Unicode Tanakh (Hebrew Bible) without vowels: Amos: amos 8
8:1 כה הראני אדני יהוה והנה כלוב קיץ
8:2 ויאמר מה אתה ראה עמוס ואמר כלוב קיץ ויאמר יהוה אלי בא הקץ אל עמי ישׂראל לא אוסיף עוד עבור לו
8:3 והילילו שׁירות היכל ביום ההוא נאם אדני יהוה רב הפגר בכל מקום השׁליך הס
8:4 שׁמעו זאת השׁאפים אביון ולשׁבית ענוי ארץ
8:5 לאמר מתי יעבר החדשׁ ונשׁבירה שׁבר והשׁבת ונפתחה בר להקטין איפה ולהגדיל שׁקל ולעות מאזני מרמה
8:6 לקנות בכסף דלים ואביון בעבור נעלים ומפל בר נשׁביר
8:7 נשׁבע יהוה בגאון יעקב אם אשׁכח לנצח כל מעשׂיהם
8:8 העל זאת לא תרגז הארץ ואבל כל יושׁב בה ועלתה כאר כלה ונגרשׁה ונשׁקה כיאור מצרים
8:9 והיה ביום ההוא נאם אדני יהוה והבאתי השׁמשׁ בצהרים והחשׁכתי לארץ ביום אור
8:10 והפכתי חגיכם לאבל וכל שׁיריכם לקינה והעליתי על כל מתנים שׂק ועל כל ראשׁ קרחה ושׂמתיה כאבל יחיד ואחריתה כיום מר
8:11 הנה ימים באים נאם אדני יהוה והשׁלחתי רעב בארץ לא רעב ללחם ולא צמא למים כי אם לשׁמע את דברי יהוה
8:12 ונעו מים עד ים ומצפון ועד מזרח ישׁוטטו לבקשׁ את דבר יהוה ולא ימצאו
8:13 ביום ההוא תתעלפנה הבתולת היפות והבחורים בצמא
8:14 הנשׁבעים באשׁמת שׁמרון ואמרו חי אלהיך דן וחי דרך באר שׁבע ונפלו ולא יקומו עוד