Unicode Tanakh (Hebrew Bible) without vowels: Deuteronomy: devarim 25
25:1 כי יהיה ריב בין אנשׁים ונגשׁו אל המשׁפט ושׁפטום והצדיקו את הצדיק והרשׁיעו את הרשׁע
25:2 והיה אם בן הכות הרשׁע והפילו השׁפט והכהו לפניו כדי רשׁעתו במספר
25:3 ארבעים יכנו לא יסיף פן יסיף להכתו על אלה מכה רבה ונקלה אחיך לעיניך
25:5 כי ישׁבו אחים יחדו ומת אחד מהם ובן אין לו לא תהיה אשׁת המת החוצה לאישׁ זר יבמה יבא עליה ולקחה לו לאשׁה ויבמה
25:6 והיה הבכור אשׁר תלד יקום על שׁם אחיו המת ולא ימחה שׁמו מישׂראל
25:7 ואם לא יחפץ האישׁ לקחת את יבמתו ועלתה יבמתו השׁערה אל הזקנים ואמרה מאן יבמי להקים לאחיו שׁם בישׂראל לא אבה יבמי
25:8 וקראו לו זקני עירו ודברו אליו ועמד ואמר לא חפצתי לקחתה
25:9 ונגשׁה יבמתו אליו לעיני הזקנים וחלצה נעלו מעל רגלו וירקה בפניו וענתה ואמרה ככה יעשׂה לאישׁ אשׁר לא יבנה את בית אחיו
25:10 ונקרא שׁמו בישׂראל בית חלוץ הנעל
25:11 כי ינצו אנשׁים יחדו אישׁ ואחיו וקרבה אשׁת האחד להציל את אישׁה מיד מכהו ושׁלחה ידה והחזיקה במבשׁיו
25:12 וקצתה את כפה לא תחוס עינך
25:13 לא יהיה לך בכיסך אבן ואבן גדולה וקטנה
25:14 לא יהיה לך בביתך איפה ואיפה גדולה וקטנה
25:15 אבן שׁלמה וצדק יהיה לך איפה שׁלמה וצדק יהיה לך למען יאריכו ימיך על האדמה אשׁר יהוה אלהיך נתן לך
25:16 כי תועבת יהוה אלהיך כל עשׂה אלה כל עשׂה עול
25:17 זכור את אשׁר עשׂה לך עמלק בדרך בצאתכם ממצרים
25:18 אשׁר קרך בדרך ויזנב בך כל הנחשׁלים אחריך ואתה עיף ויגע ולא ירא אלהים
25:19 והיה בהניח יהוה אלהיך לך מכל איביך מסביב בארץ אשׁר יהוה אלהיך נתן לך נחלה לרשׁתה תמחה את זכר עמלק מתחת השׁמים לא תשׁכח