibus fortuna est adversa et qui animo impotentes sunt. Nam pauper etiam, avarus de abusu pecuni\u00e6 et divitum vitiis non cessat loqui, quo nihil aliud efficit quam se afflictare et aliis ostendere se non tantum paupertatem suam sed etiam aliorum divitias iniquo animo ferre. Sic etiam qui male ab amasia excepti sunt, nihil aliud cogitant quam de mulierum inconstantia et fallaci animo et reliquis earundem decantatis vitiis qu\u00e6 omnia statim oblivioni tradunt simulac ab amasia iterum recipiuntur. Qui itaque suos affectus et appetitus ex solo libertatis amore moderari studet, is quantum potest nitetur virtutes earumque causas noscere et animum gaudio quod ex earum vera cognitione oritur, implere; at minime hominum vitia contemplari hominesque obtrectare et falsa libertatis specie gaudere. Atque h\u00e6c qui diligenter observabit (neque enim difficilia sunt) et exercebit, n\u00e6 ille brevi temporis spatio actiones suas ex rationis imperio plerumque dirigere poterit.\nPROPOSITIO XI: Quo imago aliqua ad plures res refertur, eo frequentior est seu s\u00e6pius viget et mentem magis occupat.\nDEMONSTRATIO: Quo enim imago seu affectus ad plures res refertur, eo plures dantur caus\u00e6 a quibus excitari et foveri potest quas omnes mens (per hypothesin) ex ipso affectu simul contemplatur atque adeo affectus eo frequentior est seu s\u00e6pius viget et (per propositionem 8 hujus) mentem magis occupat. Q.E.D.\nPROPOSITIO XII: Rerum imagines facilius imaginibus qu\u00e6 ad res referuntur quas clare et distincte intelligimus, junguntur quam aliis.\nDEMONSTRATIO: Res quas clare et distincte intelligimus, vel rerum communes proprietates sunt vel qu\u00e6 ex iis deducuntur (vide rationis definitionem in II scholio propositionis 40 partis II) et consequenter s\u00e6pius (per propositionem pr\u00e6cedentem) in nobis excitantur adeoque facilius fieri potest ut res alias simul cum his quam cum aliis contemplemur et consequenter (per propositionem 18 partis II) ut facilius cum his quam cum aliis jungantur. Q.E.D.\nPROPOSITIO XIII: Quo imago aliqua pluribus aliis juncta est, eo s\u00e6pius viget.\nDEMONSTRATIO: Nam quo imago aliqua pluribus aliis juncta est, eo (per propositionem 18 partis II) plures caus\u00e6 dantur a quibus excitari potest. Q.E.D.\nPROPOSITIO XIV: Mens efficere potest ut omnes corporis affectiones seu rerum imagines ad Dei ideam referantur.\nDEMONSTRATIO: Nulla est corporis affectio cujus aliquem clarum et distinctum non possit mens formare conceptum (per propositionem 4 hujus) adeoque efficere potest (per propositionem 15 partis I) ut omnes ad Dei ideam referuntur. Q.E.D.\nPROPOSITIO XV: Qui se suosque affectus clare et distincte intelligit, Deum amat et eo magis quo se suosque affectus magis intelligit.\nDEMONSTRATIO: Qui se suosque affectus clare et distincte intelligit, l\u00e6tatur (per propositionem 53 partis III) idque concomitante idea Dei (per propositionem pr\u00e6cedentem) atque adeo (per 6 affectuum definitionem) Deum amat et (per eandem rationem) eo magis quo se suosque affectus magis intelligit. Q.E.D.\nPROPOSITIO XVI: Hic erga Deum amor mentem maxime occupare debet.\nDEMONSTRATIO: Est enim hic amor junctus omnibus corporis affectionibus (per propositionem 14 hujus) quibus omnibus fovetur (per propositionem 15 hujus) atque adeo (per propositionem 11 hujus) mentem maxime occupare debet. Q.E.D.\nPROPOSITIO XVII: Deus expers est passionum nec ullo l\u00e6titi\u00e6 aut tristiti\u00e6 affectu afficitur.\nDEMONSTRATIO: Ide\u00e6 omnes quatenus ad Deum referuntur, ver\u00e6 sunt (per propositionem 32 partis II) hoc est (per definitionem 4 partis II) ad\u00e6quat\u00e6 atque adeo (per affectuum generalem definitionem) Deus expers est passionum. Deinde Deus neque ad majorem neque ad minorem perfectionem transire potest (per II corollarium propositionis 20 partis I) adeoque (per 2 et 3 affectuum definitiones) nullo l\u00e6titi\u00e6 neque tristiti\u00e6 affectu afficitur. Q.E.D.\nCOROLLARIUM: Deus proprie loquendo neminem amat neque odio habet. Nam Deus (per propositionem pr\u00e6cedentem) nullo l\u00e6titi\u00e6 neque tristiti\u00e6 affectu afficitur et consequenter (per 6 et 7 affectuum definitiones) neminem etiam amat neque odio habet.\nPROPOSITIO XVIII: Nemo potest Deum odio habere.\nDEMONSTRATIO: Idea Dei qu\u00e6 in nobis est, est ad\u00e6quata et perfecta (per propositiones 46 et 47 partis II) adeoque quatenus Deum contemplamur eatenus agimus (per propositionem 3 partis III) et consequenter (per propositionem 59 partis III) nulla potest dari tristitia concomitante idea Dei hoc est (per 7 affectuum definitionem) nemo Deum odio habere potest. Q.E.D.\nCOROLLARIUM: Amor erga Deum in odium verti nequit.\nSCHOLIUM: At objici potest quod dum Deum omnium rerum causam intelligimus, eo ipso Deum tristiti\u00e6 causam consideramus. Sed ad hoc respondeo quod quatenus tristiti\u00e6 causas intelligimus eatenus (per propositionem 3 hujus) ipsa desinit esse passio hoc est (per propositionem 59 partis III) eatenus desinit esse tristitia atque adeo quatenus Deum tristiti\u00e6 causam esse intelligimus eatenus l\u00e6tamur.\nPROPOSITIO XIX: Qui Deum amat, conari non potest ut Deus ipsum contra amet.\nDEMONSTRATIO: Si homo id conaretur, cuperet ergo (per corollarium propositionis 17 hujus) ut Deus quem amat non esset Deus et consequenter (per propositionem 19 partis III) contristari cuperet, quod (per propositionem 28 partis III) est absurdum. Ergo qui Deum amat etc. Q.E.D.\nPROPOSITIO XX: Hic erga Deum amor neque invidi\u00e6 neque zelotypi\u00e6 affectu inquinari potest sed eo magis fovetur quo plures homines eodem amoris vinculo cum Deo junctos imaginamur.\nDEMONSTRATIO: Hic erga Deum amor summum bonum est quod ex dictamine rationis appetere possumus (per propositionem 28 partis IV) et omnibus hominibus commune est (per propositionem 36 partis IV) et omnes ut eodem gaudeant cupimus (per propositionem 37 partis IV) atque adeo (per 23 affectuum definitionem) invidi\u00e6 affectu maculari nequit neque etiam (per propositionem 18 hujus et definitionem zelotypi\u00e6, quam vide in scholio propositionis 35 partis III) zelotypi\u00e6 affectu sed contra (per propositionem 31 partis III) eo magis foveri debet quo plures homines eodem gaudere imaginamur. Q.E.D.\nSCHOLIUM: Possumus hoc eodem modo ostendere nullum dari affectum qui huic amori directe sit contrarius, a quo hic ipse amor possit destrui atque adeo concludere possumus hunc erga Deum amorem omnium affectuum est constantissimum nec quatenus ad corpus refertur, posse destrui nisi cum ipso corpore. Cujus autem natur\u00e6 sit quatenus ad solam mentem refertur, postea videbimus. Atque his omnia affectuum remedia sive id omne quod mens in se sola considerata adversus affectus potest, comprehendi; ex quibus apparet mentis in affectus potentiam consistere I\u0192 in ipsa affectuum cognitione (vide scholium propositionis 4 hujus). II\u0192 in eo quod affectus a cogitatione caus\u00e6 extern\u00e6 quam confuse imaginamur, separat (vide propositionem 2 cum eodem scholio propositionis 4 hujus). III\u0192 in tempore quo affectiones qu\u00e6 ad res quas intelligimus referuntur, illas superant qu\u00e6 ad res referuntur quas confuse seu mutilate concipimus (vide propositionem 7 hujus). IV\u0192 in multitudine causarum a quibus affectiones qu\u00e6 ad rerum communes proprietates vel ad Deum referuntur, foventur (vide propositiones 9 et 11 hujus). V\u0192 denique in ordine quo mens suos affectus ordinare et invicem concatenare potest (vide scholium propositionis 10 et insuper propositiones 12, 13 et 14 hujus). Sed ut h\u00e6c mentis in affectus potentia melius intelligatur, venit apprime notandum quod affectus a nobis magni appellantur quando unius hominis affectum cum affectu alterius comparamus et unum magis quam alium eodem affectu conflictari videmus; vel quando unius ejusdemque hominis affectus ad invicem comparamus eundemque uno affectu magis quam alio affici sive moveri comperimus. Nam (per propositionem 5 partis IV) vis cujuscunque affectus definitur potentia caus\u00e6 extern\u00e6 cum nostra comparata. At mentis potentia sola cognitione definitur; impotentia autem seu passio a sola cognitionis privatione hoc est ab eo per quod ide\u00e6 dicuntur inad\u00e6quat\u00e6, \u00e6stimatur; ex quo sequitur mentem illam maxime pati cujus maximam partem ide\u00e6 inad\u00e6quat\u00e6 constituunt ita ut magis per id quod patitur quam per id quod agit dignoscatur et illam contra maxime agere cujus maximam partem ide\u00e6 ad\u00e6quat\u00e6 constituunt ita ut quamvis huic tot inad\u00e6quat\u00e6 ide\u00e6 quam illi insint, magis tamen per illas qu\u00e6 human\u00e6 virtuti tribuuntur quam per has qu\u00e6 humanam impotentiam arguunt, dignoscatur. Deinde notandum animi \u00e6gritudines et infortunia potissimum originem trahere ex nimio amore erga rem qu\u00e6 multis variationibus est obnoxia et cujus nunquam compotes esse possumus. Nam nemo de re ulla nisi quam amat sollicitus anxiusve est neque injuri\u00e6, suspiciones, inimiciti\u00e6 etc. oriuntur nisi ex amore erga res quarum nemo potest revera esse compos. Ex his itaque facile concipimus quid clara et distincta cognitio et pr\u00e6cipue tertium illud cognitionis genus (de quo vide scholium propositionis 47 partis II) cujus fundamentum est ipsa Dei cognitio, in affectus potest quos nempe quatenus passiones sunt, si non absolute tollit (vide propositionem 3 cum scholio propositionis 4 hujus) saltem efficit ut minimam mentis partem constituant (vide propositionem 14 hujus). Deinde amorem gignit erga rem immutabilem et \u00e6ternam (vide propositionem 15 hujus) et cujus revera sumus compotes (vide propositionem 45 partis II) et qui propterea nullis vitiis qu\u00e6 in communi amore insunt, inquinari sed semper major ac major esse potest (per propositionem 15 hujus) et mentis maximam partem occupare (per propositionem 16 hujus) lateque afficere. Atque his omnia qu\u00e6 pr\u00e6sentem hanc vitam spectant, absolvi. Nam quod in hujus scholii principio dixi me his paucis omnia affectuum remedia amplexum esse, facile poterit unusquisque videre qui ad h\u00e6c qu\u00e6 in hoc scholio diximus et simul ad mentis ejusque affectuum definitiones et denique ad propositiones 1 et 3 partis III attenderit. Tempus igitur jam est ut ad illa transeam qu\u00e6 ad mentis durationem sine relatione ad corpus pertinent.\nPROPOSITIO XXI: Mens nihil imaginari potest neque rerum pr\u00e6teritarum recordari nisi durante corpore.\nDEMONSTRATIO: Mens actualem sui corporis existentiam non exprimit neque etiam corporis affectiones ut actuales concipit nisi durante corpore (per corollarium propositionis 8 partis II) et consequenter (per propositionem 26 partis II) nullum corpus ut actu existens concipit nisi durante suo corpore ac proinde nihil imaginari (vide imaginationis definitionem in scholio propositionis 17 partis II) neque rerum pr\u00e6teritarum recordari potest nisi durante corpore (vide definitionem memori\u00e6 in scholio propositionis 18 partis II). Q.E.D.\nPROPOSITIO XXII: In Deo tamen datur necessario idea qu\u00e6 hujus et illius corporis humani essentiam sub \u00e6ternitatis specie exprimit.\nDEMONSTRATIO: Deus non tantum est causa hujus et illius corporis humani existenti\u00e6 sed etiam essenti\u00e6 (per propositionem 25 partis I) qu\u00e6 propterea per ipsam Dei essentiam necessario debet concipi (per axioma 4 partis I) idque \u00e6terna quadam necessitate (per propositionem 16 partis I) qui quidem conceptus necessario in Deo dari debet (per propositionem 3 partis II). Q.E.D.\nPROPOSITIO XXIII: Mens humana non potest cum corpore absolute destrui sed ejus aliquid remanet quod \u00e6ternum est.\nDEMONSTRATIO: In Deo datur necessario conceptus seu idea qu\u00e6 corporis humani essentiam exprimit (per propositionem pr\u00e6cedentem) qu\u00e6 propterea aliquid necessario est quod ad essentiam mentis human\u00e6 pertinet (per propositionem 13 partis II). Sed menti human\u00e6 nullam durationem qu\u00e6 tempore definiri potest, tribuimus nisi quatenus corporis actualem existentiam qu\u00e6 per durationem explicatur et tempore definiri potest, exprimit hoc est (per corollarium propositionis 8 partis II) ipsi durationem non tribuimus nisi durante corpore. Cum tamen aliquid nihilominus sit id quod \u00e6terna quadam necessitate per ipsam Dei essentiam concipitur (per propositionem pr\u00e6cedentem) erit necessario hoc aliquid quod ad mentis essentiam pertinet, \u00e6ternum. Q.E.D.\nSCHOLIUM: Est uti diximus h\u00e6c idea qu\u00e6 corporis essentiam sub specie \u00e6ternitatis exprimit, certus cogitandi modus qui ad mentis essentiam pertinet quique necessario \u00e6ternus est. Nec tamen fieri potest ut recordemur nos ante corpus exstitisse quandoquidem nec in corpore ulla ejus vestigia dari nec \u00e6ternitas tempore definiri nec ullam ad tempus relationem habere potest. At nihilominus sentimus experimurque nos \u00e6ternos esse. Nam mens non minus res illas sentit quas intelligendo concipit quam quas in memoria habet. Mentis enim oculi quibus res videt observatque, sunt ips\u00e6 demonstrationes. Quamvis itaque non recordemur nos ante corpus exstitisse, sentimus tamen mentem nostram quatenus corporis essentiam sub \u00e6ternitatis specie involvit, \u00e6ternam esse et hanc ejus existentiam tempore definiri sive per durationem explicari non posse. Mens igitur nostra eatenus tantum potest dici durare ejusque existentia certo tempore definiri potest quatenus actualem corporis existentiam involvit et eatenus tantum potentiam habet rerum existentiam tempore determinandi easque sub duratione concipiendi.\nPROPOSITIO XXIV: Quo magis res singulares intelligimus eo magis Deum intelligimus.\nDEMONSTRATIO: Patet ex corollario propositionis 25 partis I.\nPROPOSITIO XXV: Summus mentis conatus summaque virtus est res intelligere tertio cognitionis genere.\nDEMONSTRATIO: Tertium cognitionis genus procedit ab ad\u00e6quata idea quorundam Dei attributorum ad ad\u00e6quatam cognitionem essenti\u00e6 rerum (vide hujus definitionem in II scholio propositionis 40 partis II) et quo magis hoc modo res intelligimus eo magis (per propositionem pr\u00e6cedentem) Deum intelligimus ac proinde (per propositionem 28 partis IV) summa mentis virtus hoc est (per definitionem 8 partis IV) mentis potentia seu natura sive (per propositionem 7 partis III) summus conatus est res intelligere tertio cognitionis genere. Q.E.D.\nPROPOSITIO XXVI: Quo mens aptior est ad res tertio cognitionis genere intelligendum, eo magis cupit res eodem hoc cognitionis genere intelligere.\nDEMONSTRATIO: Patet. Nam quatenus concipimus mentem aptam esse ad res hoc cognitionis genere intelligendum eatenus eandem determinatam concipimus ad res eodem cognitionis genere intelligendum et consequenter (per 1 affectuum definitionem) quo mens ad hoc aptior est, eo magis hoc cupit. Q.E.D.\nPROPOSITIO XXVII: Ex hoc tertio cognitionis genere summa qu\u00e6 dari potest mentis acquiescentia, oritur.\nDEMONSTRATIO: Summa mentis virtus est Deum cognoscere (per propositionem 28 partis IV) sive res tertio cognitionis genere intelligere (per propositionem 25 hujus); qu\u00e6 quidem virtus eo major est quo mens hoc cognitionis genere magis res cognoscit (per propositionem 24 hujus) adeoque qui res hoc cognitionis genere cognoscit, is ad summam humanam perfectionem transit et consequenter (per 2 affectuum definitionem) summa l\u00e6titia afficitur idque (per propositionem 43 partis II) concomitante idea sui su\u00e6que virtutis ac proinde (per 25 affectuum definitionem) ex hoc cognitionis genere summa qu\u00e6 dari potest oritur acquiescentia. Q.E.D.\nPROPOSITIO XXVIII: Conatus seu cupiditas cognoscendi res tertio cognitionis genere oriri non potest ex primo, at quidem ex secundo cognitionis genere.\nDEMONSTRATIO: H\u00e6c propositio per se patet. Nam quicquid clare et distincte intelligimus, id vel per se vel per aliud quod per se concipitur, intelligimus hoc est ide\u00e6 qu\u00e6 in nobis clar\u00e6 et distinct\u00e6 sunt sive qu\u00e6 ad tertium cognitionis genus referuntur (vide II scholium propositionis 40 partis II) non possunt sequi ex ideis mutilatis et confusis qu\u00e6 (per idem scholium) ad primum cognitionis genus referuntur sed ex ideis ad\u00e6quatis sive (per idem scholium) ex secundo et tertio cognitionis genere ac proinde (per 1 affectuum definitionem) cupiditas cognoscendi res tertio cognitionis genere non potest oriri ex primo, at quidem ex secundo. Q.E.D.\nPROPOSITIO XXIX: Quicquid mens sub specie \u00e6ternitatis intelligit, id ex eo non intelligit quod corporis pr\u00e6sentem actualem existentiam concipit sed ex eo quod corporis essentiam concipit sub specie \u00e6ternitatis.\nDEMONSTRATIO: Quatenus mens pr\u00e6sentem sui corporis existentiam concipit eatenus durationem concipit qu\u00e6 tempore determinari potest et eatenus tantum potentiam habet concipiendi res cum relatione ad tempus (per propositionem 21 hujus et propositionem 26 partis II). At \u00e6ternitas per durationem explicari nequit (per definitionem 8 partis I et ipsius explicationem). Ergo mens eatenus potestatem non habet concipiendi res sub specie \u00e6ternitatis sed quia de natura rationis est res sub specie \u00e6ternitatis concipere (per II corollarium propositionis 44 partis II) et ad mentis naturam etiam pertinet corporis essentiam sub specie \u00e6ternitatis concipere (per propositionem 23 hujus) et pr\u00e6ter h\u00e6c duo nihil aliud ad mentis essentiam pertinet (per propositionem 13 partis II) ergo h\u00e6c potentia concipiendi res sub specie \u00e6ternitatis ad mentem non pertinet nisi quatenus corporis essentiam sub specie \u00e6ternitatis concipit. Q.E.D.\nSCHOLIUM: Res duobus modis a nobis ut actuales concipiuntur vel quatenus easdem cum relatione ad certum tempus et locum existere vel quatenus ipsas in Deo contineri et ex natur\u00e6 divin\u00e6 necessitate consequi concipimus. Qu\u00e6 autem hoc secundo modo ut ver\u00e6 seu reales concipiuntur, eas sub \u00e6ternitatis specie concipimus et earum ide\u00e6 \u00e6ternam et infinitam Dei essentiam involvunt, ut propositione 45 partis II ostendimus, cujus etiam scholium vide.\nPROPOSITIO XXX: Mens nostra quatenus se et corpus sub \u00e6ternitatis specie cognoscit eatenus Dei cognitionem necessario habet scitque se in Deo esse et per Deum concipi.\nDEMONSTRATIO: \u00e6ternitas est ipsa Dei essentia quatenus h\u00e6c necessariam involvit existentiam (per definitionem 8 partis I). Res igitur sub specie \u00e6ternitatis concipere est res concipere quatenus per Dei essentiam ut entia realia concipiuntur sive quatenus per Dei essentiam involvunt existentiam adeoque mens nostra quatenus se et corpus sub specie \u00e6ternitatis concipit eatenus Dei cognitionem necessario habet scitque etc. Q.E.D.\nPROPOSITIO XXXI: Tertium cognitionis genus pendet a mente tanquam a formali causa quatenus mens ipsa \u00e6terna est.\nDEMONSTRATIO: Mens nihil sub \u00e6ternitatis specie concipit nisi quatenus sui corporis essentiam sub \u00e6ternitatis specie concipit (per propositionem 29 hujus) hoc est (per propositiones 21 et 23 hujus) nisi quatenus \u00e6terna est adeoque (per propositionem pr\u00e6cedentem) quatenus \u00e6terna est, Dei habet cognitionem, qu\u00e6 quidem cognitio est necessario ad\u00e6quata (per propositionem 46 partis II) ac proinde mens quatenus \u00e6terna est, ad illa omnia cognoscendum est apta qu\u00e6 ex data hac Dei cognitione consequi possunt (per propositionem 40 partis II) hoc est ad res tertio cognitionis genere cognoscendum (vide hujus definitionem in II scholio propositionis 40 partis II) cujus propterea mens (per definitionem 1 partis III) quatenus \u00e6terna est, causa est ad\u00e6quata seu formalis. Q.E.D.\nSCHOLIUM: Quo igitur unusquisque hoc cognitionis genere plus pollet, eo melius sui et Dei conscius est hoc est eo est perfectior et beatior, quod adhuc clarius ex sequentibus patebit. Sed hic notandum quod tametsi jam certi sumus mentem \u00e6ternam esse quatenus res sub \u00e6ternitatis specie concipit, nos tamen, ut ea qu\u00e6 ostendere volumus facilius explicentur et melius intelligantur, ipsam tanquam jam inciperet esse et res sub \u00e6ternitatis specie intelligere jam inciperet, considerabimus, ut huc usque fecimus; quod nobis absque ullo erroris periculo facere licet modo nobis cautio sit nihil concludere nisi ex perspicuis pr\u00e6missis.\nPROPOSITIO XXXII: Quicquid intelligimus tertio cognitionis genere, eo delectamur et quidem concomitante idea Dei tanquam causa.\nDEMONSTRATIO: Ex hoc cognitionis genere summa qu\u00e6 dari potest mentis acquiescentia (per propositionem 27 hujus) hoc est (per 25 affectuum definitionem) l\u00e6titia oritur eaque concomitante idea sui et consequenter (per propositionem 30 hujus) concomitante etiam idea Dei tanquam causa. Q.E.D.\nCOROLLARIUM: Ex tertio cognitionis genere oritur necessario amor Dei intellectualis. Nam ex hoc cognitionis genere oritur (per propositionem pr\u00e6cedentem) l\u00e6titia concomitante idea Dei tanquam causa hoc est (per 6 affectuum definitionem) amor Dei non quatenus ipsum ut pr\u00e6sentem imaginamur (per propositionem 29 hujus) sed quatenus Deum \u00e6ternum esse intelligimus et hoc est quod amorem Dei intellectualem voco.\nPROPOSITIO XXXIII: Amor Dei intellectualis qui ex tertio cognitionis genere oritur, est \u00e6ternus.\nDEMONSTRATIO: Tertium enim cognitionis genus (per propositionem 31 hujus et axioma 3 partis I) est \u00e6ternum adeoque (per idem axioma partis I) amor qui ex eodem oritur, est etiam necessario \u00e6ternus. Q.E.D.\nSCHOLIUM: Quamvis hic erga Deum amor principium non habuerit (per propositionem pr\u00e6cedentem) habet tamen omnes amoris perfectiones perinde ac si ortus fuisset, sicut in corollario propositionis pr\u00e6cedentis finximus. Nec ulla hic est differentia nisi quod mens easdem has perfectiones quas eidem jam accedere finximus \u00e6ternas habuerit idque concomitante idea Dei tanquam causa \u00e6terna. Quod si l\u00e6titia in transitione ad majorem perfectionem consistit, beatitudo sane in eo consistere debet quod mens ipsa perfectione sit pr\u00e6dita.\nPROPOSITIO XXXIV: Mens non nisi durante corpore obnoxia est affectibus qui ad passiones referuntur.\nDEMONSTRATIO: Imaginatio est idea qua mens rem aliquam ut pr\u00e6sentem contemplatur (vide ejus definitionem in scholio propositionis 17 partis II) qu\u00e6 tamen magis corporis humani pr\u00e6sentem constitutionem quam rei extern\u00e6 naturam indicat (per II corollarium propositionis 16 partis II). Est igitur affectus (per generalem affectuum definitionem) imaginatio quatenus corporis pr\u00e6sentem constitutionem indicat atque adeo (per propositionem 21 hujus) mens non nisi durante corpore obnoxia est affectibus qui ad passiones referuntur. Q.E.D.\nCOROLLARIUM: Hinc sequitur nullum amorem pr\u00e6ter amorem intellectualem esse \u00e6ternum.\nSCHOLIUM: Si ad hominum communem opinionem attendamus, videbimus eos su\u00e6 mentis \u00e6ternitatis esse quidem conscios sed ipsos eandem cum duratione confundere eamque imaginationi seu memori\u00e6 tribuere quam post mortem remanere credunt.\nPROPOSITIO XXXV: Deus se ipsum amore intellectuali infinito amat.\nDEMONSTRATIO: Deus est absolute infinitus (per definitionem 6 partis I) hoc est (per definitionem 6 partis II) Dei natura gaudet infinita perfectione idque (per propositionem 3 partis II) concomitante idea sui hoc est (per propositionem 11 et definitionem 1 partis I) idea su\u00e6 caus\u00e6 et hoc est quod in corollario propositionis 32 hujus amorem intellectualem esse diximus.\nPROPOSITIO XXXVI: Mentis amor intellectualis erga Deum est ipse Dei amor quo Deus se ipsum amat, non quatenus infinitus est sed quatenus per essentiam human\u00e6 mentis sub specie \u00e6ternitatis consideratam explicari potest hoc est mentis erga Deum amor intellectualis pars est infiniti amoris quo Deus se ipsum amat.\nDEMONSTRATIO: Hic mentis amor ad mentis actiones referri debet (per corollarium propositionis 32 hujus et per propositionem 3 partis III) qui proinde actio est qua mens se ipsam contemplatur concomitante idea Dei tanquam causa (per propositionem 32 hujus et ejus corollarium) hoc est (per corollarium propositionis 25 partis I et corollarium propositionis 11 partis II) actio qua Deus quatenus per mentem humanam explicari potest, seipsum contemplatur concomitante idea sui atque adeo (per propositionem pr\u00e6cedentem) hic mentis amor pars est infiniti amoris quo Deus seipsum amat. Q.E.D.\nCOROLLARIUM: Hinc sequitur quod Deus quatenus seipsum amat, homines amat et consequenter quod amor Dei erga homines et mentis erga Deum amor intellectualis unum et idem sit.\nSCHOLIUM: Ex his clare intelligimus qua in re nostra salus seu beatitudo seu libertas consistit nempe in constanti et \u00e6terno erga Deum amore sive in amore Dei erga homines. Atque hic amor seu beatitudo in sacris codicibus gloria appellatur nec immerito. Nam sive hic amor ad Deum referatur sive ad mentem, recte animi acquiescentia qu\u00e6 revera a gloria (per 25 et 30 affectuum definitiones) non distinguitur, appellari potest. Nam quatenus ad Deum refertur, est (per propositionem 35 hujus) l\u00e6titia, liceat hoc adhuc vocabulo uti, concomitante idea sui ut et quatenus ad mentem refertur (per propositionem 27 hujus). Deinde quia nostr\u00e6 mentis essentia in sola cognitione consistit cujus principium et fundamentum Deus est (per propositionem 15 partis I et scholium propositionis 47 partis II) hinc perspicuum nobis fit quomodo et qua ratione mens nostra secundum essentiam et existentiam ex natura divina sequatur et continuo a Deo pendeat; quod hic notare oper\u00e6 pretium duxi ut hoc exemplo ostenderem quantum rerum singularium cognitio quam intuitivam sive tertii generis appellavi (vide II scholium propositionis 40 partis II) polleat potiorque sit cognitione universali quam secundi generis esse dixi. Nam quamvis in prima parte generaliter ostenderim omnia (et consequenter mentem etiam humanam) a Deo secundum essentiam et existentiam pendere, illa tamen demonstratio tametsi legitima sit et extra dubitationis aleam posita, non ita tamen mentem nostram afficit quam quando id ipsum ex ipsa essentia rei cujuscunque singularis quam a Deo pendere dicimus, concluditur.\nPROPOSITIO XXXVII: Nihil in natura datur quod huic amori intellectuali sit contrarium sive quod ipsum possit tollere.\nDEMONSTRATIO: Hic intellectualis amor ex mentis natura necessario sequitur quatenus ipsa ut \u00e6terna veritas per Dei naturam consideratur (per propositiones 33 et 29 hujus). Si quid ergo daretur quod huic amori esset contrarium, id contrarium esset vero et consequenter id quod hunc amorem posset tollere, efficeret ut id quod verum est, falsum esset, quod (ut per se notum) est absurdum. Ergo nihil in natura datur etc. Q.E.D.\nSCHOLIUM: Partis quart\u00e6 axioma res singulares respicit quatenus cum relatione ad certum tempus et locum considerantur, de quo neminem dubitare credo.\nPROPOSITIO XXXVIII: Quo plures res secundo et tertio cognitionis genere mens intelligit, eo minus ipsa ab affectibus qui mali sunt, patitur et mortem minus timet.\nDEMONSTRATIO: Mentis essentia in cognitione consistit (per propositionem 11 partis II); quo igitur mens plures res cognoscit secundo et tertio cognitionis genere, eo major ejus pars remanet (per propositiones 23 et 29 hujus) et consequenter (per propositionem pr\u00e6cedentem) eo major ejus pars non tangitur ab affectibus qui nostr\u00e6 natur\u00e6 sunt contrarii hoc est (per propositionem 30 partis IV) qui mali sunt. Quo itaque mens plures res secundo et tertio cognitionis genere intelligit, eo major ejus pars ill\u00e6sa manet et consequenter minus ab affectibus patitur etc. Q.E.D.\nSCHOLIUM: Hinc intelligimus id quod in scholio propositionis 39 partis IV attigi et quod in hac parte explicare promisi nempe quod mors eo minus est noxia quo mentis clara et distincta cognitio major est et consequenter quo mens magis Deum amat. Deinde quia (per propositionem 27 hujus) ex tertio cognitionis genere summa qu\u00e6 dari potest oritur acquiescentia, hinc sequitur mentem humanam posse ejus natur\u00e6 esse ut id quod ejus cum corpore perire ostendimus (vide propositionem 21 hujus) in respectu ad id quod ipsius remanet, nullius sit momenti. Sed de his mox prolixius.\nPROPOSITIO XXXIX: Qui corpus ad plurima aptum habet, is mentem habet cujus maxima pars est \u00e6terna.\nDEMONSTRATIO: Qui corpus ad plurima agendum aptum habet, is minime affectibus qui mali sunt, conflictatur (per propositionem 38 partis IV) hoc est (per propositionem 30 partis IV) affectibus qui natur\u00e6 nostr\u00e6 sunt contrarii atque adeo (per propositionem 10 hujus) potestatem habet ordinandi et concatenandi corporis affectiones secundum ordinem ad intellectum et consequenter efficiendi (per propositionem 14 hujus) ut omnes corporis affectiones ad Dei ideam referantur, ex quo fiet (per propositionem 15 hujus) ut erga Deum afficiatur amore qui (per propositionem 16 hujus) mentis maximam partem occupare sive constituere debet ac proinde (per propositionem 33 hujus) mentem habet cujus maxima pars est \u00e6terna. Q.E.D.\nSCHOLIUM: Quia corpora humana ad plurima apta sunt, non dubium est quin ejus natur\u00e6 possint esse ut ad mentes referantur qu\u00e6 magnam sui et Dei habeant cognitionem et quarum maxima seu pr\u00e6cipua pars est \u00e6terna atque adeo ut mortem vix timeant. Sed ut h\u00e6c clarius intelligantur, animadvertendum hic est quod nos in continua vivimus variatione et prout in melius sive in pejus mutamur, eo felices aut infelices dicimur. Qui enim ex infante vel puero in cadaver transiit, infelix dicitur et contra id felicitati tribuitur, quod totum vit\u00e6 spatium mente sana in corpore sano percurrere potuerimus. Et revera qui corpus habet ut infans vel puer ad paucissima aptum et maxime pendens a causis externis, mentem habet qu\u00e6 in se sola considerata nihil fere sui nec Dei nec rerum sit conscia et contra qui corpus habet ad plurima aptum, mentem habet qu\u00e6 in se sola considerata multum sui et Dei et rerum sit conscia. In hac vita igitur apprime conamur ut corpus infanti\u00e6 in aliud quantum ejus natura patitur eique conducit, mutetur quod ad plurima aptum sit quodque ad mentem referatur qu\u00e6 sui et Dei et rerum plurimum sit conscia atque ita ut id omne quod ad ipsius memoriam vel imaginationem refertur, in respectu ad intellectum vix alicujus sit momenti, ut in scholio propositionis pr\u00e6cedentis jam dixi.\nPROPOSITIO XL: Quo unaqu\u00e6que res plus perfectionis habet, eo magis agit et minus patitur et contra quo magis agit, eo perfectior est.\nDEMONSTRATIO: Quo unaqu\u00e6que res perfectior est, eo plus habet realitatis (per definitionem 6 partis II) et consequenter (per propositionem 3 partis III cum ejus scholio) eo magis agit et minus patitur; qu\u00e6 quidem demonstratio inverso ordine eodem modo procedit, ex quo sequitur ut res contra eo sit perfectior quo magis agit. Q.E.D.\nCOROLLARIUM: Hinc sequitur partem mentis qu\u00e6 remanet quantacunque ea sit, perfectiorem esse reliqua. Nam pars mentis \u00e6terna (per propositiones 23 et 29 hujus) est intellectus per quem solum nos agere dicimur (per propositionem 3 partis III); illa autem quam perire ostendimus, est ipsa imaginatio (per propositionem 21 hujus) per quam solam dicimur pati (per propositionem 3 partis III et generalem affectuum definitionem) atque adeo (per propositionem pr\u00e6cedentem) illa quantacunque ea sit, hac est perfectior. Q.E.D.\nSCHOLIUM: H\u00e6c sunt qu\u00e6 de mente quatenus sine relatione ad corporis existentiam consideratur, ostendere constitueram; ex quibus et simul ex propositione 21 partis I et aliis apparet quod mens nostra quatenus intelligit \u00e6ternus cogitandi modus sit qui alio cogitandi modo determinatur et hic iterum ab alio et sic in infinitum ita ut omnes simul Dei \u00e6ternum et infinitum intellectum constituant.\nPROPOSITIO XLI: Quamvis nesciremus mentem nostram \u00e6ternam esse, pietatem tamen et religionem et absolute omnia qu\u00e6 ad animositatem et generositatem referri ostendimus in quarta parte, prima haberemus.\nDEMONSTRATIO: Primum et unicum virtutis seu recte vivendi rationis fundamentum (per corollarium propositionis 22 et per propositionem 24 partis IV) est suum utile qu\u00e6rere. Ad illa autem determinandum qu\u00e6 ratio utilia esse dictat, nullam rationem habuimus mentis \u00e6ternitatis quam demum in hac quinta parte novimus. Quamvis igitur tum temporis ignoraverimus mentem esse \u00e6ternam, illa tamen qu\u00e6 ad animositatem et generositatem referri ostendimus, prima habuimus atque adeo quamvis etiam nunc hoc ipsum ignoraremus, eadem tamen pr\u00e6scripta prima haberemus. Q.E.D.\nSCHOLIUM: Communis vulgi persuasio alia videtur esse. Nam plerique videntur credere se eatenus liberos esse quatenus libidini parere licet et eatenus de suo jure cedere quatenus ex legis divin\u00e6 pr\u00e6scripto vivere tenentur. Pietatem igitur et religionem et absolute omnia qu\u00e6 ad animi fortitudinem referuntur, onera esse credunt qu\u00e6 post mortem deponere et pretium servitutis nempe pietatis et religionis accipere sperant nec hac spe sola sed etiam et pr\u00e6cipue metu ne diris scilicet suppliciis post mortem puniantur, inducuntur ut ex legis divin\u00e6 pr\u00e6scripto quantum eorum fert tenuitas et impotens animus, vivant et nisi h\u00e6c spes et metus hominibus inessent, at contra si crederent mentes cum corpore interire nec restare miseris pietatis onere confectis vivere longius, ad ingenium redirent et ex libidine omnia moderari et fortun\u00e6 potius quam sibi parere vellent. Qu\u00e6 mihi non minus absurda videntur quam si quis propterea quod non credit se posse bonis alimentis corpus in \u00e6ternum nutrire, venenis potius et lethiferis se exsaturare vellet vel quia videt mentem non esse \u00e6ternam seu immortalem, ideo amens mavult esse et sine ratione vivere: qu\u00e6 adeo absurda sunt ut vix recenseri mereantur.\nPROPOSITIO XLII: Beatitudo non est virtutis pr\u00e6mium sed ipsa virtus nec eadem gaudemus quia libidines coercemus sed contra quia eadem gaudemus, ideo libidines coercere possumus.\nDEMONSTRATIO: Beatitudo in amore erga Deum consistit (per propositionem 36 hujus et ejus scholium) qui quidem amor ex tertio cognitionis genere oritur (per corollarium propositionis 32 hujus) atque adeo hic amor (per propositiones 59 et 3 partis III) ad mentem quatenus agit referri debet ac proinde (per definitionem 8 partis IV) ipsa virtus est, quod erat primum. Deinde quo mens hoc amore divino seu beatitudine magis gaudet, eo plus intelligit (per propositionem 32 hujus) hoc est (per corollarium propositionis 3 hujus) eo majorem in affectus habet potentiam et (per propositionem 38 hujus) eo minus ab affectibus qui mali sunt, patitur atque adeo ex eo quod mens hoc amore divino seu beatitudine gaudet, potestatem habet libidines coercendi et quia humana potentia ad coercendos affectus in solo intellectu consistit, ergo nemo beatitudine gaudet quia affectus coercuit sed contra potestas libidines coercendi ex ipsa beatitudine oritur. Q.E.D.\nSCHOLIUM: His omnia qu\u00e6 de mentis in affectus potentia qu\u00e6que de mentis libertate ostendere volueram, absolvi. Ex quibus apparet quantum sapiens polleat potiorque sit ignaro qui sola libidine agitur. Ignarus enim pr\u00e6terquam quod a causis externis multis modis agitatur nec unquam vera animi acquiescentia potitur, vivit pr\u00e6terea sui et Dei et rerum quasi inscius et simulac pati desinit, simul etiam esse desinit. Cum contra sapiens quatenus ut talis consideratur, vix animo movetur sed sui et Dei et rerum \u00e6terna quadam necessitate conscius, nunquam esse desinit sed semper vera animi acquiescentia potitur. Si jam via quam ad h\u00e6c ducere ostendi, perardua videatur, inveniri tamen potest. Et sane arduum debet esse quod adeo raro reperitur. Qui enim posset fieri si salus in promptu esset et sine magno labore reperiri posset ut ab omnibus fere negligeretur? Sed omnia pr\u00e6clara tam difficilia quam rara sunt.\nFinis","title":"The Ethics: Ethics, Part 5","type":"page"}